ގަރލް ގައިޑްސް އަދި ގަރލް ސްކައުޓުންނަށް ދޭ އެންމެ މަތީ ޝަރަފް ރައީސްގެ އަނބިކަނބަލުންނަށް އަރުވައިފި
4 މާރިޗު 2023 | ހޮނިހިރު 17:40މިއީ ރާއްޖޭގެ ފަރާތަކަށް މިއެވޯޑް އެރުވުނު ފުރަތަމަ ފަހަރު
ޗީފް ގައިޑް އަދި ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަހުމަދު
ވޯލްޑް އެސޯސިއޭޝަން އޮފް ގަރލްގައިޑްސް އެންޑް ގާރލް ސްކައުޓްސްގެ އޭޝިއާ ޕެސިފިކް ރީޖަންއިން ގައުމުތަކުގައި ގާރލްގައިޑް ހަރަކާތް ކުރިއެރުވުމަށް މަސައްކަތްކުރައްވާ ވަކި ފަރުދުންނަށް ދެވޭ އެންމެމަތީ ޝަރަފުވެރި އެވޯޑު ޗީފް ގައިޑް އަދި ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަޙްމަދަށް އަރުވައިފިއެވެ.
އެކަމަނާއަށް މިއެވޯޑު އަރުވާފައި ވަނީ، ކަސްޓަމްސް ބިލްޑިންގ، މީރުބަހުރު މާލަމުގައި ބޭއްވި، މޯލްޑިވްސް ގާލްގައިޑް އެސޯސިއޭޝަނުގެ 2022 ވަނަ އަހަރުގެ، އަހަރީ ޢާންމު ޖަލްސާގައެވެ.
މިއެވޯޑަކީ، ރައީސުލްޖުމްހޫރިއްޔާގެ އަނބިކަނބަލުން ގަރލް ގައިޑް ހަރަކާތަށް ކޮށްދެއްވާފައިވާ އަގުހުރި ޚިދުމަތްތައް ފާހަގަކޮށް އެކަމުގެ އަގުވަޒަންކުރައްވައި، އޭޝިއާ ޕެސިފިކް ރީޖަނަލް އެވޯޑުގެ އިންޑިވިޖުއަލް ކެޓަގަރީން އެކަމަނާއަށް އަރުވާފައިވާ އެވޯޑެކެވެ. މިއީ ރާއްޖޭގެ ފަރާތަކަށް މިއެވޯޑް އެރުވުނު ފުރަތަމަ ފަހަރެވެ.
ދިވެހިރާއްޖޭގެ ރައީސުލްޖުމްހޫރިއްޔާގެ އަނބިކަނބަލުން އަދި ދިވެހި ރާއްޖޭގެ ގާރލް ގައިޑްސް އެސޯސިއޭޝަންގެ ޗީފް ގައިޑް ފަޒްނާ އަހްމަދަކީ ގައިޑިން ޙަރަކާތުގެ ދަންމަރު ފެތުރުމުގައި ވަރަށް އިސް ދައުރެއް އަދާކުރައްވަމުންދާ ބޭކަނބަލެކެވެ. ޗީފް ގައިޑުގެ މަޤާމާއި ޙަވާލުވެލެއްވުމުގެ ކުރިން، ސްކޫލު ދައުރުގައި އެކަމަނާއަކީ ގާރލް ގައިޑެކެވެ.
އަދި ވޯރލްޑް އެސޯސިއޭޝަނުން ރާވާ ހިންގާ ހޭލުންތެރި ކުރުވުމުގެ ޕްރޮގްރާމް Voices Against Violenceގެ ފެސިލިޓޭޓަރެކެވެ. ހޭލުންތެރި ކުރުވުމުގެ ތަފާތު ޙަރަކާތްތަކުގައި އަދި އެޑްވޮކަސީ ކަންކަމުގައި ވަރުބަލި ކަމެއްނެތި ދަރުމަވެރިއެއްގެ ލާމަސީލު ނަމޫނާއެކެވެ. ކޮވިޑް-19ގައި ޗީފް ގައިޑުގެގޮތުގައި ދެއްކެވި ހިތްވަރުން އެތައް ބަޔަކަށް ސާބިތުކަން ލިއްބައިދިނެވެ.
