އަންޗެލޮޓީ އަކީ ބްރެޒިލަށް އެންމެ ރަނގަޅު "ޗޮއިސް": އެޑްނާލްޑޯ ރޮޑްރިގޭސް

ހުސްވެފައިވާ ބްރެޒިލް ޤައުމީ ޓީމުގެ ކޯޗު ކަމަށް އެންމެ ރަނގަޅު ޗޮއިސް އަކީ ކާލޯ އަންޗެލޮޓީ ކަމަށް ބްރެޒިލް ފުޓުބޯޅަ ފެޑެރޭޝަންގެ ރައީސް އެޑްނާލްޑޯ ރޮޑްރިގޭސް ވިދާޅުވެއްޖެ އެވެ.

ރޮޑްރިގޭސް މިހެން ވިދާޅުވީ ބްރެޒިލްގެ ކޯޗުކަމަށް އަންޗެލޮޓީ ހަމަޖެއްސުމަށް އެ ޤައުމުގެ ފުޓުބޯޅަ އިދާރާ އިން މަސައްކަތް ކުރަމުން އަންނަ ކަމަށް ބޭރުގެ މީޑިއާ ރިޕޯޓުތައް ބުނެފައިވާ ދަނޑިވަޅެއްގަ އެވެ. އޭނާ ވިދާޅުވީ މިހާރު ކުރިއަށްދާ ސީޒަން ނިމުމާއެކު، އަންޗެލޮޓީ ރެއާލް މެޑްރިޑުގެ ކޯޗުކަށް ދޫކޮށްލައިފިނަމަ، އޭނާ އަކީ ޔަޤީނުން ވެސް ބްރެޒިލްގެ ކޯޗަކަށް ވާނެ ކަމަށެވެ. އުމުރުން 63 އަހަރުގެ އިޓަލީ އަށް ނިސްބަތްވާ އަންޗެލޮޓީ މިހާރު ހުރީ ރެއާލް މެޑްރިޑުގެ ކޯޗުކަމުގަ އެވެ. ރެއާލް އަށް މި ސީޒަންގައި އެދެވޭ ކާމިޔާބެއް ނުހޯދިއްޖެނަމަ، އެ މަގާމުން އަންޗެލޮޓީ ދުރުކުރާނެ ކަމުގެ އަޑުތަކެއް ވެސް ވަނީ ފެތުރިފަ އެވެ. ބައިނަލްއަޤުވާމީ ރަޙުމަތްތެރިކަމުގެ މެޗުގައި ބްރެޒިލުން މޮރޮކޯ އަތުން ބަލިވުމާއެކު، ރޮޑްރިގޭސް ދެއްވި އިންޓަވިޔުއެއްގައި އޭނާ ވިދާޅުވީ، އަންޗެލޮޓީ އަކީ އޭނާ ވެސް އަދި އެންމެން ވެސް ވަރަށް ގަޔާވާ ކޯޗެއް ކަމަށެވެ.

ރޮޑްރިގޭސް ވަނީ އަންޗެލޮޓީ މަސައްކަތް ކުރަމުން އަންނަ ގޮތާއި، ދާއިމީ ގޮތެއްގައި އެއް ފެންވަރެއްގައި ކުރާ މަސައްކަތަށް ވަރަށް ބޮޑަށް ތައުރީފު ކުރައްވާފައެވެ. އަދި އޭނާ ވިދާޅުވީ ބްރެޒިލްގެ ކުޅުންތެރިންނާއި ޓީމުގެ ގިނަ ސަޕޯޓަރުން ވެސް ބޭނުންވަނީ އެ މަގާމަށް އަންޗެލޮޓީ ގެންނަން ކަމަށެވެ. އަންޗެލޮޓީއާ ގުޅޭ ގޮތުން ވާހަކަ ދެއްކެވި ނަމަވެސް، ރޮޑްރިގޭސް ވިދާޅުވީ އަންޗެލޮޓީ މިހާރު ހުރީ 2024 ވަނަ އަހަރާ ހަމައަށް ރެއާލްގެ އެއްބަސްވުމުގައި ކަމަށާއި އެކަމަށް ވަރަށް ބޮޑަށް އިހުތިރާމް ކުރައްވާ ކަމަށެވެ. އެގޮތުން މިހާތަނަށް އަންޗެލޮޓީ އަށް އެދި އެހެން އެއްވެސް ކޯޗަކަށް ރަސްމީ ގޮތުން ހުށަހެޅުމެއް ހުށަހަޅާފައި ނުވާނެ ކަމަށެވެ. އޭނާ ވިދާޅުވީ ލިސްޓުކޮށްފައިވާ ކެންޑިޑޭޓުންނާއި މަޝްވަރާކުރުންތައް އޭޕްރީލް މަހުގެ ނިޔަލަށް ކުރިއަށް ދާނެ ކަމަށާއި މަސައްކަތް ކުރައްވަމުން ގެންދަވަނީ މެއި މަހުގެ ފަހު ކޮޅު ކޯޗު އިއުލާންކުރައްވަން ކަމަށެވެ.

ބްރެޒިލްގެ ކޯޗުކަން ހުސްވީ މިދިޔަ އަހަރު ޤަތަރުގައި އޮތް ފީފާ ވޯލްޑް ކަޕަށްފަހު ކޯޗުކަމުން ޓީޓޭ އިސްތުއިފާ ދިނުމުންނެވެ.