ރެއާލް މެޗަށްފަހު ޒަވީގެ ތައުރީފު ކޫންޑޭ އާއި އަރައުހޯ އަށް

ބާސެލޯނާ އަށް ކުޅެމުން އަންނަ ފްރާންސްގެ ޖޫލްސް ކޫންޑޭ އާއި އުރުގުއޭގެ ރޮނާލްޑް އަރައުހޯ އަށް އެ ޓީމުގެ ކޯޗު ޒަވީ ހެނާންޑޭޒް ތައުރީފުކޮށްފަ އެވެ.

ކޮޕަ ޑެލް ރޭގެ ސެމީ ފައިނަލްގެ ފުރަތަމަ ލެގުގައި ބާސެލޯނާ އިން ވާދަވެރި ރެއާލް މެޑްރިޑު ބަލި ކުރި މެޗުގައި އެ ދެ ޑިފެންޑަރުން ވަނީ މޮޅަށް ކުޅެފަ އެވެ. މެޗަށްފަހު ވާހަކަ ދައްކަމުން ޒަވީ ބުނީ، ރެއާލްގެ ވިނީޝިއަސް ޖޫނިއާ އާންމު ގޮތެއްގައި ކޮންމެ މެޗެއްގައި ހައެއް ނުވަތަ ހަތް ވަރަކަށް ފުރުސަތު ހޯދާ ކަމަށެވެ. ނަމަވެސް ބާސެލޯނާއާ ދެކޮޅަށް ކުޅުނު މެޗުގައި އެންމެ ފުރުސަތެއް ވެސް ހޯދިފައި ނުވާކަމަށް ޒަވީ ބުންޏެވެ. އޭނާ ބުނީ ބާސެލޯނާ އިން ކުޅުނީ އެންމެ ފަހުން ޔޫރަޕުގެ ޗެމްޕިއަންކަން ހޯދާފައިވާ ޓީމާ ދެކޮޅަށް ކަމަށާއި، އެ މެޗުގައި ކުޅުންތެރިން މޮޅު ކުޅުމެއް ދެއްކި ކަމަށެވެ. އެކަން ފާހަގަ ކުރަމުން ޒަވީ ބުނީ ހުރިހާ ކްރެޑިޓެއް ހައްގު ވަނީ ކުޅުންތެރިންނަށް ކަމަށެވެ.

މީގެ އިތުރުން ޒަވީ ބުނީ އޭނާ އަށް ޤަބޫލު ކުރެވޭ ގޮތުގައި އަރައުހޯ އަކީ ދުނިޔޭގައި ހުރި އެންމެ މޮޅު އެއް ޑިފެންޑަރު ކަމަށާއި، އޭގެ ތެރޭގައި ކޫންޑޭ ވެސް ހިމެނޭނެ ކަމަށެވެ. މީގެ އިތުރުން ވެސް ބާސެލޯނާގެ ޑިފެންސްގައި ތިބި މާކޯސް އަލޮންސޯ އާއި އަލެހާންޑްރޯ ބާލްޑޭގެ ނަން ވެސް ޒަވީ ވަނީ ފާހަގަކޮށްފަ އެވެ. އޭނާ ބުނީ މެޗުގައި ބާސެލޯނާގެ ކުޅުންތެރިން ބޯޅައާއެކު ކުޅުނު ކުޅުމާ މެދު އެންމެ ބޮޑު ހިތްހަމަ ޖެހުމެއް ނެތް ނަމަވެސް، މެޗުގައި ޓީމުން ދެއްކި އެހެން ކަންކަމުގެ ސަބަބުން އޭނާ އަށް ހިތްހަމަ ޖެހުން އޮތް ކަމަށެވެ. ފުރަތަމަ ލެގު ކާމިޔާބުކޮށް، ދެ ވަނަ ލެގު އަމިއްލަ ދަނޑުގައި ކުޅެން ޖެހުނު ނަމަވެސް ޒަވީ ޤަބޫލު ކުރާ ގޮތުގައި އަދިވެސް ފޭވަރިޓުންނަކީ ރެއާލް އެވެ. އޭނާ ބުނީ ކުރިއަށް އޮތް ތަނުގައި ލީގު ވެސް ވާދަވެރި ވާނެ ކަމަށާއި، ނަމަވެސް ދެ ވަނަ ލެގަށް ތައްޔާރު ވާނީ ފުރިހަމަ އަށް ކަމަށެވެ.

ޒަވީ ވަނީ ބާސެލޯނާ އިން ޓީމެއްގެ ގޮތުގައި މަސައްކަތްކޮށްފި ނަމަ އެންމެ ބޭނުންވާ ކާމިޔާބަށް ދެވޭނެ ކަމަށް ވެސް ބުނެފަ އެވެ.