ފުރަތަމަ ލެގުން ޔުވެންޓަސްއަށް ހަނި މޮޅެއް!
10 މާރިޗު 2023 | ހުކުރު 03:02ރޯމާވެސް ފުރަތަމަ ލެގުގެ މެޗު ކާމިޔާބުކުރި
ޔުވެންޓަސް މޮޅުކޮށްދިން ލަނޑު ޖެހުމަށްފަހު ޑި މާރިއާ
ޔޫރޮޕާ ލީގުގެ ގަދަ ސޯޅަ ޓީމް ބުރުގެ ފުރަތަމަ ލެގުން ޔުވެންޓަސް ހަނިމޮޅެއް ހޯދާ, ކުއާޓާއަށް ދިއުމުގެ ފުރުޞަތު ބޮޑުކޮށްފިއެވެ.
އަމިއްލަ ދަނޑުގައި ކުޅުނު ފުރަތަމަ ލެގުގައި ޔުވެންޓަސްއިން މޮޅެއް ހޯދީ ފްރެއިބާގާ ވާދަކޮށް 1-0 ން ކުރި ހޯދައިގެންނެވެ. މެޗުން ޔުވެންޓަސް މޮޅުކޮށްދިން ލަނޑު ޖެހީ ދުނިޔޭގެ ޗެމްޕިއަން އެންޚެލް ޑި މާރިއާއެވެ. ދެވަނަ ހާފްގެ ކުރީކޮޅު އޭނާ ޖެހި ލަނޑާއެކު ރަށުން ބޭރުގައި ކުޅޭ ދެވަނަ ލެގަށް ދާއިރު ޔުވެންޓަސްއަށް އެޑްވާންޓޭޖް އެބައޮތެވެ. ދެވަނަ ލެގު އަންނަ ބުރާސްފަތި ދުވަހު ކުޅޭނީ ޖަރަނީގައެވެ.
ޔުވެންޓަސްގެ އިތުރުން އިޓަލީގެ ރޯމާވެސް ވަނީ ފުރަތަމަ ލެގުން ކުރި ހޯދާފައެވެ. ރޯމާ ފުރަތަމަ ލެގުން ކުރި ހޯދީ ސްޕެއިންގެ ރެއާލް ސޮސިއެޑާޑް 2-0 ން ބަލިކޮށްގެންނެވެ. ދެވަނަ ލެގު ސްޕެއިންގައި ކުޅޭނީ ބުރާސްފަތި ދުވަހުއެވެ.
ޔުވެންޓަސްއިން މެޗު ކުޅުނީ މިޑްފީލްޑަރ ޕޮގްބާއަށް ފުރުޞަތު ނުދީއެވެ. އެއީ އަހުލާގީ މައްސަލައެއްގެ ސަބަބުންނެވެ.
