ވަނުއާޓޫއަށް 2 ތުފާނަކާއި ބިންހެލުމެއް އައުމާއި ގުޅިގެން ސްޓޭޓް އޮފް އިމަރޖެންސީ އިއުލާނުކޮށްފި

ދެކުނު ޕެސިފިކްގެ ޖަޒީރާ ގައުމެއް ކަމަށްވާ ވަނުއާޓޫ އަށް ފާއިތުވި ތިން ދުވަހުގެތެރޭގައި 2 ތޫފާނަކާއި ބިންހެލުމެއް އައުމާއި ގުޅިގެން އެގައުމުގައި ސްޓޭޓް އޮފް އިމަރޖެންސީ އިއުލާނުކޮށްފިއެވެ. ތިންލައްކަ މީހުންގެ އާބާދީއެއް އޮންނަ ވަނުއާޓޫ އަށް 6.5 ގެ ބާރުމިނުގައި ހުކުރު ދުވަހު ބިންހެލުން އައީ ބުދަ ދުވަހު ޖޫޑީގެ ނަމުން ނަން ދީފައިވާ ކެޓަގަރީ 4 ގެ ތޫފާން އެރުމުގެ ސަބަބުން ބޮޑެތި ގެއްލުންތަކެއް ލިބިފައި ވަނިކޮށެވެ. ތޫފާނުގައި މީހަކަށް ގެއްލުމެއް ލިބިފައިވާ ކަމުގެ ޚަބަރު ލިބިފައި ނުވި ނަމަވެސް މަގުތަކާ ބައެއް އިމާރާތްތަކަށް ބޮޑެތި ގެއްލުންތަކެއް ވަނީ ލިބިފައެވެ. މިގޮތުން ވަނުއާޓޫ ސެންޓްރަލް ހޮސްޕިޓަލުގެ ކުޑަކުދިންގެ ވޯޑެއްގެ ފުރާޅު ވެސް އެއްލާލާފައިވާ ކަމަށް ޚަބަރު ލިބެއެވެ. މީގެ އިތުރުން މަގުތަކުގައި ފެންބޮޑުވެ ގިނަ އަދަދެއްގެ ރުއްގަސް ވެއްޓިފައިވާ ކަމަށް ވެސް ޚަބަރުލިބެއެވެ.  

ތޫފާން ޖޫޑީގެ ފަހުން ކެޓަގަރީ 3 ގެ ތޫފާނެއްކަމަށްވާ ތޫފާން ކެވިން ވެސް ވަނީ ހުކުރު ދުވަހު ހެދުނު އެ ގައުމަށް އަރާފައެވެ. މިތޫފާނުގައި ވެސް ގަޑިއަކު 130 ކިލޯމީޓަރު ބާރު މިނުގައި ވައިޖެހިފައިވެއެވެ.

މި ކާރިސާތަކަށް ފަހު ގިނަ އަދަދެއްގެ ބަޔަކު ވަނީ އިވެކުއޭޝަން ސެންޓަރުތަކަށް ޖަމާވާން ފަށާފައެވެ. އެހީގެ މަސައްކަތުގައި ހަރަކާތްތެރިވާ ފަރާތްތަކުން ބުނެފައިވާ ގޮތުގައި ކުރިމަތިވެފައި މިވަނީ މީގެ ކުރިން ދިމާވެފައި ނުވާފަދަ ހާލަތެކެވެ.

ވަނުއާޓޫއަކީ އާންމުކޮށް ގުދުރަތީ ކާރިސާތަކާ ކުރިމަތިލާންޖެހޭ ގައުމެއް ނަމަވެސް މިގޮތަށް ގާތްގާތުގައި ދެތޫފާނަކާ އަދި ބިންހެލުމެއް އައުމަކީ މީގެ ކުރިން ދިމާވެފައިނުވާ ހާލަތެކެވެ.

ކާރިސާތަކާ ގުޅިގެން ވަނުއާޓޫ އިން ވަނީ އަވަށްޓެރި ގައުމުތަކުގެ އެހީއަށް އެދި ގޮވާލާފައެވެ. މިއާއެކު އޮސްޓްރޭލިޔާ އިން ވަނީ ބޯފެނާއި ބޭސް އަދި ލިބުނު ގެއްލުން ބަލާދޭނެ ޓީމްތައް ފޮނުވާނެ ކަމަށް ބުނެފައެވެ.  

ނިއުޒިލަންޑުން ވެސް އެހީވާނެ ކަމަށް ވަނީ ބުނެފައެވެ.

މިކާރިސާތަކާ ގުޅިގެން ވަނުއާޓޫގެ ބޮޑުވަޒީރު އިސްމާއިލް ކަލަސަކައު ވިދާޅުވީ ވަނުއާޓޫއަކީ ކެތްތެރި ރައްޔިތުންތަކެއް އުޅޭ ގައުމެއްކަމަށާއި މިކަމުން ވެސް އެންމެން ގުޅިގެން އަރައިގަންނާނެ ކަމުގައެވެ.