ހުޅުމާލޭގައި އިތުރު ކޮމިއުނިޓީ ސެންޓަރެއް ތަރައްގީ ކުރަނީ
26 ފެބުރުއަރީ 2023 | އާދީއްތަ 02:15ކޮމިއުނިޓީ ސެންޓަރު ތަރައްޤީކުރުމަށް ޝައުގުވެރިވާ ފަރާތްތަކުން އަންނަ މާޗްމަހުގެ 9 ވަނަ ދުވަހުގެ މެންދުރު 14:00ގެ ކުރިން ފޯމު ހުށަހަޅަން ޖެހޭނެ
ހުޅުމާލެ ޑިވެލޮޕްމަންޓް ކޯޕަރޭޝަން
ހުޅުމާލޭގައި އިތުރު ކޮމިއުނިޓީ ސެންޓަރެއް ތަރައްގީ ކުރުމަށް ހައުސިންގ ޑެވެލޮޕްމަންޓް ކޯޕަރޭޝަން (އެޗްޑީސީ) އިިން ނިންމައިފިއެވެ.
އެ ކުންފުނިން ވަނީ މި ކޮމިއުނިޓީ ސެންޓަރު ހެދުމަށް ޝައުގުވެރިވާ ފަރާތްތަކަށް އެކަމަށް އެދުމުގެ ފުރުސަތު ހުޅުވާލައިފައެވެ. އެގޮތުން ހުޅުމާލޭ ފުރަތަމަ ފިޔަވަހީގެ ނެއިބަރހުޑް 2 ގެ އަމީން އެވެނިއުގެ ފުރަގަހުގައި އޮތް ސަރަހައްދުން 14000 އަކަފޫޓަށްވުރެ ބޮޑު ސަރަހައްދެއް ވަނީ މި މަޝްރޫއު ހިންގުމަށް ކަނޑައަޅައިފައެވެ.
ކޮމިއުނިޓީ ސެންޓަރު ތަރައްޤީކުރުމަށް ހުޅުވާލާފައިވަނީ އެކަމަށް ޝައުގުވެރިވާ ފަރާތްތަކުން ކޮމިއުނިޓީ ސެންޓަރު ތަރައްގީކޮށް ހިންގާގޮތަށެވެ.
އެޗްޑީސީން ބުނެފައިވާ ގޮޮތުގައި މި ސެންޓަރުގެ ގްރައުންޑް ފްލޯގައި ސިނަމާއަކާއި ކިއޯސްކް އޭރިއާއަކާއި ޕަބްލިކް އޭރިއާއެއް ހަދަން ނިންމާފައިވާއިރު ފުރަތަމަ ފަންގިފިލާގައި ބުކްޝޮޕަކާއި ސްޕޯޓްސް އޭރިއާއެއް ހުންނާނެއެވެ. އަދި ތިންވަނަ ފަންގިފިލާގައި ލައިބްރަރީއެއް ހަދަން ހަމަޖެހިފައިވާއިރު ހަތަރުވަނަ ފަންގިފިލާގައި މަލްޓިޕާޕަސް ހޯލަކާއި ކޯ-ވޯކިންގ އޭރިއާއެއް ވެސް ހަދާނެއެވެ.
މި ސެންޓަރުގެ ޓެރަސް ހާއްސަ ކުރާނީ ތަފާތު ހަރަކާތްތައް ބޭއްވޭ ގޮތަށް އިވެންޓް ސްޕޭސްއެއް ގޮތަށްކަމަށް ވެސް އެޗްޑީސީން ވަނީ ބުނެފައެވެ.
ހުޅުމާލޭ ފުރަތަމަ ފިޔަވަހީގެ ނެއިބަރހުޑް 2 ގައި ކޮމިއުނިޓީ ސެންޓަރެއް ތަރައްޤީކުރުމަށް ނިންމާފައިވަނީ ހުޅުމާލޭގެ އާބާދީ އިތުރުވަމުންދާތީ ޢާއްމުންނަށް އެކި ޚިދުމަތް ފޯރުކޮށްދިނުމަށް ބޭނުންވާ ޖާގަ ތަނަވަސްކޮށްދިނުން ކަމަށް އެޗްޑީސީން ބުނެއެވެ.
މި ކޮމިއުނިޓީ ސެންޓަރު ތަރައްޤީކުރުމަށް ޝައުގުވެރިވާ ފަރާތްތަކުން އަންނަ މާޗްމަހުގެ 9 ވަނަ ދުވަހުގެ މެންދުރު 14:00ގެ ކުރިން އެޗްޑީސީގެ މައި އޮފީހަށް ނުވަތަ އީމެއިލް މެދުވެރިކޮށް ލިޔެކިޔުންތައް ފޮނުވުމަށްވަނީ ހުޅުވާލާފައެވެ.
ހުޅުމާލޭ ނެއިބަރހުޑް 1 ގައި ވެސް ކޮމިއުނިޓީ ސެންޓަރެއް ހުރެއެވެ. މި ސެންޓަރަކީ ވެސް ތަފާތު ޚިދުމަތްތައް ލިބޭ ގޮތަށް ހަދާފައިވާ ތަނެކެވެ.
