"ކޯބްރާ ގޯލްޑް" އަނެއްކާވެސް ބާރު ދުވެލީގައި ކުރިއަށް!

ކޯބްރާ ގޯލްޑްއޭ ދެންނެވުމުން ފަހަރުގައި އެއީ އާ ނަމަކަށް ވެދާނެއެވެ. އަދި އަސްލު މާނަ އޮޅުންވެސް އެކަށީގެންވެއެވެ. ފަހަރެއްގައިވެސް ދަންވަން މިއުޅެނީ ރަން ހަރުފައެއްގެ ވާހަކައެއް ނޫނެވެ. ނަމަވެސް، ހަމަ، އެފަދަ ވަރުގަދަ ކަމެއްގެ ވާހަކައެވެ. ކޯބްރާ ގޯލްޑްއަކީ، އޭޝިއާ ސަރަހައްދުގައި ހިންގާ އެންމެ ވަރުގަދަ އަސްކަރީ ތަމްރީނު ޕްރޮގްރާމެކެވެ. މުޅި ދުނިޔެ އިނދަޖައްސާލި ކޮރޯނާވައިރަސް ޑިސީޒް (ކޮވިޑް-19)ގެ ބަލިމަޑުކަމާ ގުޅިގެން 2 އަހަރު ދުވަހަށް މެދުކަނޑާލާފައި އޮތުމަށްފަހު، މި ހިނގާ ހަފުތާ ބަންދަކީ، އެންމެ ފޯރީގައި އަނެއްކާވެސް ކޯބްރާ ގޯލްޑް އަސްކަރީ ތަމްރީނުތައް، އޭގެ އެންމެ ފުލް ގިއަރުގައި ފަށައިގެން ކުރިއަށް ގެންދާ ހަފުތާ ބަންދެކެވެ.

ކޯބްރާ ގޯލްޑް އަސްކަރީ ތަމްރީނުތަކުގެ މި އަހަރުގެ ތަމްރީނު ފަށާފައިވަނީ ފެބުރުއަރީ 28 ވީ އަންގާރަ ދުވަހުއެވެ. ތަމްރީނުތަކުގެ މަރުކަޒަކީ ތައިލޭންޑްއެވެ. މާޗް 10 ވަނަ ދުވަހާ ހަމައަށް ތަމްރީނުތައް ރާވާލާފައިވާއިރު، ޔޫއެސް މެރީންސްއާއެކު މީޑިއާ އޮޕަރޭޝަންސް އޮފިސަރެއްގެ ގޮތުގައި މަސައްކަތްކުރައްވާ ކެޕްޓަން ޖޮނަތަން ކޮރޯނެލް ވިދާޅުވާ ގޮތުގައި، މިއީ ބައިވެރިންނާއެކު މިހާ ފުޅާ ދާއިރާއެއްގައި އަސްކަރީ ތަމްރީނުތައް ކުރިއަށް ގެންދިއުމަށް ލިބުނު ރަނގަޅު ފުރުސަތެކެވެ.

ހަނގުރާމަމަތީ ކުޅިގަނޑެއް ސިފަވެގެންދާގޮތަށް ފަރުމާކޮށްފައިވާ ކޯބްރާ ގޯލްޑް އަސްކަރީ ތަމްރީނުތައް އެންމެ ފުރަތަމަ ކުރިއަށް ގެންދިޔައީ 1982 ވަނަ އަހަރުއެވެ. މި ތަމްރީނުތަކުގައި 30 ގައުމަކުން، އަސްކަރީ ސިފައިން ބައިވެރިވެއެވެ. ކޯބްރާ ގޯލްޑްއަކީ މުޅި ދުނިޔޭގެ ނިސްބަތުން ބަލާއިރުވެސް ގިނަ ގައުމުތަކަކުން ބައިވެރިވެގެން މިހާތަނަށް، އެންމެ ދިގު މުއްދަތަކަށް ކުރިއަށްގެންދިޔަ އަސްކަރީ ތަމްރީނެވެ. ދެކުނު އިރުމަތީ އޭޝިއާ ސަރަހައްދުގެ އެންމެ ބޮޑު އަސްކަރީ ތަމްރީނުވެސްމެއެވެ.

މިއީ ދުނިޔޭގެ އެންމެ ވަރުގަދަ އަސްކަރީ ބާރުތަކުގެ ތެރޭގައި ގުނާލެވޭ އެމެރިކާގެ ސަރުކާރަށް، އޭޝިއާގެ ބައިވެރިންނާ ގުޅުން ބަދަހިކޮށް، ވާދަވެރި ޗައިނާގެ މައްޗަށް އިތުރަށް ފާރަވެރިވުމަށްވެސް ލިބިގެންދާ ރަނުގެ ފުރުސަތަކަށް އޮންނަނީ ވެފައެވެ.

ތައިލޭންޑްގައި މިހާރު ކުރިއަށްދާ ކޯބްރާ ގޯލްޑް އަސްކަރީ ތަމްރީނުގައި، 30 ގައުމަކުން 7394 ސިފައިން ބައިވެރިވާކަމަށް މައުލޫމާތު ލިބެއެވެ. ކޯބްރާ ގޯލްޑްއަކީ، 2004 ވަނަ އަހަރު އޭޝިއާ ސަރަހައްދަށް ކުރިމަތިވި ސުނާމީ ކާރިސާގައި، ރޭވުންތެރިކަމާއެކު އަސްކަރީ އެހީތެރިކަން ކުރިއަށް ގެންދިއުމަށް ލިބުނު އެއް ލުއިފަސޭހައެވެ.