"ހަކަތަ ސަމަކާރަ" ނަމުގައި ގައުމީ ކެމްޕެއިނެއް އިފްތިތާހުކޮށްފި
21 މާރިޗު 2023 | އަންގާރަ 08:50މި ކެމްޕެއިންގެ މައިގަނޑު މަގްސަދުތަކަކީ ސަމަކާރަ ގޮތެއްގައި ހަކަތަ ބޭނުންކުރުމަށް ބާރުއެޅުން
މި ކެމްޕެއިން އިފްތިތާހް ކުރި ރަސްމިއްޔާތުގެ ތެރެއިން
ހަކަތަ ހެޔޮގޮތުގައި ބޭނުންކުރުމަށް ބާރު އަޅައި "ހަކަތަ ސަމަކާރަ" ނަމުގައި ގައުމީ ކެމްޕެއިނެއް މިނިސްޓްރީ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޮލޯޖީން އިފްތިތާހްކޮށްފިއެވެ.
އަންގާރަ ދުވަހު ބޭއްވި ޚާއްސަ ރަސްމިއްޔާތެއްގައި މި ކެމްޕެއިން އިފްތިތާހްކޮށްދެއްވީ މިނިސްޓަރ އޮފް ސްޓޭޓް ފޯރ އެންވަޔަރަމަންޓް، ކްލައިމެޓް ޗޭންޖް އެންޑް ޓެކްނޯލޮޖީ، ޚަދީޖާ ނަސީމެވެ.
މި ކެމްޕެއިންގެ މައިގަނޑު މަގްސަދުތަކަކީ ރާއްޖޭގައި ސަމަކާރަ ގޮތެއްގައި ހަކަތަ ބޭނުންކުރުމަށް ބާރުއަޅައި ހިތްވަރުދީ ފަރުދީ ފެންވަރުގައާއި ގޭބިސީ ފެންވަރުގައި ހަކަތައަށް ހޭދަކުރާ ފައިސާ އިގްތިޞާދުކުރުމަށް ހިތްވަރުދިނުމެވެ. އަދި ޖައްވަށް ދޫކުރާ ވިހަ ގޭސްތައް މަދުކޮށް، 2030 ގެ ނެޓް ޒީރޯ ލަނޑުދަނޑި ހާސިލްކުރުމަށް މަސައްކަތްކުރުމާއި، ހަކަތަރި އާލާތްތައް ބޭނުންކުރުމަށް ބާރުއަޅާ އަހުލުވެރިކުރުވުމާއި، ހަކަތަ ސަމަކާރަކުރަނިވި މުޖުތަމައެއް ބިނާކުރުމެވެ.
ތަފާސްހިސާބުތަކަށް ބަލާއިރު ކޮންމެ ރޯދަމަހެއްގައިވެސް ރާއްޖޭގައި ކަރަންޓު ބޭނުންކުރާ މިންވަރު އިތުރުވެއެވެ. މީގެ އިތުރުން، ކޮންމެ އަހަރެއްގެ ވެސް ހޫނު ދުވަސްވަރުގައި (މާރިޗުން މޭ އަށް) ކަރަންޓު ބޭނުންކުރާ މިންވަރު އިތުރުވެއެވެ. މިއަހަރުގެ ރޯދަމަހާއި ހޫނު ދުވަސްވަރާއި ދިމާވާތީ، ކަރަންޓު ހެޔޮގޮތުގައި ބޭނުންކުރުމުގައި އާންމު ފަރުދުންގެ މެދުގައި ހޭލުންތެރިކަން އިތުރުކުރުމަކީ ކޮންމެހެން ބޭނުންތެރިކަމެއް ކަމަށް މިނިސްޓްރީން ބުނެއެވެ.
