ކޯލިޝަން ހެދުމަށް މަޝްވަރާކުރުމުގެ ބާރު ގާސިމަށް އަރުވައިފި
6 މާރިޗު 2023 | ހޯމަ 11:22މި ނިންމުން ނިންމާފައިވަނީ ކޮންގްރެސްއަށް ހުށަހެޅި ގަރާރަކަށް ބާރުދީ
ޖުމްހޫރީ ޕާޓީގެ ލީޑަރު، ގާސިމް އިބްރާހީމް
ރިޔާސީ އިންތިޚާބަށް ކޯލިޝަނެއް ހަދަން ޖެހިއްޖެ ހިނދެއްގައި އެކަމުގެ މަޝްވަރާތައް ކުރުމުގެ ބާރާއި އިޚްތިޔާރު, ޖުމްހޫރީ ޕާޓީގެ ލީޑަރ ގާސިމް އިބްރާހީމަށް އެރުވުމަށް އެޕާޓީގެ ކައުންސިލުން ނިންމައިފިއެވެ.
މި ނިންމުން ނިންމާފައިވަނީ ހޯމަ ދުވަހު ބޭއްވި ޖުމްހޫރީ ޕާޓީގެ ކައުންސިލް ބައްދަލުވުމުގައެވެ.
އެޕާޓީން ބޭއްވި ގައުމީ ކޮންފަރެންސްއިން ވަނީ ޖުމްހޫރީ ޕާޓީ އިސްވެ އޮވެ، މިއަހަރު އޮންނަ ރިޔާސީ އިންތިޚާބުގައި ވާދަކުރަން ލަފާދޭން ނިންމާފައެވެ.
މި ގަރާރަށް ބާރުދީ މި ނިންމުން ނިންމާފައިވާއިރު، ޕާޓީގެ ހިންގުމުގެ އެންމެ އިސް ދައުރެއް އަދާކުރާ ފަރާތަކީ ޕާޓީގެ ލީޑަރު ކަމަށްވާތީ، ކޯލިޝަން ހަދަން ޖެހިއްޖެ ހިނދެއްގައި އެކަމުގެ މަޝްވަރާތައް ކުރުމުގެ ބާރާއި އިޚްތިޔާރު ޕާޓީގެ ލީޑަރަށް ދިނުމަށް ވަނީ ފާސްކޮށްފައެވެ.
މި ގަރާރު އެ ޕާޓީގެ ގައުމީ ކޮންފަރެންސަށް ހުށަހެޅުއްވީ ޕާޓީގެ ކައުންސިލް މެމްބަރު މުހައްމަދު ނާޒިލްއެވެ.
އެ ޕާޓީން ރިޔާސީ އިންތިޚާބުގައި ވާދަކުރާނެކަން ނުވަތަ ނޫންކަން އަދި އިއުލާނުކޮށްފައެއް ނުވެއެވެ.
