މާޒިޔާ ދޫކޮށް، އަސަދުﷲ އެހެން ކުލަބަކަށް
4 މާރިޗު 2023 | ހޮނިހިރު 08:19އަސަދުﷲ އެހެން ކުލަބަކަށް ބަދަލުވަނީ 11 އަހަރު ދުވަސް ވަންދެން މާޒިޔާއަށް ކުޅުމަށްފަހު
މާޒިޔާއަށް ކުޅެމުން އައި އަސަދުﷲ
މާޒިޔާ ސްޕޯޓްސް އެންޑް ރެކްރިއޭޝަން ކުލަބް ދޫކޮށް، އަސަދުﷲ އަބްދުﷲ އެހެން ކުލަބަށް ބަދަލުވާން ނިންމައިފިއެވެ.
އައު ސީޒަނަށް ތައްޔާރުވުމުގެ ގޮތުން މާޒިޔާއިން ވަނީ ގިނަ ކުޅުންތެރިންގެ އެއްބަސްވުން އައުކޮށް، އެހެން ކުޅުންތެރިންގެ ސޮއިވެސް ހޯދާފައެވެ. ރާއްޖެއެމްވީއާ ވާހަކަދައްކަމުން، މާޒިޔާގެ ކެޕްޓަން ބޭންޑު އަޅައިގެން ކުޅެފައިވާ އަސަދުﷲ ބުނީ، މިހާރު މާޒިޔާ ދޫކޮށްލަން ނިންމާފައިވާކަމަށެވެ. އޭނާ ބުނީ ކުރިއަށް އޮތް ސީޒަނުގައި މާޒިޔާއިން ނުފެންނާނެ ކަމަށާއި، ދެން ފެންނާނީ އެހެން ކުލަބަކުން ކަމަށެވެ. އޭނާ ބުނީ ދެންވެސް ފެންނާނީ ފުރަތަމަ ޑިވިޝަންގެ ކުލަބަކުން ކަމަށެވެ. އެއީ ކޮން ކުލަބެއް ކަމެެއް އަސަދުﷲ ބުނެފައެއް ނުވެއެވެ.
އަސަދުﷲ އެހެން ކުލަބަކަށް ބަދަލުވަނީ 11 އަހަރު ދުވަސް ވަންދެން މާޒިޔާއަށް ކުޅުމަށްފަހުއެވެ. ގައުމީ ޓީމުގައިވެސް ހިމެނިގެން ކުޅެމުން އަންނަ އަސަދުﷲ ވަނީ މާޒިޔާއާއެކުވެސް ގިނަ ކާމިޔާބީތަކެއް ހޯދާފައެވެ. އަސަދުﷲ ހޯދުމުގެ ޝައުގުވެރިކަން ފުރަތަމަ ޑިވިޝަންގެ ކުލަބުތަކުން ގެންގުޅޭއިރު، އެނގިފައިވާ ގޮތުން ވެލެންސިއާއިން އަންނަނީ އަސަދުﷲ އެ ކުލަބަށް ގެންދިޔުމުގެ މަޝްވަރާތައް ކުރަމުންނެވެ.
