މިހަފްތާގައި މެންޗެސްޓަރ ޔުނައިޓެޑް އަތުން ހޯދި ހަތް ލަނޑުގެ މޮޅަށްފަހުވެސް, ކުރިއަށް ނުދެވި ލިވަޕޫލް އަނެއްކާވެސް ބަލިވެއްޖެއެވެ.

ރަނގަޅު ފޯމެއްގައި އޮތް ވާދަވެރި މެންޗެސްޓަރ ޔުނައިޓެޑް އަތުން ހޯދި ސެވަން ސްޓާރ މޮޅަށްފަހު ލީގުގައި ދެން ކުޅުނު މެޗުގައި ބޯންމައުތު އަތުން ބަލިވީ ޕެނަލްޓީއެއްވެސް ލިބި, ބޭކާރުވުމަށްފަހުއެވެ. މެޗުން ލިވަޕޫލް ބަލިވީ 1-0ންނެވެ. މެޗުގައި ލިވަޕޫލު ކޮޅަށް ބޯންމައުތުން ލަނޑު ޖެހީ 28 ވަނަ މިނިޓްގައި ފިލިޕް ބިލިންގއެވެ. ގޯލް ޖެހިއިރު އޭނާހުރީ މާކް ނުކޮށް ދޫކޮށްލެވިފައެވެ. އޭގެފަހުން ދެވަނަ ހާފްގައި ލިވަޕޫލަށް ލިބުނު ޕެނަލްޓީ ނާކާމިޔާބުވީ ލީގުގައި ލިވަޕޫލްގެ ރެކޯޑް ސްކޯރަރ ސަލާހު އަތުންނެވެ. 69 ވަނަ މިނިޓްގައި ކަނާއަތްފަރާތުން މަތީ ކަނަށް ފޮނުވާލަން މަސައްކަތްކުރި ޕެނަލްޓީ ދިޔައީ ގޯލާ އަމާޒުނުވެއެވެ. ވީއޭއާރުން ބެލުމަށްފަހު ރެފްރީ ޕެނަލްޓީ ދިނީ ޖޮޓާ ބޮލުން ފޮނުވާލި ބޯޅަ އެޑަމް ސްމިތު އަތުގައި ޖެހުމުންނެވެ.

މިމޮޅާއެކު، ގަދަ ހަތަރެއްގެ ޖާގައެއް ހޯދަން ލިވަޕޫލަށް އުނދަގޫތައް ކުރިމަތިވެ, ބޯންމައުތު ވަނީ ރެލިގޭޝަން ޒޯނުން ކުރިއަށް ޖެހިލާފައެވެ. މޮޅާއެކު ބޯންމައުތު އޮތީ 24 ޕޮއިންޓާއެކު 16 ވަނާގައެވެ. ލިވަޕޫލް އޮތީ 42 ޕޮއިންޓާއެކު ފަސްވަނާގައެވެ.