ފަހު މެޗުގައި އަމީނިއްޔާ އިން ޣިޔާޘުއްދީން ބަލިކޮށްފި

އިންޓަ ސްކޫލް 15 އަހަރުން ދަށުގެ ފުޓުބޯޅަ މުބާރާތުގައި ޣިޔާޘުއްދީން އިންޓަނޭޝަނަލް ސްކޫލާ ދެކޮޅަށް ކުޅުނު މެޗުން އަމީނިއްޔާ ސްކޫލް މޮޅުވެއްޖެ އެވެ.

ބުދަ ދުވަހުގެ ހަވީރު ގަލޮޅު ރަސްމީ ދަނޑުގައި ކުޅުނު މެޗު އަމީނިއްޔާ އިން ކާމިޔާބު ކުރީ 4-2 އިންނެވެ. މެޗުގެ ފުރަތަމަ ހާފުގައި ވެސް އަމީނިއްޔާ އިން ވަނީ ހަތަރު ލަނޑު ޖަހައި މެޗުގެ ކޮންޓްރޯލް ނަގައިފަ އެވެ. މެޗު ފަށައިގެން 11 ވަނަ މިނެޓުގައި އަމީނިއްޔާ އަށް ލީޑު ނަގައިދިނީ ދިނާން އެވެ. އޭގެ ހަ މިނެޓު ފަހުން އެ ޓީމަށް ލީޑު ފުޅާކޮށްދިނީ ޝިއުތު އެވެ. އަމީނިއްޔާގެ ތިން ވަނަ ލަނޑު ލޫތު ޖެހީ މެޗުގެ 28 ވަނަ މިނެޓުގަ އެވެ. އޭގެ ދެ މިނެޓު ފަހުން އެ ޓީމުގެ ހަތަރު ވަނަ ލަނޑު ޖެހީ ދިނާން އެވެ. މެޗުގައި ޣިޔާޘުއްދީނުން ދެ ލަނޑު ޖެހީ ދެ ވަނަ ހާފުގަ އެވެ. އެއީ 56 ވަނަ މިނެޓުގައި ކާހިލް ޖެހި ލަނޑާއި، މެޗުގެ އިތުރު ވަގުތުގައި އޭނާ ޖެހި ލަނޑުންނެވެ.

މިއީ މުބާރާތުގައި އަމީނިއްޔާގެ ފުރަތަމަ މޮޅެވެ. އެ ޓީމު ކުރިން ކުޅުނު ދެ މެޗުން ވެސް ވަނީ ބަލިވެފަ އެވެ. ބައްޔާއެކު ޣިޔާޘުއްދީނުން މުބާރާތް ނިންމާލަން ޖެހުނީ މޮޅެއް ނުލިބި އެވެ.