ނަވާރަ މިނެޓާއި ފަނަރަ ސިކުންތުން ރޭސް ނިންމައިގެން ޝަމްހާ އަށް ރެކޯޑެއް

އަންހެނުގެ ފަސް ކިލޯ މީޓަރު ދުވުމުގެ ރޭސް 19 މިނެޓާއި، 15 ސިކުންތުން ނިންމައިގެން ރާއްޖޭގެ ދުވުންތެރިޔާ ޝަމްހާ އަޙުމަދު ރެކޯޑު އައުކޮށްފި އެވެ.

ޝަމްހާ ރެކޯޑު އައު ކޮށްފައި ވަނީ ޖަރުމަނުގެ ލެވަކޫސަންގައި އާދިއްތަ ދުވަހު ކުރިއަށް ދިޔަ ރައުންޑް ދަ ބަޔަރ ކްރޮސްގައި ފަސް ކިލޯ މީޓަރު ދުވުމުންނެވެ. މީގެ ކުރިން ވެސް މި ރެކޯޑު އޮންނަނީ ޝަމްހާ އަތުގަ އެވެ. މިދިޔަ އަހަރުގެ ޖޫން މަހު އޮތް އީވީއެލް ހާފް މެރަތަންގައި ދުވެގެން ޝަމްހާ ރޭސް ނިންމާފައި ވަނީ 20 މިނެޓާއި އަށް ސިކުންތުންނެވެ. ޖަރުމަނުގައި ކުރިއަށް ދިޔަ ރޭސް 19 މިނެޓާއި، 15 ސިކުންތުން ނިންމައި ޝަމްހާ ރެކޯޑު އައު ކުރިއިރު، މިއީ ދިވެހި އަންހެން އެތުލީޓަކުން 20 މިނެޓަށް ވުރެ ކުރިން ރޭސް ނިންމި ފުރަތަމަ ފަހަރެވެ.

އެކަމާ ގުޅިގެން ޝަމްހާ ބުނީ، ޤައުމީ ރެކޯޑު އައު ކުރެވުމުން އޭނާ ވަރަށް އުފާވާ ކަމަށާއި، 20 މިނެޓަށް ވުރެ އަވަހަށް ރޭސް ނިންމި ފުރަތަމަ ދިވެހި އަންހެން ދުވުންތެރިޔާގެ ޝަރަފު ލިބުމުން ވެސް އުފާވާ ކަމަށެވެ. ޝަމްހާ ވަނީ އޭނާގެ ކޯޗު ނަސްރުﷲ އަޙުމަދު (ނަސްރު)ގެ އިތުރުން އާއިލާގެ ފަރާތުން ލިބުނު އެހީތެރިކަމާއި އެއްބާރުލުން ފާހަގަކޮށްފަ އެވެ.