އިންޑިޔާގައި ފިޔާގެ އަގު ދަށަށް ގޮސް، ބައެއް ދަނޑުވެރިން ހައްދާ ފިޔާ ނުވިއްކައި ހަލާކުވުމަށް އެބަ ބަހައްޓާ!!

ކުރީ އަހަރު ތަކުގައި ރަމްލާން މަހާ ދިމާކޮށް ފިޔައާއި އަލުވީގެ އަގުތައް އަރައިގެން ދިޔަނަމަވެސް މިފަހަރު އެހެން ދިމާނުވުން ވަރަށް އެކަށީގެންވެއެވެ.  

ދުނިޔޭގައި ފިޔާ ލިބުމުގެ ދަތިކަމެއް އެބައޮތްކަމަށް ވަރލްޑް ބޭންކުން މިދިޔަ މަހު ބުނެފައިވަނިކޮށް، ރާއްޖެއަށް އެންމެ ގިނައިން ފިޔާ އިމްޕޯޓްކުރާ އިންޑިޔާގައި ފިޔާގެ އަގު ދަށްކަމުން ބައެއް ދަނޑުވެރިން ހައްދާ ފިޔާ ނުވިއްކައި ހަލާކުވުމަށް ބަހައްޓަމުން ދާކަމަށް ހިންދުސްތާން ޓައިމްސްއިން ބުނެފިއެވެ.

މިކަމަށް ހައްލެއް ހޯދުމަށް ޔޫނިއަން ގަވަންމަންޓްގެ އިތުރުން ކޮންސިއުމަރ އެފެއަރޒް މިނިސްޓްރީ، އަދި ނޭޝަނަލް އެގްރިކަލްޗަރަލް ކޯޕޮރޭޓިވް މާކެޓިންގ ފެޑަރޭޝަން ގުޅިގެން މިހާރުވަނީ މަސައްކަތްތަކެއް ފަށާފައި ކަމަށް ޚަބަރު ލިބެއެވެ. މިގޮތުން ފިޔާގެ ވިޔަފާރި އެންމެ ފުޅާކޮށް ކުރާ ސްޓޭޓް ކަމަށްވާ ނާސިކްގައި ސަރޕްލަސް ވާ ފިޔާ ސަރުކާރުން ގަނެ، ފިޔާ އާންމުކޮށް ނުހައްދާ ހިސާބުތަކަށް ވިއްކުމަށްޓަކައި ވަނީ ގެންދަން ފަށާފައެވެ.

އިންޑިޔާގެ ބައެއް ހިސާބު ތަކުގައި މިވަގުތު އެކެއް ނުވަތަ ދޭއް އިންޑިޔާ ރުޕީސްއަށް ވެސް ފިޔާ ކިލޯއެއް ލިބޭ ކަމަށް ވެއެވެ. އަދި ޓެކްސް ދައްކާފައި ހިލޭވެސް ބައެއް ފަރާތްތަކުން ފިޔާ ދޫކުރަމުން ދާކަމަށް ޚަބަރުތައް ބުނެއެވެ.

އިންޑިޔާގައިވެސް ގިނަ ކެއްކުންތަކުގައި ފިޔާ ބޭނުންކުރާއިރު، ފިޔާ ތިޔާގިވުމާއި ތަދުވުން އޮންނަނީ ބޮޑަށް މޫސުމަށް އަންނަ ބަދަލުތަކާ ގުޅިގައެވެ. މިގޮތުން ވަރަށް ތިޔާގިކޮށް އޮވެފައި ހަމަ މަދު ހަފުތާކޮޅެއްގެ ތެރޭގައި އެހާ ބޮޑަށް ތަދުވެގެން ދެއެވެ. ފިޔާ ދަނޑުތަކަށް އެންމެ ބޮޑަށް އަސަރުކުރަނީ މާ ހޫނު ގަދަވުމުން ނުވަތަ މާބޮޑަށް ވިއްސާރަވެ ފެން ބޮޑުވާން ދިމާވުމުންނެވެ.

