އަމިއްލަ ޚިޔާލުގެ ތަނަވަސްކަމާއި، އަތުން ކުލަޖައްސާފައިވާ ވޫލް ރޮދި ބޭނުންކޮށްގެން ސަގާފީ ކުނާ ވިޔުމުގެ މަސައްކަތުގައި ލުތުފިއްޔާ މުހައްމަދު އުޅޭތާ މިހާރު ބައި ގަރުނަށްވުރެ ގިނަ ދުވަސްވެއްޖެއެވެ.

މިސުރުގެ ޖީޒާގެ ހައްރާނިޔާ އަވަށުގައި ހިންގާ ވިސާ ވާސިފް ސެންޓަރުގައި، ސަގާފީ ކުނާ ވިޔުމަށް ބޭނުންކުރަނީވެސް އެންމެ އިހުގައި އެކަން ކޮށް އުޅުނު ކަހަލަ އާލާތްތަކެވެ. ގުދުރަތީ އެކި މަންޒަރުތައް ދައްކުވައިދޭ ފަރުމާތަކަށް ވިޔެފައި ހުންނަ މި ކުނާތަކަކީ އެންމެ ޒަމާނީ ފެންވަރުގެ ކުނާތަކެކެވެ.

ވިސާ ވާސިފް ސެންޓަރަކީ މިހާރު މި ދުނިޔެ ދޫކޮށްފައިވާ، މިސުރުގެ ވިޜުއަލް އާރޓިސްޓެއް ކަމަށްވާ ރަމްސިސް ވިސާ ވާސިފް، 1950ގެ އަހަރުތަކުގެ ކުރީކޮޅު ހުޅުވި މަރުކަޒެކެވެ. އަމާޒަކަށް ވީ ފަންނުވެރިކަމުގެ ދާއިރާއިން އަންހެނުންނާއި ފިރިހެނުންނަށްވެސް އާމްދަނީއެއް ކަށަވަރު ކޮށްދިނުމެވެ.

ވިސާ ވާސިފް ސެންޓަރުގައި މިއަދު 27 މުވައްޒަފުން މަސައްކަތް ކުރަމުން ދާއިރު، އުމުރުން 68 އަހަރުގެ ލުތުފިއްޔާއަކީ އެތަނުގައި މިވަގުތު މަސައްކަތްކުރާ އެންމެ ދޮށީ އަންހެން މުވައްޒަފުވެސް މެއެވެ. ވިސާ ވާސިފް ސެންޓަރު އުފެއްދި ފަހުން މިއަދާ ހަމައަށް، ޓެކްސްޓައިލާގުޅޭ އަތްތެރި މަސައްކަތުގެ ހުނަރު ގިނަ ބަޔަކަށް ވަނީ ދަސްކޮށްދީފައެވެ.

މި ސެންޓަރު ހުންނަ ސަރަހައްދާ ގުޅިފައިވާ ބޮޑު ބަގީޗާއެއް އޮންނައިރު، އަތްތެރި މަސައްކަތުގެ އުފެއްދުންތަކުގެ ފަރުމާތަކަށް ޚިޔާލު ހޯދަނީ އެ ބަގީޗާ ތެރެއިން ފެންނަ މަންޒަރުތަކުންނެވެ.

މި ކުނާތަކުގެ މަސައްކަތް ނިންމާލަން ބައެއް ފަހަރު އަހަރެއްހާ ދުވަސްވެސް ހޭދަކޮށްފައި އެބަހުއްޓެވެ. އެންމެ އާދަޔާ ޚިލާފު ކަމަކީ، އެއް ފަރުމާއެއް ދެވަނަ ފަހަރަކަށް ތަކުރާރުކޮށްފައި ނުވާކަމެވެ.

ވިސާ ވާސިފް ސެންޓަރު ހިންގުމުގެ މަސައްކަތުގައި މި ވަގުތު އެންމެ އުސްކޮށް އުޅެނީ ރަމްސިސް ވިސާ ވާސިފްގެ 2 އަންހެން ދަރިންނެވެ. އެތަނުން އެކަކީ ސުޒޭން ވިސާ ވާސިފްއެވެ.

އެއްތަނަކަށް ޖަމާވެ، ފަންނުވެރި މަސައްކަތްތަކެއް ކުރަމުންދާ ދިއުމަކީ އަމިއްލަ މަސައްކަތާމެދު ފަޚްރުވެރި އިހުސާސެއް ގެނުވާ ކަމެއް ކަމަށް، ވިސާ ވާސިފް ސެންޓަރުގައި މަސައްކަތް ކުރަމުންދާ މީހުން ބުނެއެވެ. އަދި މިކަމަކީ އާދަޔާ ޚިލާފު، ތަފާތު އުފެއްދުންތައް އުފައްދަން ލިބިދޭ އިތުރު ހިތްވަރެއް ކަމަށްވެސް އެމީހުން ބުނެއެވެ.