އެޗްޑީސީން ރޯދަ މަހަށް ހިޔާ ސަރަހައްދުގައި ވަގުތީ މާރުކޭޓެއް ހަދަނީ

ހުޅުމާލެ ދެވަނަ ފިޔަވަހީގެ ހިޔާ ފްލެޓުތައް ހުންނަ ސަރަހައްދުގައި އަންނަ ރޯދަމަހާ ދިމާކޮށް ވަގުތީ މާރުކޭޓެއް ހުޅުވަން، ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ)ން ނިންމައިފިއެވެ.

އެ ކުންފުނިން އަންގާރަ ދުވަހު ކުރި އިއުލާނެއްގައި ވަނީ، މިދިޔަ އަހަރާ އެއްގޮތަށް މިއަހަރު ވެސް ހިޔާ ސަރަހައްދުގައި މާރުކޭޓެއް ހުޅުވާނެ ކަމަށެވެ. އެއީ 18 ގޮޅި ހިމެނޭ މާރުކޭޓެއްކަން ވެސް އެޗްޑިސީން ވަނީ ފާހަގަކޮށްފައެވެ.

އެޗްޑީސީން ބުނީ މި މާރުކޭޓުން ދޫކުރަން ނިންމާފައިވާ 18 ގޮޅީގެ ތެރެއިން 50 އިންސައްތަ ނުވަތަ ނުވަ ގޮޅި ހާއްސަކޮށްފައިވަނީ ހިޔާ ސަރަހައްދުގައި ދިރިއުޅޭ ފަރާތްތަކަށް ކަމަށެވެ. އަދި ބާކީ ނުވަ ގޮޅި ދޫކުރާނީ އާއްމުކޮށް ހުޅުވާލައިގެން ކަމަށް ވެސް އެ ކުންފުނިން ބުނެއެވެ.

ހިޔާ ސަރަހައްދުގައި ރޯދަ މަހަށް ހާއްސަ ކޮށްގެން މާރުކޭޓެއް ހުޅުވަން އެޗްޑީސީން ނިންމީ، ރޯދަ މަހު އެ ސަރަހައްދުގައި ދިރިއުޅޭ ރައްޔިތުންނަށް ފަސޭހަކަމާއެކު ކާބޯތަކެތި ލިބޭނެ ގޮތް މަގު ފަހިކޮށްދިނުމުގެ ބޭނުމުގައެވެ.

ރޯދަ މަހު މިފަދަ ޚިދުމަތްތަކަށް އޮންނަ ޑިމާންޑު އިތުރުކަން ފާހަގަކޮށް އެޗްޑީސީން ބުނީ، އެ ކުންފުނިން ރައްޔިތުންނަށް ލުއި ގޮތްތައް ހޯދައިދިނުމަށް މާލޭ ސިޓީ ކައުންސިލަށް ވެސް ވަގުތީ މާރުކޭޓެއް ހަދަން ބިން ހަމަޖައްސާފައިވާ ކަމަށެވެ. ސިޓީ ކައުންސިލުން މިހާރު ވަނީ އެ މާރުކޭޓުން ދޫކުރާނެ ގޮޅިތަކަށް އެދުމުގެ ފުރުސަތު ވެސް ހުޅުވާލާފައެވެ.

މާލޭ ސިޓީ ކައުންސިލުގެ އިތުރުން ރައްޔިތުންނަށް ބޭނުންވާ ކާބޯތަކެތި ފޯރުކޮށްދިނުމަށް ދެވަނަ ފިޔަވަހިން އެސްޓީއޯއަށް ވެސް އެޗްޑީސީން ވަނީ އެހީތެރިކަން ފޯރުކޮށްދީފައެވެ. އެގޮތުން، ވިނަރެސް ފްލެޓުތަކުގެ ކޮމަރޝަލް ބްލޮކްގައި އެސްޓީއޯގެ ޚިދުމަތް ފޯރުކޮށްދިނުމަށް ޔުނިޓެއް ކަނޑައަޅައި މިދިޔަ މަހު ހަވާލުކޮށްފައި ވާނެކަމަށް އެޗްޑީސީން ބުނެއެވެ.

އެޗްޑީސީން ބުނީ ރައްޔިތުންގެ ލާބަޔާއި މަންފާއަށް ކުރެވޭ ކޮންމެ ކަމަކީ ވެސް އެ ކުންފުނިން ބަލައިގަންނާނެ ކަމެއް ކަމަށާއި، އެފަދަ ކަންކަމަށް އެ ކުންފުނީގެ އެއްބާރުލުން ހުރިހާ މުއައްސަސާއަކަށް ވެސް ލިބޭނެ ކަމުގެ ޔަގީންކަން ދޭކަމަށެވެ.