ކޮވިޑްގެ ބަލިމަޑުކަމުގެ ތެރޭގައި އެކަމަނާ ފުރަތަމަ ޞަފުގައި މަސައްކަތް ކުރައްވާފާއިވެއެވެ. މީގެ އިތުރުން ތަފާތު ކާރިޘާތަކުން އަރައިގަތުމަށް ކުރެއްވި މަސައްކަތުގައި ބައިވެރިވެ ވަޑައިގެން، ބައިނަލް އަޤްވާމީ މުޖްތަމަޢުގައި، ދުނިޔޭގެ ލީޑަރުންގެ ފަންތީގައި ދިވެހި ރަޢްޖޭގެ ގާރލް ގައިޑްސް އެސޯސިއޭޝަން ތަމްސީލުކޮށްދެއްވާ، ކުދިންގެ އަޑު އުފުލާދެއްވަމުން ގެންދަވާފައިވެއެވެ.
މީގެ އިތުރުން ގާލްގައިޑް އެސޯސިއޭޝަނުން ކުރާ ކޮންމެ މަސައްކަތެއް، ވަރަށް ގާތުން ބައްލަވަމުން އަދި ބައިވެރިވަމުން ގެންދަވައެވެ. ކ. ޤުރައިދޫގައި ހުންނަ ޚާއްޞަ އެހީއަށް ބޭނުންވާ ބޭފުޅުން ތިއްބަވާ މަރުކަޒަށް، ޢީދު ފާހަގަކުރުމަށްޓަކައި ޗީފް ގައިޑުގެ ގޮތުގައި ބައިވެރިވަމުންދެއެވެ. އަދި ހަމައެހެންމެ، ކުދިންނާ ބައްދަލުވާ ކޮންމެ ހިނދެއްގައި ދެއްވާ ތަރުޙީބާއި ދެއްވާ ހިތްވަރުގެ ބަސްތަކަކީ ކުދިންގެ މުސްތަޤުބަލަށް ދެއްވާ ނުހަނު އަގުހުރި ހަދިޔާއެކެވެ.
މީގެ އިތުރުން މިޖަލްސާގައި ވަނީ، ހިލޭ ސާބަހަށް މަސައްކަތްކުރުމުގެ ކެޓަގަރީން، އޭޝިއާ ޕެސިފިކް ރީޖަން އެޕްރިސިއޭޝަން އެވޯޑް 5 ފަރާތަކަށް، އަދި އޭޝިއާ ޕެސިފިކް ރީޖަން އެޕްރިސިއޭޝަން އެވޯޑް 4 އޮގަނައިޒޭޝަނަކަށް ދެއްވާފައެވެ.
މި ޖަލްސާގައި ވޮރަންޓް ސެޓްފިކެޓް ލިބުނު ފަރާތްތަކަށް ސެޓްފިކެޓް ހަވާލުކޮށްދެއްވީ، ޗީފް ގައިޑް އަދި ރައީސުލްޖުމްހޫރިއްޔާގެ އަނބިކަނބަލުންނެވެ. މީގެ އިތުރުން މިޖަލްސާގައި، ކޮމިޝަނަރ ސެޓްފިކެޓާއި ޚިދުމަތުގެ އެވޯޑް އަދި ގަރލް ގައިޑް އެސޯސިއޭޝަންގެ އެޕްރިސިއޭޝަން އެވޯޑު ލިބުނު ފަރާތްތަކަށް އެވޯޑު ހަވާލުކޮށްދެއްވީ، ޗީފް ކޮމިޝަނަރ ނިޢުމާތު ޝަފީޤެވެ.
މިޖަލްސާގައި، 5 އަހަރާއި 30 އަހަރާއި ދެމެދުގެ މުއްދަތެއްގައި ޚިދުމަތްކޮށްދެއްވާފައިވާ، 75 ފަރާތަކަށާއި، މޯލްޑިވްސް ގަރލް ގައިޑް އެސޯސިއޭޝަންގެ އެޕްރިސިއޭޝަން އެވޯޑު ޙާސިލްކުރި 2 ފަރާތަކަށް ވަނީ އެވޯޑް ޙަވާލުކޮށްދެއްވާފައެވެ.
މިޖަލްސާގައި 2022 ވަނަ އަހަރުގެ އަހަރީ ޢާންމު ޖަލްސާގެ ޔައުމިއްޔާ ފާސްކުރުމާއި އަހަރީ ރިޕޯޓާއި ފައިނޭންޝަލް ރިޕޯޓް އިއްވައި ފާސްކުރުންވެސް އޮތެވެ.
