ނިޒާރުގެ އޮތީ ކުޅުންތެރިންނަށް ތައުރީފާއި ސަޕޯޓަރުންނަށް ޝުކުރު

ފޯ ނޭޝަންސްކަޕްގެ އަންހެން ޑިވިޝަންގެ ފައިނަލްގައި ސިންގަޕޫރު އަތުން ބަލިވިޔަސް މުޅި ޓީމަށް ކޯޗު ނިޒާރު އިބްރާހީމް (ބޮޑޭ) ވަރަށް ބޮޑަށް ތައުރީފް ކޮށްފިއެވެ.

ފައިނަލް މެޗަށްފަހު ނިޒާރު ބުނީ ކުޅުންތެރިން ކުރަން ޖެހޭ ހުރިހާ މަސައްކަތަކާއި, ހިވްތަރެއް ކޮށްފިކަމަށެވެ. ޕްރެކްޓިސްގައިވެސް އަދި މެޗުގައިވެސް ކުޅުންތެރިން %120 ދީފިކަމަށް ކުރީގެ އެއްވަނަ ކުޅުންތެރިޔާ ބުންޏެވެ.

ނިޒާރު ބުނީ މުބާރާތާ ކުރިމަތިލީ ތައްޔާރުވެގެން ސީދާ ތަށި ހޯދަން ކަމަށެވެ. ފައިނަލް ކުޅެ, ތަށި ހޯދަން ކުރަން ޖެހޭ ހުރިހާ މަސައްކަތެއް ޓީމުން ކުރިކަން ފާހަގަކުރަމުން ނިޒާރު ބުނީ މިދިޔަ މުއްދަތުގައި މިކުރި މަސައްކަތަށް ބަލާއިރު މިލިބުނު ކާމިޔާބީއަކީ ހަމަ ހަޤީޤަތުގައިވެސް ހައްޤު ކާމިޔާބީއެއްކަމަށެވެ.

ކުޅުންތެރިންގެ މަސައްކަތުގެ އިތުރުން އެންމެ ބޮޑަށް ނިޒާރު ފާހަގަކުރީ ދިވެހި ސަޕޯޓަރުންގެ ފަރާތުން އެލިބުނު ސަޕޯޓެވެ. އެއީ ޓީމަށް ލިބުނު އިތުރު ހިތްވަރެއްކަން ފާހަގަކޮށް ނިޒާރުބުނީ އޭނާގެ ހަޔާތުގައިވެސް އޭނާގެ ޓީމަކަށް ޚާއްޞަކޮށް އަންހެން ޓީމަކަށް މިވަރުގެ ސަޕޯޓެއް ނުލިބޭކަމަށެވެ. އެއީ ވަރަށްބޮޑަށް ފަޚުރުވެރިވާކަމެއް ކަމަށާއި, އެއާއެކު ރަން މެޑަލްވެސް ކައިރިވެއްޖެކަމަށެވެ.

މުބާރާތުގެ އަންހެން ޑިވިޝަންގައި ރާއްޖޭގެ އިތުރުން ވާދަކުރީ މެލޭޝިޔާއާއި ސިންގަޕޫރެވެ. ރާއްޖެ ފައިނަލަށް ދަތުރުކުރީ ސެމީފައިނަލްގައި މެލޭޝިޔާ ބަލިކޮށްގެންނެވެ.