ކުލަބް ކެރިއަރުގައި ލިއޮނަލް މެސީގެ 700 ވަނަ ލަނޑާއެކު ޕެރިސް ސެއިންޓް ޖާމަން (ޕީއެސްޖީ) މޮޅުވެއްޖެ އެވެ.

އާދިއްތަ ދުވަހުގެ ރޭ ފްރާންސް ލީގުގައި ވާދަވެރި މާސޭގެ ދަނޑުގައި ކުޅުނު މެޗު ޕީއެސްޖީން ކާމިޔާބު ކުރީ 3-0 އިންނެވެ. މެޗުގައި މެސީގެ އިތުރުން ޕީއެސްޖީ އަށް ކުޅެމުން އަންނަ ފްރާންސްގެ ޒުވާން ފޯވާޑް ކީލިއަން އެމްބާޕޭގެ މޮޅު ކުޅުން ވެސް ވަނީ ފެނިފަ އެވެ. މެޗު ފަށައިގެން 25 ވަނަ މިނެޓުގައި ޕީއެސްޖީ އަށް ލީޑު ނަގައިދިނީ އެމްބާޕޭ އެވެ. އެއީ މާސޭގެ އޭރިޔާ ބޭރުން މެސީ ދިން ބޯޅައެއް ތިރިތިރިން ގޯލުގެ ދުރު ކަނަށް ފޮނުވާލައިގެން އެމްބާޕޭ ކާމިޔާބު ކުރި ލަނޑެކެވެ. އޭގެ ހަތަރު މިނެޓު ފަހުން ޕީއެސްޖީ އަށް ލީޑު ފުޅާކޮށްދިނީ މެސީ އެވެ. އެއީ އެމްބާޕޭ ޖައްސާލި ބޯޅައެއް މާސޭގެ ގޯލް ކީޕަރުގެ ކައިރިން ގޯލަށް ވައްދައިލައިގެންނެވެ. ޕީއެސްޖީގެ ތިން ވަނަ ލަނޑު ދެ ވަނަ ހާފުގެ 55 ވަނަ މިނެޓުގައި އެމްބާޕޭ ޖެހީ ވެސް މެސީ ތަނަވަސްކޮށްދިން ފުރުސަތަކުންނެވެ.

މެޗުގައި މެސީ ޖެހި ލަނޑާއެކު އޭނާގެ ކުލަބު ކެރިއަރުގައި ޖެހި ލަނޑުގެ އަަދަދު ވަނީ 700 އަށް އަރައިފަ އެވެ. އެއީ މިހާރު އޭނާ ކުޅެމުން އަންނަ ޕީއެސްޖީ އަށް ޖަހައިދިން 28 ލަނޑާއި، ކުރީގެ ކުލަބް ސްޕެއިންގެ ބާސެލޯނާ އަށް ޖަހައިދިން 672 ލަނޑާއެކު އެވެ. މީގެ އިތުރުން އެމްބާޕޭ ވަނީ ޕީއެސްޖީ އަށް އެންމެ ގިނަ ލަނޑު ޖަހައިދިން އެޑިންސަން ކަވާނީގެ ރެކޯޑާ ވެސް އަރާ ހަމަކޮށްފަ އެވެ. އެމްބާޕޭ ވަނީ ޕީއެސްޖީ އަށް މިހާތަނަށް 200 ލަނޑު ޖަހައިދީފަ އެވެ.

މެޗުން މޮޅުވެ ލިބުނު ތިން ޕޮއިންޓާއެކު ޕީއެސްޖީ އޮތީ 25 މެޗުން ޖުމުލަ 60 ޕޮއިންޓު ހޯދައިގެން އެއް ވަނައިގަ އެވެ. ހަމަ އެ އަދަދަށް މެޗު ކުޅެގެން ދެ ވަނައިގައި މާސޭ އޮތީ 52 ޕޮއިންޓާއެކު އެވެ. ތިން ވަނައިގައި މޮނާކޯ އޮތީ 50 ޕޮއިންޓާއެކު އެވެ.