ދައުލަތުގެ ފައިސާއާއި ތަކެތި ބޭނުންކުރުމާ ގުޅޭ ގިނަ މައްސަލަތަކެއް 2022 ވަނަ އަހަރު އޭސީސީއަށް ހުށަހަޅާފައިވާކަމަށް، އެކޮމިޝަންގެ ސްޓެޓިސްޓިކަލް އޮފިސަރ އާއިޝަތު މުނާ ޚާލިދު ވިދާޅުވެއްޖެއެވެ.

އޭނާ މިފަދައިން ވިދާޅުވީ އޭސީސީގެ އަހަރީ ރިޕޯޓާ ގުޅޭގޮތުން ރާއްޖެޓީވީގެ ފަލަސުރުޚީ ޕްރޮގްރާމުގައި ބައިވެރިވެވަޑައިގެން ވާހަކަފުޅުދައްކަވަމުންނެވެ.

މުނާ ވިދާޅުވީ އެ ކޮމިޝަނަށް 658 ޝަކުވާ ހުށަހަޅާފައިވާ ކަމަށެވެ. މީގެ ތެރެއިން ކޮމިޝަންގައި ރަޖިސްޓްރީކޮށްފައިވަނީ 486 މައްސަލަ ކަމަށް އޭސީސީން ބުނެއެވެ. 272 މައްސަލަ ރަޖިސްޓްރީ ނުކޮށް ދޫކޮށްލާފައިވެއެވެ.

މުނާ ވިދާޅުވީ ފާއިތުވި އަހަރު އެންމެ ގިނައިން ރަޖިސްޓްރީކޮށްފައިވަނީ ޕްރޮކިއުމެންޓާ ގުޅޭ މައްސަލަތައް ކަމަށެވެ. ދައުލަތުގެ ފައިސާއާއި ތަކެތި ބޭނުންކުރުމާ ގުޅޭ ގިނަ މައްސަލަތަކެއްވެސް ރެޖިސްޓްރީކޮށްފައިވާކަމަށް މުނާ ވިދާޅުވިއެވެ.

މުނާ ވިދާޅުވީ ކޮމިޝަނަށް ހުށަހެޅޭ މައްސަލަތައް ނިންމަނީ ދެ މަރުހަލާއެއްގައި ކަމަށެވެ. އެއީ ޕްރިލިމިނަރީ އިންވެސްޓިގޭޝަން މަރުހަލާއާއި އިންވެސްޓިގޭޝަން މަރުހަލާ ކަމަށެވެ.

ޕްރިލިމިނަރީ އިންވެސްޓިގޭޝަން މަރުހަލާގައި މިދިޔަ އަހަރު 296 މައްސަލަ ނިންމާފައިވާކަމަށް މުނާ ވިދާޅުވިއެވެ. އަދި އިންވެސްޓިގޭޝަން މަރުހަލާގައި 138 މައްސަލަ ނިންމާފައިވާއިރު، ޖުމްލަ 434 މައްސަލަ ނިންމާފައިވާކަމަށާއި، މީގެ ތެރޭގައި މާލެއަށް ނިސްބަތްވާ 209 މައްސަލަ ހިމެނޭކަމަށް މުނާ ވިދާޅުވިއެވެ.