ރަމަޟާން މަހަށް، މަހެއްވެސް ނެތް: ހުރި ހަމައެކަނި މިސްކިތްވަނީ ބިންހެލުމުގަ ސުންނާފަތިވެފަ!

މުޅި އަހަރު ދުވަހުގެ ތެރޭގައިވެސް މުސްލިމު ޢުއްމަތާ ބައްދަލުކުރާ އެންމެ މާތް މައްސަރު ކަމަށް ވާ، ބަރަކާތްތެރި ރަމަޟާން މަހުގެ އަޅުކަމަށް، މަސްދުވަސްވެސް ދެން ނެތެވެ. އެމީހަކަށް ވީ ވަރަކުން، އެކި ގޮތް ގޮތުން، ރަމަޟާން މަހަށް ތައްޔާރު ވުމުގައި މުސްލިމު އަޚުންނާއި އުޚުތުން އަވަދި ނެތި އުޅޭ އިރު، ހެދޭނެ މާ ބޮޑު ގޮތެއް، ކުރެވޭނެ މާ ބޮޑު ކަމެއް ނެތި ފައި ތިބި އެތައް ބަޔަކުވެސް ތިބިކަން ހަނދާނުގައި ބަހައްޓަން ޖެހެއެވެ.

ރަމަޟާން މަހަށް ތައްޔާރުވުމުގެ ނަމުގައި އެކި ކަހަލަ ޕްރޮމޯޝަންތަކަށް ހެއްލި، ފައިސާތަކެއް ޚަރަދު ކުރަމުން ދާއިރު، އަޅުކަމުގެ މައިދާން ކަމުގައިވާ، ހުރުމަތްތެރިވެގެންވާ މިސްކިތެއްގެ މިންވަރު ނެތް ބަޔަކުވެސް އެބަ ތިބިކަން ހަނދާން ނައްތާނުލާށެވެ. މި ދައްކަނީ، ފެބުރުއަރީ 6 ވަނަ ދުވަހުގެ ބާރުގަދަ ބިންހެލުން ތަޖުރިބާ ކުރި ސޫރިޔާ ރައްޔިތުންގެ ވާހަކައެވެ. ސޫރިޔާޣެ ހުޅަނގު އުތުރުގެ ޕްރޮވިންސްއެއް ކަމަށް ވަ އިދްލީބުގައި އަދިވެސް މިސްކިތެއް ނެތެވެ.

ބިންހެލުމުގައި ހަލާކުވި އެއް ތަނަކީ އަލް-މަލާންދް މިސްކިތެވެ. މުޢައްޒިން ބަންގި ދިނުމުން، އިމާމްގެ ފަހަތުގައި ނަމާދު ކުރުމަށް ސޫރިޔާގެ މުސްލިމުން ޖަމާޢަތް ހެދީ، މިސްކިތުގެ ވެއްޓިފައިވާ ފާރުތަކުގެ ގާކުނޑިތައް ކައިރީގައެވެ. ހާމަ މަގުމަތީގައެވެ. ނިދުމާއި ހަނދާން ނެތުން ފިޔަވާ، ނަމާދަށް އުޒުރެއް ނެތެވެ. މާ ބޮޑަށް ހޫނުވެ، ދާހިތްލާނެތީ މިސްކިތަށް ނުގޮސް، ފިނި ކޮޓަރިތަކުގައި ތިބި މީހުން ޢިބުރަތް ހާސިލު ކުރަން ޖެހެއެވެ.

އަލް-މަލާންދް މިސްކިތުގެ އިމާމް، އާދިލް އަލް-ޝައިޚް ވިދާޅުވި ގޮތުގައި ބިންހެލުމަށްފަހު ހުރިހާ ނަމާދެއްވެސް ކުރަނީ އެގޮތަށް، މިސްކިތު ބޭރުގައެވެ.

އަވަށު ކައުންސިލުން ބުނި ގޮތުގައި، މިސްކިތާއެކު، އެ ސަރަޙައްދުން 200 އެއްހާ އިމާރާތް ވަނީ ސުންނާފަތިވެފައެވެ. ފެބުރުއަރީ 6 ވަނަ ދުވަހުގެ ބިންހެލުމާ ގުޅިގެން ސޫރިޔާއިން މަރުވި މީހުންގެ ޢަދަދު 6000 އާ ގާތް ކުރާއިރު، ބިންހެލުމުގައި އެންމެ ބޮޑު ގެއްލުމެއް ލިބުނު ތުރުކީވިލާތުން މަރުވި މީހުންގެ ޢަދަދު ބައި ލައްކައާ ގާތް ކުރެއެވެ.