މަހާރަޝްތުރާގައި އެންމެ ގިނައިން ފިޔާ ހައްދާ އެކަކު ހިންދުސްތާން ޓައިމްސްއަށް މިދިޔަ ހަފުތާގައި މައުލޫމާތު ދީފައިވާގޮތުގައި، އޭނާ 512 ބާރަ ކިލޯ ވިއްކަންޖެހުނީ 512 ރުޕީސްއަށެވެ. އެއީ ފިޔާގެ އަގު އެކަންޏެވެ. ރެންޓާއި ޓްރާންސްޕޯޓް ޚަރަދުގެ އިތުރުން ޓެކްސް އެއްކުރުމުން 2 ރުޕީސްއަށް ކިލޯއެއް ޖެހުނުކަމަށް އޭނާ ބުނެފައިވެއެވެ.

އިންޑިޔާގައި އާންމުކޮށް 7 ރުޕީސްއާ 10 ރުޕީސްއާ ދެމެދުގެ އަދަދަކަށް ފިޔާ ކިލޯއެއް ލިބެއެވެ.

ސަރުކާރުން އާދީއްތަ ދުވަހު ބުނެފައިވާގޮތުގައި ފިޔާއެކްސްޕޯޓް ކޮށްގެން 2022 ވަނަ އަހަރުގެ އެޕްރީލުން ޑިސެމްބަރަށް 523.8 މިލިއަން ޑޮލަރު ލިބިފައިވެއެވެ. ނަމަވެސް ތަފާތު ސަބަބުތަކާހެދި ދެއަހަރު ވަންދެން އެކްސްޕޯޓް ކުރުން މަނާ ކޮށްފައި އޮތް އޮތުމުގެ ސަބަބުން ބާޒާރުގައި ފިޔާ މާބޮޑަށް މިހާރު ތިޔާގިވެ، އަގު ވަރަށް ބޮޑަށް ވެއްޓިފައި ވަނީ ކަމަށް ސަރުކާރުން ބުނެފައި ވެއެވެ.   

ފިޔަޔާއެކު އަލުވީގެ އަގުވެސް އިންޑިޔާގައި ވަރަށް ބޮޑަށް ވެއްޓިފައިވާ ކަމަށް ޚަބަރުތައް ބުނެއެވެ. އަލުވި އެންމެ ގިނައިން ހައްދާ ވެސްޓް ބެންގޯލް، އުއްތަރަ ޕްރަދޭޝް އަދި ޕަންޖާބްގައިވެސް ދަނޑުތަކުން ލިބުނު އެއްޗެހި ގިނަވެ، އަގު ވެއްޓިފައިވާކަމަށް ޚަބަރުލިބެއެވެ. ކުރިން ސަތޭކަ ކިލޯ އަލުވި 1،400 ރުޕީސްއާ 1،500 ރުޕީސްއާ ދެމެދުގެ އަގަކަށް ވިއްކޭއިރު، މިހާރު ސަތޭކަ ކިލޯގެ އަލުވި އުޅެނީ 350 ރުޕީސްއަށް ކަމަށް ވެއެވެ. މިއީ 76 އިންސައްތައިގެ ވެއްޓުމެކެވެ.

ފިޔާ އަދި އަލުވި މަދުން ލިބޭ ދުވަސްވަރެއްގައި އެތެރޭގެ އަގުތައް ހިފެހެއްޓުމުގެ ގޮތުން އެބާވަތެއް އެންމެ އަގުބޮޑުކޮށް އެކްސްޕޯޓް ކުރެވޭ އަގެއް ސަރުކާރުން ކަނޑައަޅައެވެ. އެއީ މިނިމަމް އެކްސްޕޯޓް ޕްރައިސްއެވެ. މިވަގުތު އެފަދަ އެއްވެސް މިންގަނޑެއް ސަރުކާރުން ނުހިފަހައްޓާ ކަމަށް ވެއެވެ.

މައުލޫމާތު: ހިންދުސްތާން ޓައިމްސް