އައްޑޫގެ ވިޔަފާރި ދަނީ ދަށަށް، ނާޒިލްގެ ފާޑުކިޔުން އަމްރު އަށް

ރައްޔިތުންގެ މަޖިލީހުގެ ހިތަދޫ ދެކުނު ދާއިރާގެ މެންބަރ އިބްރާހިމް ނާޒިލް އެސްޓީއޯގެ މެނޭޖިން ޑިރެކްޓަރ ހުސެއިން އަމްރު އަށް ވަރަށް ބޮޑަށް ފާޑު ވިދާޅުވެއްޖެއެވެ.

އައްޑޫ ޕޯޓުގެ މަސައްކަތަށް ސަރުކާރުން އިސްކަން ނުދެއްވާ ކަަމަށް ބުނެ ހުޅުދޫ ދާއިރާގެ މެމްބަރު އިލްޔާސް ލަބީބު ވަނީ ސަރުކާރަށް ފާޑު ވިދާޅުވެފައެވެ. މަޖިލީހުގައި ވާހަކަދައްކަވަމުން އެ ވާހަކަތަކަށް ރައްދު ދެއްވާ ނާޒިލް ވިދާޅުވީ ކޮށްދެވުނު ކަންތައްތަކުގެ ވާހަކަ ވެސް ދައްކަން ޖެހޭ ކަމަށެވެ. ހިތަދޫ ޕޯޓާއި ބެހޭ ގޮތުން ނާޒިލް ވިދާޅުވީ އެ ވާހަކަ އަކީ ތަކުރާރުކޮށް ދައްކަމުން އައި ވާހަކައެއް ކަމަށެވެ. އެކަމަށް ހައްލު ލިބޭނެ ކަމަށް އެންމެ ބޮޑަށް އުންމީދު ކުރީ އެސްޓީއޯ އިން ދަތުރުކުރަން ފެށި ބޯޓުގެ ވާހަކަ ކަމަށް އޭނާ ވިދާޅުވިއެވެ. އެސްޓީއޯގެ މެނޭޖިން ޑިރެކްޓަރ ހުސެއިން އަމްރު ހަފްތާ އަކު ތިނެއް ނުވަތަ ފަސް ދުވަހު އެ ބޯޓު އޮންނާނެ ކަމަށް ކުރިން ވިދާޅުވި ކަމަށް ނާޒިލް ވިދާޅުވިއެވެ. އެހެންނަމަވެސް މާ ގިނަ ދުވަހެއް ނުވެ އެ ބޯޓު ވިއްކާލި ވާހަކަ އަޑު އިވުނު ކަމަށް އޭނާ ވިދާޅުވިއެވެ. އެ ކުޑަ ބޯޓު ބޮޑު ބޯޓަކަށް ބަދަލުކުރާ ވާހަކަ ވެސް ދެއްކި ކަމަށާއި އެކަން ވެސް ނުކުރެވޭ ކަމަށް އޭނާ ވިދާޅުވިއެވެ. އެއާއި އެކު އައްޑޫގެ ވިޔަފާރިވެރިން ކުރަމުން އައި އުންމީދު ނިމުނީ ކަަމަށް ވެސް ނާޒިލް ވިދާޅުވިއެވެ.

އަމްރު އެސްޓީއޯ އާއި ހަވާލުވި ފަހުން އައްޑޫގައި ވިޔަފާރިވެރިންނަށް ބޮޑުތަނުން ގެއްލުންވާ ކަމަށް ވެސް ނާޒިލް ވަނީ ވިދާޅުވެފައެވެ. އިންޑިއާ އިން ފުރައިގެން އައްޑޫ އަށް ގެންނަ ސިމެންތި ބޯޓާއި، ހިލަ ބޯޓު އައްޑޫ އަށް ގޮސް އެއްޗެހި ބާލަނީ ސީދާ އިންޑިއާއިން ގެނެސްގެން ކަމަށާއި މާލެއިން ތިލަފުއްޓަށް އައިސް ޓީ ޖެޓީ އަށް ބާލައިގެން، ޓީ ޖެޓީން ގޮސް ސައިޓަށް ބާލާ އަގަށް ވުރެ 25 ރުފިޔާ ސިމެންތި ބަސްތާއަކުން ބޮޑުވާ ސަބަބަކީ ކޮބާތޯ އޭނާ ވިދާޅުވިއެވެ. އައްޑޫ އަށް ދާ ހިލަ ބަސްތާ އަކުން 25 ރުފިޔާ، ސިމެންތި ބަސްތާ އަކުން 45 ރުފިޔާ އަދި ދަނޑަކުން 70 ރުފިޔާ ބޮޑުވާން ޖެހޭ ސަބަބެއް އަމްރު އަށް ނޭނގޭ ނަމަ އެސްޓީއޯގައި ހުންނަވަނީ ކީއްކުރައްވަންތޯ ނާޒިލް ސުވާލުކުރެއްވިއެވެ.