އަނިޔާގެ ސަބަބުން އާލިން ހާލަންޑު ނޯވޭ ޤައުމީ ޓީމާ ދުރަށް ދާން ޖެހިއްޖެ އެވެ.
މި ސީޒަންގައި ރަނގަޅު ފޯމެއްގައި ކުޅެމުން އައި ހާލަންޑް ނޯވޭ ޤައުމީ ޓީމުގެ ސްކޮޑުން ދުރަށް ދާން ޖެހުނީ އުކުޅުވަޅަށް ލިބުނު އަނިޔާއެއްގެ ސަބަބުންނެވެ. ނޯވޭ އިން މިހާރު ތައްޔާރުވަމުން އަންނަނީ އަންނަ އަހަރު އޮންނަ ޔޫރޯ ފުޓުބޯޅަ މުބާރާތުގެ ކޮލިފިައިންގައި ސްޕެއިން އަދި ޖިއޯޖިއާއާ ދެކޮޅަށް ކުޅޭ މެޗަށެވެ. ސްޕެއިންނާ ދެކޮޅަށް ނޯވޭ އިން ނިކުންނާނީ ހޮނިހިރު ދުވަހުގެ ރޭ އެވެ. އެ މެޗުގެ ކުރިން ނޯވޭގެ ފުޓުބޯޅަ ފެޑެރޭޝަނުން ބުނީ، ހާލާންޑަށް ލިބުނު އަނިޔާގެ ސަބަބުން ކުރިއަށް ގެންދިޔަ ޓެސްޓުތަކުން ވަނީ ކުރިއަށް އޮތް ދެ މެޗު ނުކުޅެވޭނެކަން ޔަޤިީންވެފައި ކަމަށެވެ. މީގެ އިތުރުން ހާލަންޑް ދެން ކުރިއަށް ދާނީ ކުލަބާއެކު މެޑިކަލް ފޮލޯ އަޕެއްގައި ކަމަށް ވެސް ވަނީ ބުނެފަ އެވެ. އެކަމާ ގުޅިގެން ނޯވޭގެ ކޯޗު ބުނީ، އަނިޔާގެ ސަބަބުން ޤައުމީ ޓީމަށް ނުކުޅެވޭނެކަން އިނގުމުން ހާލަންޑަށް ވަރަށް އުނދަގޫވި ކަމަށާއި، ހާލަންޑް ނެތުމަކީ ޓީމަށް ދެރައެއް ކަމަށެވެ. ނަމަވެސް ކޮލިފައިންގައި ނޯވޭ ހިމެނުނު ގްރޫޕަށް ބަލާއިރު، ކުރިއަށް ދެވޭނެ ފެންވަރުގެ ސްކޮޑެއް އޮތް ކަމަށް ވެސް އޭނާ ބުންޏެވެ.
ހާލަންޑް މިހާރު ވަނީ އެނބުރި ކުލަބާ ގުޅިފަ އެވެ. އިންޓަނޭޝަނަލް ބްރޭކަށް ފަހު ސިޓީން ލީގުގައު ވާދަވެރި ލިވަޕޫލާ ދެކޮޅަށް ކުޅޭ މެޗަށް ހާލަންޑް ފިޓުވާނެ ކަމަށް ރިޕޯޓުތައް ބުނެ އެވެ.
