ބާސެލޯނާ އަށް ޓްރާންސްފާ ސަސްޕެންޝަނެއް؟

ކުރިއަށް އޮތް ޓްރާންސްފާ މާކެޓުގައި ބާސެލޯނާއަށް އައު ކުޅުންތެރިން ރަޖިސްޓްރީ ނުކުރެވޭ ގޮތް ހަދަން ޖެހިދާނެ ކަމަށް ސްޕެނިޝް ލީގުން ބުނެފި އެވެ.

ކޮންމެ އަހަރަކު ވެސް ބާއްވާ ފުޓްބޯޅަ ސަމިޓްގައި ވާހަކަ ދައްކަމުން ލަލީގާގެ ރައީސް ހާވިއާ ޓަބޭސް ވަނީ މިކަން އިއުލާނުކޮށްފަ އެވެ.

އޭނާ ބުނީ ބާސެލޯނާގެ ރައީސް ކަމަށް ހުއާން ލަޕޯޓާ މީގެ ދެ އަހަރު ކުރިން އައިރު މާލީ ހާލަތު އޮތީ ވަރަށް ގޯސްކޮށް ކަމަށާއި ކުރިމަގުގެ ޓީވީ ރައިޓްސް ވިއްކާލައިގެން ބާސެލޯނާ މަސައްކަތް ކުރަނީ އެ ފައިސާ އިއާދަކުރުމަށް ކުލަބުގެ ހަރމުދާ މޯގޭޖްކުރަމުން ކަމަށެވެ. އަދި މިހުރިހާ ކަމެއް ކޮށްގެން ވެސް ކުޅުންތެރިންގެ މުސާރައިން ބާސެލޯނާއަށް ސަލާމަތް ކުރެވުނީ އެންމެ 200 މިލިއަން ޔޫރޯ ކަމަށެވެ.

އޭނާ މިފަދައިން ވާހަކަ ދެއްކިއިރު މީގެ ދެ ސީޒަން ކުރިން ލަލީގާއިން ތައާރަފްކުރި ސީވީސީ ޑީލްގައި ސޮއިނުކުރި ތިން ކުލަބުގެ ތެރޭގައި ބާސެލޯނާ ހިމެނުމުން އެކުލަބާއި ސްޕެނިޝް ލީގާ ދެމެދު ދަނީ ސީރިއަސް ބަހުގެ ހަމަލާތަކެއް ބަދަލުކުރަމުންނެވެ. ހާއްސަކޮށް ކުލަބުގެ ރައީސް ކަމަށް ލަޕޯޓާ އައިފަހުންނެވެ. އޭނާ ތުހުމަތުކުރާގޮތުގައި ލަލީގާއިން ގެންގުޅޭ މާލީ އުސޫލުތައް މާބޮޑަށް ހަރުކަށިވެފައި އެލީގުން ދަނީ ބާސެލޯނާއަށް ޖެއްސުން ކުރަމުންނެވެ.

ކުޅުންތެރިން ނުގަނެވޭނެ ގޮތަށް ބާސެލޯނާ ސަސްޕެންޑްކުރަން ޖެހިދާނެ ކަމުގެ އިންޒާރު ލަލީގާއިން ދީފައިވަނީ ބާސެލޯނާގެ ކުރީގެ ކެޕްޓަން އަދި ދުނިޔޭގެ އެންމެ މޮޅު ކުޅުންތެރިޔާ ލަޔޮނަލް މެސީ އަންނަ ސީޒަނުގައި އަލުން އަނބުރާ ގެނައުމަށް ބާސެލޯނާ ތައްޔާރުވާން ފަށާފައިވަނިކޮށެވެ.