ދިރާގު ރޯޑް ރޭސް މި މަހު ބާއްވަނީ

ދިރާގު މޯލްޑިވްސް ރޯޑް ރޭސް 24 ނޮވެމްބަރު 2017 ވާ ހުކުރު ދުވަހު ބާއްވާނެކަން ދިރާގުން އާންމުކޮށް އިއުލާން ކޮށްފިއެވެ. 5 ކިލޯ މީޓަރާއި 10 ކިލޯމީޓަރުގެ ދެ ކެޓަގަރީއަކުން ދުވުމަށް ހަމަޖެހިފައިވާ ރޭސް މިދިޔަ އަހަރެކޭ އެއްފަދައިން މިއަހަރު ވެސް ބޭއްވުމަށް ހަމަޖެހިފައިވަނީ ހުޅުމާލޭގައެވެ.

ރޯޑް ރޭސް ޖެހިޖެހިގެން ދިރާގުގެ ފަރާތުން ބާއްވާތާ މިއީ 11 ވަނައަހަރެވެ. އަދި ދިރާގު ރޯޑް ރޭހަކީ ހުރިހާ އުމުރު ފުރައަކަށް ހުޅުވާލައިގެން ކުރިއަށްގެންދާ އިވެންޓެކެވެ.

އަދި އެހެން އަހަރުތަކެކޭ އެއްފަދައިން މިއަހަރުގެ ރޭހުގެ ވެސް ޝިޔާރަކީ ކުޑަކުދިންގެ ހައްގުތައް ހިމާޔަތްކޮށް ރައްކާތެރިކުރުމުވެ. ކުޑަކުދިންގެ ހައްގުތައް ހިމާޔަތް ކުރުމުގެ މަސައްކަތުގައި އުޅޭ މަދަނީ އެކި ޖަމިއްޔާތަކާއި އެންޖީއޯތައް މިއިވެންޓުގައި ބައިވެރިވެ އިވެންޓުގައި ރަޖިސްޓްރީ ކުރުމަށް ހުޅުވާލާފައި ވަނީ ނޮވެމްބަރ މަހުގެ ދެވަނަ ދުވަހާއި ހަމައަށެވެ.

މިގޮތުން އެންމެ ގިނަ ދުވުންތެރިން ހިޔާރުކުރާ 5 ޖަމިއްޔާއަކަށް ޖުމްލަ 200،000 ރުފިޔާ ދިރާގުން ހަދިޔާ ކުރާނެއެވެ. މީގެ އިތުރުން ވެސް ރޭހުގައި ބައިވެރިވުމަށް ދުވުންތެރިން ގަންނަ ހާއްސަ ޓީޝާރޓުން ލިބޭ ފައިސާ ވެސް ޖަމިއްޔާތަކަށް ކުޑަކުދިންގެ ހައްގުގައި ހަދިޔާ ކުރުމަކަށް ވަނީ ނިންމާފައެވެ.

ދިރާގުގެ ފަރާތުން ބާއްވާ ރޯޑް ރޭހައަށް ގިނަ ބައެއްގެ ތަރުހީބު ވަނީ ފާއިތުވި އަހަރުތަކު ވެސް ލިބިފައެވެ.