ޑޭވިޑް ވިލާ ދެކޭ ގޮތުގައި ޒަވީ މުޅި ބާސެލޯނާ ބަދަލުކޮށްލައިފި

ބާސެލޯނާގެ ކޯޗު ކަމާ ހަވާލުވެ ޒަވީ ހެނާންޑޭޒް މުޅި ކުލަބް ބަދަލުކޮށްލައިފި ކަމަށް އެ ކުލަބަށް ކުރިން ކުޅުނު ސްޕެއިންގެ ޑޭވިޑް ވިލާ ބުނެފި އެވެ.

ޒަވީ އާއެކު ކުރިން އެކުގައި ބާސެލޯނާ އަށް ކުޅެފައިވާ ވިލާ ބުނީ، ބާސެލޯނާގެ ކޯޗުކަމާ ޒަވީ ހަވާލުވީއިރު ވެސް ގިނަ ބަޔަކު ތިބީ ސުވާލުތަކެއްގެ ތެރޭގައި ކަމަށެވެ. ސްޕެނިޝް ލީގު ތާވަލްގެ އެއް ވަނައިގައި މިވަގުތު 12 ޕޮއިންޓުގެ ލީޑަކާއެކު އޮތް ބާސެލޯނާއާ ގުޅޭ ގޮތުން ވިލާ ބުނީ، ޒަވީ ބާސެލޯނާގައި ކޯޗެއްގެ ގޮތުގައި މިހާރު ކުރަނީ ވަރަށް ރަނގަޅު މަސައްކަތެއްް ކަމަށާއި، ޒަވީއާ މެދު އޭނާ ވަރަށް އުފާވާ ކަމަށެވެ. ބާސެލޯނާ އަށް އައިސްފައިވާ ބަދަލުތައް ފާހަގަ ކުރަމުން ވިލާ ބުނީ، އެ ޓީމުގެ މުޅި މޫނު މަތި ޒަވީ ބަދަލުކޮށްފައިވާ ކަމަށެވެ. އިތުރަށް އޭނާ ބުނީ ބާސެލޯނާ އާއި ރެއާލް މެޑްރިޑުގެ ވާހަކަ ދައްކާއިރު ލީގު ހޯދާނެ ބައެއް އެހާ އަވަހަށް ކަނޑައެޅުމަކީ ވެސް އުނދަގޫ ކަމަކަށްވާނެ ކަމަށެވެ. ނަމަވެސް މިހާރު އޮތް ހިސާބުން ބާސެލޯނާ ލީގު ރޭހުން ބޭރުވުމަކީ ވަރަށް އުނދަގޫ ކަމެއް ކަމަށް ވިލާ ބުންޏެވެ. ސަބަބަބެއްގެ ގޮތުގައި އޭނާ ބުނީ ހަމައެކަނި 12 ޕޮއިންޓުގެ ލީޑެއް އޮތުން ނޫން ކަމަށާއި، ސަބަބަކީ މިހާރު ބާސެލޯނާގައި އޮތް ވަރުގަދަ ރޫޙު ކަމަށެވެ.

ވިލާ ބުނީ މިހާރު އޮތް ގޮތުގައި އޮވެ އަހަރު ނިންމާލާއިރު ބާސެލޯނާ އަށް ލީގު ލިބިއްޖެ ނަމަ، އެއީ މިހާރަށް ވެސް އަދި މުސްތަޤުބަލަށް ވެސް ހޯދޭނޭ ވަރަށް ރަނގަޅު ކާމިޔާބެއް ކަމަށެވެ. އަދި ޒަވީއާ ދެމެދު އަބަދު ވެސް އޮންނަނީ ވަރަށް ގާތް ގުޅުމެއް ކަމަށާއި، ޒަވީއާ މެދު އޭނާ ވަރަށް ފަޚުރުވެރިވާ ކަމަށެވެ.

ސްޕެނިޝް ލީގުގައި މިހާތަނަށް ކުޅުނު 26 މެޗުން ބާސެލޯނާ އަށް ލިބެނީ 68 ޕޮއިންޓެވެ. ދެ ވަނައިގައި އޮތް އެންމެ ފަހުގެ ޗެމްޕިއަން ރެއާލް މެޑްރިޑަށް ލިބެނީ 56 ޕޮއިންޓެވެ.