ރިޔާސީ އިންތިޚާބުގެ ފުރަތަމަ ބުރަކީ ގާސިމް މޫނުފުޅުގައި އަގު ޖައްސާ ބުރު

ހުރިހާ ކޯލިޝަނަކުން ވެސް ލަނޑުދީ، ވެރިކަން ފެށޭތަނުން ނަގުލުގައި ފަތްގަނޑެއްލައި، ގާސިމް އިބްރާހީމް އެއްލާނުލެއްވި ހަމަ އެކަނި ވެރިޔަކީ ރައީސް އިބްރާހީމް މުހައްމަދު ސާލިހެވެ. މިނޫނީ ހަމަޖެހުމުގެ ނޭވާފުޅެއް ލެއްވުނު ވެރިކަމެއް ނެތްކަމަށް ޚުދު ގާސިމް ވިދާޅުވިއެވެ.

ކަން މިހެން އޮތުމުން، 2023ގެ ރިޔާސީ އިންތިޚާބުގައި އެންމެ ފުރަތަމަވެސް ގާސިމް ހުންނަވާނީ ރައީސް ސާލިހުގެ ފަހަތްޕުޅުގައި ކަމަށް ހީކުރާ މީހުންގެ ވިސްނުން ތަންކޮޅެއް ފަހަތަށް ސޮއްސާލައިފިނަމަ، މިވާގޮތް ސާފުވާނެއެވެ.

ފުރަތަމަ ކަމަކަށް، ރަައީސް މައުމޫނުގެ ފަހުން މިއަދާ ހަމައަށްވެސް، ރާއްޖޭގެ ވެރިކަމަށް ވަޑައިގަތުމުގެ އުންމީދު އެންމެ ބޮޑަށް ހިތުއަޅުއްވައިގެން ހުންނެވި ބޭފުޅަކީ ގާސިމްކަން، ވިސްނާ ބަޔަކަށް ސާފުވާނެއެވެ.

ނަޝީދާއި، ވަހީދާއި ޔާމީނާއި އަދި އިބޫއަކީ، ވެރިކަމުގެ އުންމީދާއި އުމުރުފުޅުގެ ގޮތުން ބެލިޔަސް މި ދެ ކަންތަކަށްވެސް ގާސިމަށްވުރެ ހަގު، އެރޮނގުން މާފަހަތުގައި ތިއްބެވި ބޭބޭފުޅުންނެވެ.

ކަމަކަށް މީހަކު އެދިހުރެގެން ރާއްޖޭގެ ވެރިކަން ލިބޭނެނަމަ، މައުމޫނަށްފަހު ވެރިކަން ލިބިވަޑައިގަތީހީ ގާސިމަށެވެ. އެހެންނަމަވެސް ތަގުދީރުގެ ނިޔާ އޮތީ އެހެން ގޮތަކަށްކަން ހިނގައިދިޔަ ކަންކަމުން އޮތީ ފެންނާށެވެ. ގާސިމް ހުންނެވި ތަނުގައި ބަހައްޓައި، މުޅިން އެހެން 4 މީހަކު ރާއްޖޭގެ ވެރިކަންކުރައްވައިފިއެވެ. ކިންގަށް ވެވަޑައިގަތުމުގެ އުންމީދުގައި ހުންނެވި ގާސިމަށް ލިބިވަޑައިގަތީ ކިންގް މޭކަރގެ މަގާމެވެ.

ރިޔާސީ އިންތިޚާބް ބުރުބުރުން ބޭއްވުމަކީ ދައުލަތަށް ގެއްލުން ވިޔަސް، ބަޔަކަށް ލައްކަ ފައިދާވާ ކަމެކެވެ. ކިރިޔާ ފުރުސަތެއް ލިބުނަސް ގާސިމް ވަކިން ވާދަ ނުކުރައްވާ ފަހަރެއް އަތުވެއްޖެ ހެއްޔެވެ؟ އެވަނީ ކިހިނެއްކަން އެބަ ރޭކާލާހެއްޔެވެ؟ 2018 ނުކިޔާށެވެ. އެއީ އައިސީޔޫ ބެޑުން، ޖަލުގޮޅީ ތުންފަތް މަތިން ޖާނައިގެން ކިިރިޔާ ޖަރުމަނަށް ލައްވާލި އަހަރެވެ.

އެފަހަރު ލީ ވޯޓަކީ ހުރިހާ ބޭފުޅުން ޖަލުން ނުކުންނަވަން ލީ ވޯޓެކެވެ. ޖަލުބިރު ފިލައި، ކޮވިޑުން އަރައިގަނެވި، އިގްތިސާދީ ދުވެލީގައި ބަނޑުރިޔަލު ފެނުއެޅި، ބާރަށް ދުވަނިކޮށް، ހުންގާނަށް އަރާވަޑައިގެންނެވޭތޯ އަމުދުން މިއަހަރު ގާސިމް ނުނުކުންނަވާނެ ކަމަށް ބަލާނީ މޮޔައިންނެވެ.

ދެނެތިބޭށެވެ! ރިޔާސީ އިންތިޚާބުގެ ފުރަތަމަ ބުރުގައި ގާސިމް ކުރައްވާކަމަކީ، ލިބޭ ވޯޓުގެ ޖުމްލައިން އޭނާގެ މޫނުފުޅުގައި ރައްޔިތުން ލައްވައި އަގުޖެއްސުމެވެ. ދެން ދެވަނަ ބުރުގައި ކުރައްވާ ކަމަކީ އެޖެހި އަގަށް އަމިއްލަ ނަފްސުފުޅު ދެން އުފެދެން އޮންނަ ވެރިކަމަށް ވިއްކަވާލައްވަނީއެވެ. އޭގެ ބަދަލުގައި އެތައް ވުޒާރާއަކާއި، ކުންފުނިތައް ގާސިމަށް ލިބިވަޑައިގަނެއެވެ.

ވިލާ ކިޔަސް، ޖުމްހޫރީ ކިޔަސް ގާސިމް ކުރައްވަނީ އެންމެ ކަމެކެވެ. އެއީ ވިޔަފާރިއެވެ. ގާސިމަކީ ކުޅަދާނަ ސޭޓެކެވެ.