ތިން އަހަރުގެ މެދުކެނޑުމަކަށްފަހު އައިޓީބީ ފެއަރ ފަށައިފި
8 މާރިޗު 2023 | ބުދަ 02:11ރާއްޖޭގެ ފަތުރުވެރިކަމާއި ބެހޭ 82 ކުންފުންޏަކުން ފެއަރގައި ބައިވެރިވި
އައިޓީބީ ފެއަރގައި ރާއްޖޭގެ ސްޓޯލް
ތިން އަހަރުގެ މެދުކެނޑުމަކަށްފަހު އިންޓަނޭޝަނަލް ޓުއަރިޒަމް އެކްސްޗޭންޖް (އައިޓީބީ) ފެއަރ ޖަރުމަނުގައި ފަށައިފިއެވެ.
ފާއިތުވި ތިން އަހަރު މި ފެއަރ ބާއްވާފައިނުވަނީ ކޮވިޑުގެ ހާލަތާއި ގުޅިގެންނެވެ. ނަމަވެސް ފެއަރގެ ބައެއް ބައްދަލުވުންތައް މިދިޔަ އަހަރު އޮންލައިންކޮށް ކުރިއަށް ގެންގޮސްފައިވެއެވެ.
މިފަހަރުގެ ފެއަރގައި ރާއްޖެއިން ވެސް ބައިވެރިވެފައިވާއިރު 450 އަކަމީޓަރާއެކު، އެންމެ ބޮޑު ސްޓޭންޑްވެސް ހަދާފައިވަނީ ރާއްޖެއިންނެވެ. 2 ފަންގިފިލާގެ ސްޓޭންޑް ފަރުމާކޮށްފައިވަނީ ދިވެހިރާއްޖޭގެ ގުދުރަތީ ރީތިކަން ދައްކުވައިދޭ ގޮތަށެވެ.
މި އަހަރު އައިޓީބީ ފެއަރގަައި އެމްއެމްޕީއާރްސީ އިން ބަހައްޓާ ވިޒިޓް މޯލްޑިވްސްގެ ސްޓޯލްގައި ފަތުރުވެރިކަމާއި ބެހޭ 82 ކުންފުންޏަކުން 200ށް ވުރެ ގިނަ މީހުން ބައިވެރިވެއެވެ.
އައީޓީބީ ފެއަރ މިއަހަރު ކުރިއަށްދަނީ ޖަރުމަނުގެ "މެސީ ބަރލިން" ގައެވެ. މިއަހަރުގެ ފެއަރގައި 150ށްވުރެ ގިނަ ޤައުމުން، 5500ށްވުރެ ގިނަ އެގްޒިބިޓަރުން ބައިވެރިވެއެވެ.
މިފަހަރުގެ އައިޓީބީ ބަރލިން ފެއަރ 3 ދުވަހަށް ކުރިއަށްދާނެއެވެ. ފެއަރގެ ދެވަނަ ދުވަހު ރައީސުލްޖުމްހޫރިއްޔާ އިބްރާޙީމް މުޙައްމަދު ޞާލިޙު، ރާއްޖޭގެ ސްޓޭންޑަށް ޒިޔާރަތްކުރެއްވުމަށް ވަނީ ހަމަޖެހިފައެވެ.
