ރަމަޟާން މަހު ވިޔަފާރި ވެރިންނަށް ވީހާ ވެސް އަވަހަށް މުދާ ކްލިއަރ ކުރެވޭނެ އިންތިޒާމްތައް ހަމަޖެއްސުމުގެ މަސައްކަތް ކުރަމުންދާ ކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް)އިން ބުނެފިއެވެ.
ބުދަ ދުވަހު އެމްޕީއެލުން ބޭއްވި ސްޓޭކްހޯލްޑަރ ބައްދަލުވުމުގައި އެމްޕީއެލްގެ ސީއީއޯ ޝާހިދު އަލީ ވިދާޅުވީ ރަމަޟާން މަހަކީ މާލޭ ވިޔަފާރި ބަނދަރަށް ގެންނަ މުދަލުގެ އަދަދުތައް މަތިވާ މަހެއް ކަަމަށެވެ.
ކުންފުނީގެ އަމާޒަކީ ކުރިން އަހަރުތަކެކޭ ވެސް އެއްގޮތަށް ރަމަޟާން މަހު ވެސް ވިޔަފާރި ވެރިންނަށް ވީހާ ވެސް އަވަހަކަށް މުދާ ކްލިއަރ ކުރެވޭނެ އިންތިޒާމްތައް ރޭވުން ކަމަށް ކަމަށް ޝާހިދު ވިދާޅުވިއެވެ. އަދި ވިދާޅުވީ ވިޔަފާރިއަށް ނެރޭ މުދަލުގެ އަގު ކޮންޓްރޯލް ކުރުމުގައި މުދާ އަވަހަށް ކްލިއަރ ކުރުމަކީ ވަރަށް މުހިންމު ކަމެއް ކަމަށެވެ. އެކަމަށްޓަކައި އެމްޕީއެލްއިން ވަމުންދާ ތައްޔާރީތަކާއި ގޭޅޭ މައުލޫމާތުތައް މަސްލަހަތުވެރިންނާއި ހިއްސާކުރެއްވިއެވެ.
މި ބައްދަލުވުމުގައި މަސްލަހަތުވެރިން ވެސް ވަނީ އެފަރާތްތަކުގެ ހިޔާލުތައް ފާޅުކޮށް، މިވަގުތު ހުރި ކަންބޮޑުވުންތައް އެމްޕީއެލްގެ މެނޭޖްމެންޓާ ހިއްސާކޮށްފައެވެ.
އެމްޕީއެލްއިން ބާއްވާ ސްޓޭކް ހޯލްޑަރ ބައްދަލުވުންތަކަކީ ކުންފުނީގެ މަސްހަލަތުވެރިންނާއި އޮތް ގުޅުން ބަދަހިކޮށް އެފަރާތްތަކުގެ ހިޔާލާ މަޝްވަރާއާއެކު ކުންފުނިން ފޯރުކޮށްދޭ ޚިދުމަތްތައް ހަރުދަނާ ކުރުމުގެ ގޮތުން މިދިޔަ އަހަރު އެމްޕީއެލްއިން ފެށި ސިލްސިލާ ބައްދަލުވުންތަކެކެވެ. މިއަހަރު ކުރިއަށް އޮތްތަނުގައި ވެސް މިފަދަ އިތުރު ބައްދަލުވުންތައް ބޭއްވުމަށް ވަނީ ހަމަޖެހިފައެވެ.
