އާގަލާ ބޯޓުން ގެއްލުނު މީހާ ހޯދުން ހުއްޓައިލައިފި
12 މާރިޗު 2023 | އާދީއްތަ 08:49މި ބޯޓުން ދަތުރުކުރި 14 މީހަކު ވަނީ ސަލާމަތްވެފައި
އާގަލާ ބޯޓުގައި ރޯވި ހާދިސާ
އާގަލާ ބޯޓުގައި އަލިފާނުގެ ހާދިސާއެއް ހިނގައި ގެއްލުނު މީހާ ހޯދުމުގެ މަސައްކަތް އެމްއެންޑީއެފުން ހުއްޓައިލައިފިއެވެ.
މި މަހުގެ ފަސްވަނަ ދުވަހުގެ ރޭ އައްޑޫން ފުރައިގެން މާލެއަށް ދަތުރުކުރަމުންދަނިކޮށް އާގަލާ ބޯޓުގައި ރޯވީ ގާތްގަނޑަކަށް މެންދަމު 2:45 ހާއިރުއެވެ. އެންމެ ފުރަތަމަ އިންޖީނު ރޫމުގައި ރޯވިއިރު ކުޑައިރުކޮޅެއްގެ ތެރޭގައި އަލިފާންގަނޑު ވަނީ ބޯޓަށް ފެތުރިގެންފައެވެ. އަލިފާން ރޯވި އިރު ޖުމުލަ 15 މީހުން ބޯޓުގައި ތިއްބެވެ. އެއީ ފަސް ދިވެހީންނާއި އިންޑިއާގެ ތިން މީހަކާއި ބަންގްލަދޭޝްގެ ތިން މީހެކެވެ.
އެ އެންމެން ވެސް ސަލާމަތްވާން ފުއްމާލީ މޫދަށެވެ. އެހެން ނަމަވެސް، ކޯސްޓުގާޑުން ގޮސް އެ މީހުން ސަލާމަތްކުރި އިރު އިންޑިއާއަށް ނިސްބަތްވާ އެ ބޯޓުގެ ފަޅުވެރިއަކު ވަނީ ގެއްލިފައެވެ. އޭނާއަށް ވީ ގޮތެއް ނޭނގެއެވެ.
އެމްއެންޑީއެފުން ބުނީ އޭނާ ހޯދުމަށް ކޯސްޓުގާޑުން ކުރިއަށް ގެންދިޔަ ސާޗް އޮޕަރޭޝަން 72 ގަޑިއިރަށްފަހު ވަނީ ހުއްޓައިލައިފައި ކަމަށެވެ. މި އޮޕަރޭޝަނުގައި ކަނޑާއި ވައިގެ މަގުން ޖުމުލަ 2،164 އަކަމީޓަރު ބަލައިފައިވާކަމަށް ވެސް އެމްއެންޑީއެފުން ބުނެއެވެ.
އާގަލާ ބޯޓުން ސަލާމަތްވި އެންމެން ވެސް ގެންދިޔައީ މ. މުއްޔަށެވެ. އެ އެންމެން ވެސް އެ ރަށަށް ގެންދިޔައިރު ވެސް ހާލު ރަނގަޅެވެ.
