ދިގު މުއްދަތުގެ ޖަލު ހުކުމެއް ތަންފީޒު ކުރައްވާ ކުރީގެ ނައިބު ރައީސް އަހުމަދު އަދީބު، ދޫނިދޫ ޖަލުގައި އޮންނެވި ފޮޓޯއެއް ސޯޝަލް މީޑިއާގައި އާންމުވުމާ ގުޅިގެން އެކަން ތަހުގީގު ކުރަމުންދާ ކަމަށް މޯޑިވްސް ޕޮލިސް ސާވިސް އިން ބުނެފިއެވެ.

ރާއްޖެއެމްވީ އަށް މައުލޫމާތު ދެއްވަމުން ފުލުހުންގެ މީޑިއާ އޮފިޝަލް ވިދާޅުވީ ސޯޝަލް މީޑިއާގައި އާންމުވެފައިވާ އެ ފޮޓޯއިން ފެންނަ ޖަލުގޮޅިއަކީ ފުލުހުންގެ ބެލުމުގެ ދަށުގައިވާ ތަނެއް ކަމަށެވެ.

އެހެން ކަމުން އަދީބު އޮންނެވި އެ ޖަލު ގޮޅީގެ ފޮޓޯ އާންމުވި ގޮތް ހޯދުމަށް އެ މައްސަލަ ތަހުގީގު ކުރަން ފަށާފައިވާ ކަމަށް ފުލުހުންގެ މީޑިއާ އޮފިޝަލް ވިދާޅުވިއެވެ.

ކުރީގެ ނައިބް ރައީސް ދޫނިދޫގައި ޖަލުގައި އޮންނެވި ފޮޓޯއެއް ސޯޝަލް މީޑިއާގައި އާންމު ކުރެއްވީ ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު އަހުމަދު މަހުލޫފްއެވެ.

އެ ފޮޓޯއިން ފެންނަނީ އަދީބު އައްޓެއްގައި އޮށާވެލައިގެން އޮންނެވި މަންޒަރެވެ. އަދި ކަނެއްގައި މޭޒެއް ހުންނައިރު އެ މޭޒުގައި ފޮތްތަކެއް ބަހައްޓާފައިވާކަން އެ ފޮޓޯއިން އެނގެއެވެ.

މަޚްލޫފު މީގެ ކުރިން ވިދާޅުވީ އަދީބު ޖަލުގައި ބަހައްޓައިގެން ޒަހަރު ކަހަލަ އެއްޗެއް ދީގެން ސިއްހީ ހާލަތު ގޯސްކޮށް އަވަހާރަކޮށްލަފާނެ ކަމުގެ ކަންބޮޑުވުން އެބަ އޮތްކަމަށެވެ. އަދީބުގެ އާއިލާގެ ބޭފުޅުންނާއި އޭނާ ބައްދަލުކުރެއްވި ކަމަށާއި އަދީބުގެ މައްސަލައަކީ ވަރަށް ސީރިއަސް މައްސަލައެއް ކަމަށް މަހުލޫފު ވިދާޅުވެފައި ވެއެވެ.

ސަރުކާރުން އަދީބުގެ ބޭސްފަރުވާއަށް، ރާއްޖެއިން ބޭރަށް މިހާރު ނުފޮނުއްވި ކަމުގައި ވިއަސް 2018 ގެ ރިޔާސީ އިންތިޚާބަށް ފަހު ފޮނުވާނެ ކަމަށް ގަބޫލު ކުރެވޭ ކަމަށް މަޚްލޫފު ވިދާޅުވިއެވެ.

ޖަލުގައި އަދީބާއި މަޚްލޫފާ ދެމެދު ވާހަކަތައް ދެކެވިފައިވާ ކަމަށާއި އަދީބު ސުޕްރީމް ކޯޓަށް ފޮނުވި ސިޓީއަކީ ޖަލުތެރޭގައި ދެކެވުނު ވާހަކައިގެ ތެރެއިން އެއް ވާހަކަ ކަމަށް ވެސް މަޚްލޫފު ވަނީ ވިދާޅުވެފައެވެ.