ދިވެހި ވޮލީބޯޅަ މިއޮތީ އެހެން ހަރުފަތެއްގައި، މިވަރުގެ ސަޕޯޓެއްވެސް މީގެކުރިން ނުދެކެން- ރަނޭ

ރާއްޖޭގެ ވޮލީބޯޅަ މިހާރު މިއޮތީ އެހެން ހަރުފަތެއްގައި ކަމަށާއި, ސަޕޯޓަރުންގެ ފަރާތުންވެސް މިވަރުގެ ސަޕޯޓެއް މީގެކުރިން ނުފެންނަކަމަށް ވޮލީބޯޅަ އެސޯސިއޭޝަންގެ ރައީސް މުޙައްމަދު ރަނޭޝް (ރަނޭ) ވިދާޅުވެއްޖެއެވެ.

ފޯނޭޝަންސް ކަޕްގެ އަންހެން ޑިވިޝަންގެ ފައިނަލްގައި ވާދަވެރި, ފޯރިގަދަ ކުޅުމަކަށްފަހު ސިންގަޕޫރު އަތުން ބަލިވި މެޗަށްފަހު ރަނޭ ވިދާޅުވީ މިދިޔަ އަހަރު އެއް އަހަރު ވަންދެން ކުރި މަސައްކަތް ރާއްޖޭގެ ދެޓީމްގެ ފަރާތުންވެސް ފެނިއްޖެކަމަށެވެ. ޤައުމީ ޓީމްގެ ކުރީގެ ސެޓަރު ވިދާޅުވީ ސާބިތުވެގެން ދިޔައީ ދިވެހި ވޮލީބޯޅަ އެހެން ލެވްލްއަކަށް ގެނެވިފަ އޮތް ކަމަށެވެ. ދިވެހި ފަސްގަނޑުގައި އަޅުގަނޑުމެންގެ ދަރިން މިކުރި މަސައްކަތަކީ މިހާތަނަށް މިފަހުގެ ތާރީޚެއްގައި ކުރި އެންމެ ވަރުގަދަ މަސައްކަތްކަން ފާހަގަކޮށް ރަނޭ ވިދާޅުވީ އެކަމުންވެސް ދޭހަވެގެންދިޔައީ ދިވެހި ވޮލީބޯޅަ އެހެން ލެވެލްއެއްގައި އޮތްކަން ކަމަށެވެ.

ރަނޭ ވިދާޅުވީ މިއީ އޭނާގެ ވޮލީ ކެރިއަރުގައިވެސް ފެނިގެންދިޔަ އެންމެ ސަޕޯޓަރުން ގިނަ, އެންމެ ހޫނުގަދަ ސަޕޯޓު ލިބުނު މެޗުކަމަށެވެ. ދިވެހި ސަޕޯޓަރުންނަށް ދިވެހި ކުޅުންތެރިން އަދި ކުޅުންތެރިންނަށް ދިވެހި ސަޕޯޓަރުން ދިން ޔަޤީންކަން މެޗުން ފެނުނުކަމަށް ރަނޭ ވިދާޅުވިއެވެ. އެކަން ފާހަގަކޮށް ރަނޭ ވަނީ ވޮލީބޯޅަ އާއިލާގެ ނަމުގައި ސަޕޯޓަރުންނަށް ޝުކުރު އަދާކުރައްވާފައެވެ.