އަޅުގަނޑުމެން ތަރައްގީ ގެންނަނީ ކޮންމެ 5 އަހަރަކުން އޮންނަ އިންތިހާބަކަށް ނޫން - ރައީސް
ކޮންމެ 5 އަހަރަކުން ތަރައްގީ ގެންނާތީ އާމްދަނީއާ އެއްވަރަށް ރާއްޖެ ތަރައްގީވެފައި ނެތް
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ހިރިލަންދޫ އައު އޮފީސް ހުޅުވުމުގެ ރަސްމިއްޔާތުގައި ވާހަކަފުޅުދައްކަވަނީ
އެމަނިކުފާނުގެ ސަރުކާރުން ތަރައްގީ ގެންނަނީ ކޮންމެ 5 އަހަރަކުން އަންނަ ރިޔާސީ އިންތިހާބަކަށް ނޫން ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ތ. ހިރިލަންދޫ ފެނަކަ އައު އޮފީސް ހުޅުވުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ. ރައީސް ވަނީ ހިރިލަންދޫ ރައްޔިތުންގެ ފަރާތުން އެމަނިކުފާނަށް ދެންނެވި މަރުހަބާއަށް ޝުކުރު އަދާކުރައްވާފައެވެ. ރައީސް ވިދާޅުވީ އެމަނިކުފާނާއި އަދި އަރިހުގައި ވަޑައިގެންނެވި ބޭފުޅުންނަށް ދެންނެވި މަރުހަބާއިން ފެނިވަޑައިގަތީ ހިރިލަންދޫ ރައްޔިތުން އެތައް ޒަމާނެއް ވަންދެން ދެކެމުން އައި ހުވަފެން ހަގީގަތަކަށް ވަމުން އަންނާތަން ކަމަށެވެ.
ރައީސް ވިދާޅުވީ ރަށްރަށުގައި ހުރި އަސާސީ ހިދުމަތްތަކުގެ ތެރެއިން ޒަރޫރީ ހިދުމަތްތަކަށް ބޭނުންވެފައި ހުރި އެތައް ކަމެއް ހުރީ ނުކުރެވި ފުނި ޖެހިފައި ކަމަށެވެ. 2018 ވަނަ އަހަރު ރަށްރަށަށް ކުރެއްވި ޒިޔާރަތުގައި އެކަން ފެނި ތަރައްގީ ގެނައުމަކީ ކޮންމެހެން ކުރަންޖެހޭ ކަމެއްގެ ގޮތުގައި ފެނިވަޑައިގެންނެވި ކަމަށެވެ. އަދި އެއްވެސް ރަށެއްގެ ރައްޔިތެއް އަސާސީ ހިދުމަތްތަކުން ބާކީ ނުކޮށް ސަރުކާރުން ފޯރުކޮށްދެއްވާނެކަމަށް ވައުދުވެވަޑައިގެންނެވި ކަމަށެވެ.
ރައީސް ވިދާޅުވީ ރައްޔިތުން ތަރައްގީވާނީ ރައޔްިތުންނަށް ބޭނުންވާ އަސާސީ ހިދުމަތްތައް ތަރައްގީ ކުރެވިގެން ކަމަށެވެ. އާއިލާއެކު އުޅެވޭނެ ގޮތެއް ހަދައިދީގެން ކަމަށެވެ.
ރައީސް ވިދާޅުވީ މީގެ ކުރިން ކުރަން ފަށާފައި ހުރި މަސައްކަތުން ފެންނަނީ ކޮންމެ 5 އަހަރުން އަންނަ އިންތިހާބަށް ތައްޔާރުވަމުންދާ މަންޒަރުކަމަށެވެ. މިއީ ވޭތުވެދިޔަތަނުގައި ސަރުކާރުތަކުން ކަންކުރައްވާފައިވާގޮތް ކަމަށެވެ. މިއާއެކު އާމްދަނީއާ އެއްވަރަށް ރާއްޖެ ތަރައްގީ ނުވާ ކަމަށެވެ.
ނަމަވެސް އެމަނިކުފާނު ތަރައްގީ ގެންނަވަނީ އިންތިހާބަކަށް ނޫން ކަމަށާއި, އެއީ އެމަނިކުފާނުގެ ވިސްނުންފުޅެއް ނޫން ކަމަށެވެ. ރައީސް ވިދާޅުވީ ރައްޔިތުން ނިންމަންވީ ތަރައްގީއާއެކު ކުރިއަށްދާނީތޯ ނުވަތަ މަޑުޖެހިގެން ތިބޭނީތޯ ކަމަށެވެ.
