ރަންތާޖު ޤުރުއާން މުބާރާތަށް ހޮވުނު ބައިވެރިންނަށް މައުލޫމާތު ދިނުމުގެ ސެޝަނެއް ކުރިއަށްގެންގޮސްފި
މި މުބާރާތުގައި 20 ބައިވެރިން ވާދަ ކުރާނެ
ރަންތާޖު ޤުރުއާން މުބާރާތުގެ ބައިވެރިންނާ އެކު ބޭއްވި ބައްދަލުވުން
ރާއްޖެ ޓީވީ އާއި ޔޫތު މިނިސްޓްރީ އާއި އިސްލާމިކް މިނިސްޓްރީ ގުޅިގެން މިއަހަރުގެ ރޯދަ މަހު ކުރިއަށްގެންދާ ރަންތާޖު ޤުރުއާން މުބާރާތުގެ އޮޑިޝަނުން ހޮވުނު 20 ބައިވެރިންނަށް މައުލޫމާތު ދިނުމުގެ ސެޝަނެއް ކުރިއަށްގެންގޮސްފިއެވެ.
ބުދަ ދުވަހުގެ ރޭ ކުރިއަށްގެންދިޔަ މި ސެޝަނަކީ މި މުބާރާތުގެ ބައިވެރިންނަށް މައުލޫމާތު ދިނުމުގެ ގޮތުން ބޭއްވި ފުރަތަމަ ސެޝަނެވެ. އެގޮތުން، މުބާރާތް ކުރިއަށްދާނެ ގޮތާއި އިންތިޒާމުތައް ހަމަޖެހިފައިވާ ގޮތާއި މުގައްރަރާ ގުޅޭ ގޮތުން ރާއްޖެ ޓީވީ އާއި ޔޫތު މިނިސްޓްރީން ވަނީ ބައިވެރިންނަށް ވަނީ މައުލޫމާތު ދީފައެވެ.
މި ސެޝަނުގައި ބައިވެރިންގެ ފަރާތުން ހުރި ސުވާލުތަކަށް ވެސް ވަނީ ޖަވާބު ދީފައެވެ.
ފުރަތަމަ ސެޝަނުގައި މުބާރާތައް ހޮވުނު 20 ބައިވެރިން ވެސް ބައިވެރިވެފައިވާއިރު، ރަށްރަށުގައި މިވަގުތު ތިބި ބައިވެރިން މި ސެޝަނުގައި ބައިވެރިވީ އޮންލައިންކޮށެވެ.
ރަންތާޖު ޤުރުއާން މުބާރާތުގައި ރާއްޖޭގެ އެކި ކަންކޮޅުތަކުގައި އޮޑިޝަންތައް ބާއްވައި ފައިނަލް 20 ބައިވެރިން ވަނީ ހޮވައިފައެވެ. މި ބައިވެރިން ހޮވާފައި ވަނިކޮށް އޭގެ ތެރެއިން ދ. ކުޑަހުވަދޫ އީލަފް އަހުމަދު ސޮލާހު މުބާރާތުން އަމިއްލައަށް ވަކިވުމާ ގުޅިގެން އެ ޖާގައަށް އޮޑިޝަންގައި 21 ވަނައަށް އެންމެ މަތިން މާކްސް ލިބުނު ބައިވެރިޔާ ވަނީ ހޮވާފައެވެ. އެއީ ހއ. ހޯރަފުށި، އައިޝަތު ޝަރުފާއެވެ.
އީލަފް މުބާރާތުން ވަކިވުމަށް އެދިފައިވަނީ މުބާރާތާއި އޯލެވެލްގެ ދުވަސްވަރާ ދިމާވާތީ އެ ދުވަސްވަރު މާލޭގައި ހުންނަން ދަތިވުމާ ގުޅިގެންނެވެ.
3 ލައްކަ ރުފިޔާގެ އިނާމަކާއެކު ކުރިއަށްގެންދާ މި މުބާރާތުގެ އޮޑިޝަންތައް ރާއްޖޭގެ 6 ސަރަހައްދެއްގައި ބޭއްވިއެވެ. މި އޮޑިޝަންތަކުން މުބާރާތަށް ކުދިން ހޮވުމުގައި އޮޑިޝަންތަކުގައި ބައިވެރިވި ހުރިހާ ކުދިން ވެސް އެއް މިންގަނޑަކުން މިންކުރެވުނު ކަމަށާއި މުބާރާތުގައި ވާދަކުރާނީ ހުރިހާ ފަނޑިޔާރުންނަށް އިއްތިފާގުވެވުނު 20 ބައިވެރިން ކަމަށް މުބާރާތުގެ ފަނޑިޔާރުން ވަނީ ވިދާޅުވެފައެވެ.
