ޖުމްހޫރީ ޕާޓީގެ ހަތަރުވަނަ ޤައުމީ ކޮންފަރެންސްގައި ބައިވެރިވެވަޑަތުމުން ޖޭޕީގެ ލީޑަރު ޤާސިމް އިބްރާހިމް އަށް ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދުގެ ތާއީދު އޮތް ކަަމަށް ދެއްކެވުމަކީ ބަލައިގަނެވޭ ކަމެއް ނޫން ކަަމަށް ރައްޔިތުންގެ މަޖިލީހުގެ ހެންވޭރު ދެކުނު ދާއިރާގެ މެންބަރު ހުސައިން ޝަހީމް (އަދުން ހުސައިން) ވިދާޅުވެއްޖެއެވެ.

މަޖިލީހުގެ ބަހުސް މަރުހަލާގައި ވާހަކަދައްކަވަމުން އޭނާ ވިދާޅުވީ ކިތަންމެ ވަރަކަށް ވެސް ގަވާއިދުތައް ހެދިދާނެ ކަަމަށާއި އެ ގަވާއިދުތަކުން ފައިދާ ކުރާނީ އެ ގަވާއިދުތަކަށް ރަނގަޅަށް އަމަލުކުރެވިގެން ކަމަށެވެ. އެގޮތުން އެމްޑީޕީގެ ހިންގުމަށްޓަކައި ވެސް ވަރަށް ހަރުދަނާ ރަނގަަޅު އުސޫލުތައް ހެދިފައި ހުރި ކަމަށް އޭނާ ވިދާޅުވިއެވެ. އޭނާ އިތުރަށް ވިދާޅުވީ އެމްޑީޕީގެ އިސް ދެ ފަރާތް ކަމަށްވާ ކުރީގެ ރައީސް މުހައްމަދު ނަޝީދާއި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުއާ ދެމެދު އޮތް ވާދަވެރި ރިޔާސީ ޕްރައިމަރީ އަށް ފަހު ދިމާވެފައިވާ މައްސަލައާ މެދު ކަންބޮޑުވެވަޑައިގަންނަވާ ކަމަށެވެ. އެ މައްސަލަ އަކީ މަޖިލީހުގައި ދިމާވެގެން އުޅޭ މައްސަލަތަކަށް ވުރެ މާ ބޮޑު، އާއްމުން އިންތިހާ އަށް ކަންބޮޑުވާ ކަމެއް ކަމަށް އޭނާ ވަނީ ވިދާޅުވެފައެވެ.

ޝަހީމް ވަނީ ރައީސް ޞާލިހު އަށް ރިޔާސީ ޓިކެޓް ލިބިވަޑަިއގަތުމުން އެމަނިކުފާނަށް އެމްޑީޕީ އިން ތާއީދު ކުރަން ނުޖެހޭ ކަމަށް ރައީސް ނަޝީދު ވިދާޅުވާތީ އެކަމަށް ފާޑު ވިދާޅުވެފައެވެ. އޭނާ އިތުރަށް ވިދާޅުވީ އެމްޑީޕީގެ ރިޔާސީ ކެނޑިޑޭޓް އަކަށް ހޮވުނު ބޭފުޅާ އަށް ވުރެ ޖޭޕީގެ ލީޑަރަަށް އެމްޑީޕީ އިން ތާއީދުކުރުން މާ ރަނގަޅު ކަމަށް ދެއްކުމަކީ ކަންބޮޑުވެވަޑައިގަންނަވާ ކަމެއް ކަމަށެވެ. އެކަމަކީ އާދައިގެ ކަމެއް ކަމަށް ދެއްކުމަކީ އެމްޑީޕީގެ މެމްބަރުން މަގުމަތިވެ ވަޒީފާތައް ގެއްލުމަށް ތާއީދުކުރުން ކަމަށް އޭނާ ސިފަކުރެއްވިއެވެ. އެއީ އެމްޑީޕީ އަށް ރަނގަޅު ގޮތް ކަމަށް ގަބޫލު ނުކުރެވޭ ކަމަށް ވެސް އޭނާ ވިދާޅުވިއެވެ.

ޖުމްހޫރީ ޕާޓީގެ ހަތަރުވަނަ ޤައުމީ ކޮންފަރެންސް ނިންމުމުގެ ރަސްމިއްޔާތުގައި ރައީސް ނަޝީދު ވަނީ ބައިވެރިވެވަޑައިގަންނަވާފައެވެ. ޝަހީމްގެ އެ ވާހަކަތަކާއި ގުޅިގެން ރައީސް ނަޝީދު ވިދާޅުވީ މިހާރު ސަރުކާރުގެ ތެރެއިން އެމްޑީޕީ އަށް ލިބިފައި އޮތީ 40% ކަމަށެވެ. އެއަށް ވުރެ ރަނގަޅު ގޮތެއް އެމްޑީޕީ އަށް ވާނަމަ އެއީ ރަނގަޅު ގޮތެއް ކަމަށް ލަފާކުރެވިދާނެ ކަމަށް ވެސް ރައީސް ނަޝީދު ވަނީ ވިދާޅުވެފައެވެ.