ދެން ދައްކަންވީ ކަންކަން ނިންމުމުގެ މަރުހަލާގައި އަންހެނުންގެ ދައުރު ފުޅާކުރުމުގެ ވާހަކަ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.
ރައީސުލްޖުމްހޫރިއްޔާ މިފަދައިން ވިދާޅުވީ ބައިނަލްއަގުވާމީ އަންހެނުންގެ ދުވަހުގެ މުނާސަބަތުގައި ހޯމަ ދުވަހުގެރޭ ބޭއްވި ޖަލްސާގައި ވާހަކަފުޅުދައްކަވަމުންނެވެ.
ރައީސް ވިދާޅުވީ، މިހާތަނަށް ދައްކަމުން މި އަންނަނީ އަންހެނުންނަށް ފުރުސަތުތައް ފަހިކޮށްދީ އަންހެނުންނަށް ވަޒީފާތައް ހޯދައިދޭންޖެހޭ ވާހަކަ ކަމަށެވެ. އެހެންނަމަވެސް ހަމައެކަނި ފުރުސަތާއި ވަޒީފާގެ ވާހަކައިން، ހޯދަން އެދޭ މަންޒިލެއް ނުފެންނާން ކަމަށް ރައީސް ވިދާޅުވިއެވެ.
ރައީސް ވިދާޅުވީ ދެން ދައްކަންވީ ކަންކަން ނިންމުމުގެ މަރުހަލާގައި އަންހެނުންގެ ދައުރު ފުޅާކުރުމުގެ ވާހަކަ ކަމަށާއި، އަދި ސިޔާސަތުތައް ކަނޑައެޅުމުގެ ފަންތިއަށް އަންހެނުން ގެނައުމުގެ ވާހަކަ ކަމަށް ރައީސް ވިދާޅުވިއެވެ. ކުންފުނިތަކުންނާއި ސަރުކާރުގެ ތެރެއިންވެސް ދެން މަސައްކަތްކުރަންވީ ކަންކަން ނިންމުމުގެ މަރުހަލާގައި މިހާރަށްވުރެ ބޮޑަށް އަންހެނުންގެ ޚިޔާލާއި މަޝްވަރާ ހޯދުމަށް ކަމަށް ރައީސް ވިދާޅުވިއެވެ.
ސަރުކާރާއި ކުންފުނިތަކުގެ މަސައްކަތްތަކަކީ މިންތީގެ ހަމަހަމަކަމަށް ރިއާޔަތްކުރެވިފަވާ މަސައްކަތްތަކަކަށް ހެދުމަށްޓަކާ މިހާރު ވަނީ މިންގަނޑުތަކެއް ކަނޑައެޅިފަ. އަދި އެކި އިދާރާތަކުން ކުރާ މަސައްކަތްތައް ވަޒަންކުރެވޭނެ މިންގަނޑުތަކެއްވެސް ވަނީ ކަނޑައެޅިފަ. އެހެންކަމުން މިއަދުން ފެށިގެން، ސަރުކާރުގެ ހުރިހާ އިދާރާއަކުންވެސް މި މޮޑެލްއާ އެއްގޮތަށް މަސައްކަތްތައް ރާވާ، ރާއްޖޭގަ މިންތީގެ ހަމަހަމަކަން ގާއިމްކުރުމަށް ކުރާ މަސައްކަތްތައް ހަރުދަނާކުރުމަށް އަޅުގަނޑު އިލްތިމާސްކުރަން.ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު
ރައީސް އިތުރަށް ވިދާޅުވީ މިންތީގެ ހަމަހަމަކަން ގާއިމްކުރުމަކީ ސަރުކާރުން ވަރަށް ބޮޑަށް އިސްކަމެއް ދޭ ކަމެއް ކަމަށެވެ. ސަރުކާރުގެ ސްޓްރެޓެޖިކް އެކްޝަން ޕްލޭންގައިވެސް އިގްތިސާދު ސިންދަފާތު ކުރުމަށާއި، އައިސީޓީއާއި މިންތީގެ ހަމަހަމަކަން ފަދަ ސަބްސެކްޓަރތަކަށް ރިއާޔަތްކުރެވިފައި ވާނެކަމަށާއި، އެކަންކަމާ ގުޅުވައިގެން ލާމަރުކަޒުކޮށް މަސައްކަތްކުރުމަށްވެސް ހިމަނާފައިވާނެކަން ރައީސް ފާހަގަކުރެއްވިއެވެ.
