އެމްއެމްއާރް ޑްރެގް ރޭސް ހުކުރު ދުވަހު ފަށަނީ!
27 ސެޕްޓެމްބަރު 2017 | ބުދަ 02:14މުބާރާތް ކުރިޔަށްދާނީ ހުކުރު އަދި ހޮނިހިރުގައި ހުޅުމާލޭގައި
އެމްއެމްއާރް ޑްރެގް ރޭސް އަށް ކުރިޔަށް ގެންދިޔަ ފަރިތަކުރުމުގެ ތެރެއިން
މޯލްޑިވްސް ރޭސިން އެސޯސިއޭޝަން އަދި ބީ ބްރޯސް މޮޓޯސް ގުޅިގެން ބާއްވާ އެމްއެމްއާރް ޑްރެގް ރޭސް ހުކުރު ދުވަހު ފަށާ ގޮތަށް ހަމަޖެހިއްޖެއެވެ.
ރާއްޖެއެމްވީ އަށް މައުލޫމާތު ދެމުން ބީ ބްރޯސް މޮޓޯސްގެ ފަރާތުން އިބްރާހިމް ނާއިފް ބުނީ، މިފަހަރުގެ މުބާރާތަކީ އެހެން ފަހަރުފަހަރަށްވުރެ ތަފާތު މުބާރާތެއް ކަމަށާއި، ކުރީގައި އާންމުކޮށް ޖަހަނީ ސާކިޓް ރޭސްކަމަށެވެ. އެހެންނަމަވެސް އޭނާ ބުނި މިފަހަރު ޖަހާނީ ޑްރެގް ރޭސް ކަމަށެވެ.
ނާއިފް ބުނީ މުބާރާތުގެ ސަލާމަތީކަންކަމަށް ވަރަށް ބޮޑަށް އިސްކަންދެވޭނެ ކަމަށާއި، އިންޓަނޭޝަނަލް ސޭފްޓީ ރެގިއުލޭޝަންގެ ދަށުން އިންތިޒާމުތަކެއް ހަމަޖައްސާފައިވާނެ ކަމަށެވެ.
ނާއިފް ބުނީ މިފަދަ މުބާރާތެއް ބޭއްވުމުގެ އެންމެ ބޮޑު މަގްސަދަކީ ރޭސްޖަހާ އެތްލީޓުން ހޭލުންތެރިކުރުވާ އެ އެތްލީޓުންނަށް ފުރުސަތުތަކެއް ހޯދައިދިނުމަށް ކަމަށެވެ. އެގޮތުން އޭނާ ބުނީ އަމާޒަކީ ސޭފްޓީއާ ނުލާ ބާރަށް ދުއްވާ ދުއްވުން ހުއްޓުވުން ކަމަށާއި، އެތްލީޓުން ހޭލުންތެރިކުރުވަން ކޮންމެ ހަފްތާބަންދަކުވެސް ހުޅުމާލޭގައި ފަރިތަކުރަން ފުރުސަތު ދޭނެ ކަމަށެވެ.
މުބާރާތެއް ބާއްވާއިރު، ރަނގަޅު ރޭސިން ޓްރެކެއް ނެތުން އެއީ ވަރަށް ބޮޑު ގޮންޖެހުމެއް ކަމަށާއި، ރޭސިން އަށް ޒުވާނުން ވަރަށް އިސްކަންދީ ލޯބިކުރާކަމަށްވެސް ނާއިފް ވަނީ ބުނެފައެވެ.
ހުކުރު ދުވަހުން ފެށިގެން ހޮނިހިރު ދުވަހުގެ ނިޔަލަށް ކުރިޔަށްދާ މި މުބާރާތް ކުރިޔަށްދާނީ ހުޅުމާލޭގައެވެ. މުބާރާތުގައި ހަމައެކަނި ހޮވާނީ އެއްވަނައެވެ.
