ލޯކަލް ކައުންސިލް އިންތިޚާބުގެ ކެނޑިޑެސީ ޤަބޫލުކުރުމާމެދު އިސްލާހެއް
7 މާރިޗު 2023 | އަންގާރަ 07:44ކޯޓަށް މައްސަލަ އެއް ހުށަހެޅުމުގައި އަމަލުކުރަން ވާނީ އިންތިޚާބުތަކައި ބެހޭ އާއްމު ޤާނޫނުގައި ބުނާ އިޖުރާއަތުތަކަށް
ލޯކަލް ކައުންސިލް އަދި އިންތިހާބުގެ ވޯޓު ލުން
ލޯކަލް ކައުންސިލް އިންތިޚާބުގެ ކެނޑިޑެސީ ޤަބޫލުކުރުމަށް ކަނޑައަޅާފައިވާ އުސޫލަށް ބަދަލު ގެނައުމަށް ޤާނޫނު އިސްލާހުކުރަން ހުށަހަޅައިފިއެވެ.
ސަރުކާރުގެ ފަރާތުން، ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލް ހުށަހަޅުއްވާފައިވާ، ޤާނޫނު ނަންބަރު 10/2010 (ލޯކަލް ކައުންސިލްތަކުގެ އިންތިޚާބުގެ ޤާނޫނު) އަށް އިޞްލާޙު ގެނައުމުގެ ބިލު ހުށަހަޅުއްވާފައި ވަނީ ހިތަދޫ ދެކުނު ދާއިރާގެ މެމްބަރު އިބްރާހިމް ނާޒިލް އެވެ. ނާޒިލް ވިދާޅުވީ އިންތިޚަބަށް ކުރިމަތިލާ ފަރާތްތަކުން އިންތިޚާބަށް ކުރިމަތިލުމަށް އެދި ހުށަހަޅާ ހުށަހެޅުން ޤަބޫލުކުރިކަން ނުވަތަ ނޫންކަން އެންގުމަށް އިންތިޚާބުތަކާއި ބެހޭ އާއްމު ޤާނޫނުގެ ދަށުން ކަނޑައަޅާ މުއްދަތު އެކަށީގެން ނުވާ ކަަމަށެވެ. އެ 48 ގަޑިއިރުގެ މުއްދަތަކީ ލޯކަލް ކައުންސިލް އިންތިޚާބުގައި އެކަން ކުރުމަށް އެކަށީގެންވާ މުއްދަތެއް ނޫންކަމަށާއި އެ މުއްދަތު 5 ދުވަހަށް އިތުރުކުރުމަށް ލޯކަލް ކައުންސިލްތަކުގެ އިންތިޚާބުގެ ޤާނޫނު އިސްލާހުކުރަން ހުށަހެޅީ އެ ސަބަބާއި ހުރެ ކަމަށް ވެސް ނާޒިލް ވިދާޅުވިއެވެ.
ނާޒިލް ހުށަހަޅުއްވާފައި ވަނީ ލޯކަލް ކައުންސިލްތަކުގެ އިންތިޚާބުގެ ޤާނޫނުގެ 15 ވަނަ މާއްދާގެ ފަހަތަށް މާއްދާއެއް އިތުރުކުރުމަށެވެ. އެ މާއްދާގައި ބުނެފައި ވަނީ ލޯކަލް ކައުންސިލްގެ އިންތިޚާބުގައި ވާދަކުރަން އެދޭ މީހުންގެ ކެނޑިޑެސީ އާއި މެދު ނިންމާ ގޮތެއް ގިނަ ވެގެން 5 ދުވަހުގެ ތެރޭގައި އެ ފަރާތަކަށް އަންގަން ވާނެ ކަމަށާއި އިލެކްޝަންސް ކޮމިޝަނުން އެ މީހަކަށް އެކަން އަންގަން ވާނީ ލިޔުމުން ކަމަށެވެ. އަދި އެފަދައިން އަންގާ އެންގުމަކާއި މެދު ހިތްހަމަ ނުޖެހޭ ފަރާތްތަކުން އެ މައްސަލަ ކޯޓަށް ހުށަހެޅުމުގައި އަމަލުކުރަން ވާނީ އިންތިޚާބުތަކައި ބެހޭ އާއްމު ޤާނޫނުގައި ބުނާ އިޖުރާއަތުތަކަށް ކަަމަށް ވެސް އެ އިސްލާހުގައި ވަނީ ބުނެފައެވެ.
އެ ޤާނޫނު ފާސް ވެއްޖެ ނަމަ އެއަށް އަމަލުކުރަން ފަށާނީ ޤާނޫނު ފާސްވެ، ތަސްދީގުކޮށް ދިވެހި ސަރުކާރުގެ ގެޒެޓްގައި ޝާއިއުކުރާ ތާރީހުން ފެށިގެންނެވެ.
