ޖަރުމަނު ޤައުމީ ޓީމަށް ކުޅެދިން ހުނަރުވެރި އެޓޭކިން މިޑްފީލްޑަރު މެސުޓް އޮޒިލް ފުޓުބޯޅަ ކުޅުން ހުއްޓާލައިފި އެވެ.

އުމުރުން 34 އަހަރުގައި އޮޒިލް ފުޓުބޯޅަ ކުޅުން ހުއްޓާލަން ނިންމާފައިވާކަން އިއުލާންކޮށްފައި ވަނީ އޭނާގެ ސޯޝަލް މީޑިއާ މެދުވެރިކޮށެވެ. އޮޒިލް އޭނާގެ ސީނިއާ ކެރިއަރު ފެށީ 2005 ވަނަ އަހަރު ޝާލްކާ އިންނެވެ. އެއަށްފަހު އޭނާ ވާޑާ ބާމަން އަށް ބަދަލުވީ 2008 ވަނަ އަހަރު އެވެ. އެ ކުލަބުގައި ދެ އަހަރު ހޭދަކުރުމަށްފަހު 2010 ވަނަ އަހަރު އޮޒިލް ވަނީ ސްޕެއިންގެ ރެއާލް މެޑްރިޑަށް ބަދަލުވެފަ އެވެ. ރެއާލްގައި ހޭދަ ކުރި ތިން އަހަރުގެ ތެރޭގައި އޭނާ ވަނީ އެ ކުލަބަށް ކުޅެދިން 159 މެޗުން 26 ލަނޑު ޖަހައިފަ އެވެ. މީގެ އިތުރުން އޮޒިލް ވަނީ ރެއާލާއެކު ތިން ތަށި ކާމިޔާބުކޮށްފަ އެވެ. އެއީ ސްޕެނިޝް ލީގާއި، ސްޕެނިޝް ސުޕަ ކަޕް އަދި ކޮޕާ ޑެލް ރޭ މުބާރާތެކެވެ. އެއަށްފަހު 2013 ވަނަ އަހަރު އޮޒިލް ބަދަލުވީ އިނގިރޭސި ޕްރިމިއާ ލީގުގެ އާސެނަލް އަށެވެ. އާސެނަލަށް އޮޒިލް ވަނީ 254 މެޗު ކުޅެދީ 44 ލަނޑު ޖަހައިދީފަ އެވެ. އެ ކުލަބާއެކު އޭނާ ވަނީ އިނގިރޭސި އެފްއޭ ކަޕް ތިން ފަހަރު އަދި އެފްއޭ ކޮމިއުނިޓީ ޝީލްޑެއް ކާމިޔާބުކޮށްފަ އެވެ. އާސެނަލް ގައި ކާމިޔާބު އަށް އަހަރު ހޭދަ ކުރުމަށްފަހު 2021 ވަނަ އަހަރު އޮޒިލް ވަނީ އެ ކުލަބް ދޫކޮށް، ތުރުކީގެ ފުޓުބޯޅަ ކުލަބަކަށް ބަދަލުވެފަ އެވެ.

އޮޒިލް އަށް ޖަރުމަނު ޤައުމީ ޓީމުން ޖާގަ ލިބުނީ 2009 ވަނަ އަހަރު އެވެ. އޭގެ ފަހުން އޭނާ ވަނީ ޤައުމީ ޓީމަށް ކުޅެދިން 92 މެޗުން 23 ލަނޑު ޖަހައިފަ އެވެ. ޖަރުމަނާއެކު އޮޒިލް ވަނީ 2014 ވަނަ އަަހަރު ބްރެޒިލްގައި އޮތް ފީފާ ވޯލްޑް ކަޕް ކާމިޔާބުކޮށްފަ އެވެ. އޭގެ ފަހުން އޭނާ ވަނީ 2018 ވަނަ އަހަރު ރަޝިޔާގައި އޮތް ފީފާ ވޯލްޑް ކަޕްގައި ވެސް ޖަރުމަނު ޓީމުގައި ހިމެނިފަ އެވެ. ނަމަވެސް އެ އަހަރުގެ ވޯލްޑް ކަޕަށް ފަހު އޮޒިލް ވަނީ ޤައުމީ ޓީމަށް ކުޅުން ހުއްޓާލަން ނިންމާފައިވާކަން އިއުލާންކޮށްފަ އެވެ.

ކުޅުން ހުއްޓާލަން ނިންމާފައިވާކަން އިއުލާންކުރަމުން އޮޒިލް ކުރި ޕޯސްޓެއްގައި އޭނާ ބުނީ، ޕްރޮފެޝަނަލް ފުޓުބޯޅައިގައި ހޭދަ ކުރެވުނު 17 އަހަރުގެ ތެރޭގައި އެނާ އަށް ލިބުނު ކޮންމެ ފުރުސަތަކަށް ވެސް ވަރަށް ބޮޑަށް ޝުކުރުވެރިވާ ކަމަށެވެ. ނަމަވެސް ފާއިތުވި ދުވަސްތަކުގައި އޭނާ އަށް ލިބިފައިވާ އަނިޔާގެ ސަބަބުން، މިއީ ފުޓުބޯޅައިގެ އެންމެ މަތީ މަރުހަލާއިން ދުރަށް ޖެހިލަންވީ ވަގުތުކަމަށް އޮޒިލް ވަނީ ބުނެފަ އެވެ. އޮޒިލް ވަނީ ފުޓުބޯޅައިގައި އޭނާ އަށް އެހީތެރިވެދިން އެންމެހައޮ ފަރާތްތަކަށް ޝުކުރު އަދާކޮށްފަ އެވެ.

އޮޒިލް އޭނާގެ ފުޓުބޯޅަ ކެރިއަރު ނިންމާލީ ވެސް ތުރުކީގެ ފުޓުބޯޅަ ކުލަބަކުންނެވެ. އޮޒިލް އަކީ މުސްލިމް ފުޓުބޯޅަ ކުޅުންތެރިންގެ ތެރެއިން ފާހަގަކޮށްލެވޭ ނަމޫނާ ކުޅުންތެރިޔެކެވެ. އަބަދު ވެސް އޭނާ ފާހަގަވެފައި ވަނީ މުސްލިމުންނާއި، އިންސާނިއްޔަތަށް އަޅާލާ ކުޅުންތެރިޔެއްގެ ގޮތުގަ އެވެ.