އެއްމާބަނޑު ދެ ވޮލީ ކުޅުންތެރިންނަށް ލޯބި ހުށަހެޅުމުން ނޭމާ ފަޅާ އަރުވާލައިފި

ބްރެޒިލްގެ މަޝްހޫރު އެއްމާބަނޑު ދެ ވޮލީބޯޅަ ކުޅުންތެރިންނާ ރައްޓެހިވާން އެގައުމުގެ މަޝްހޫރު ފުޓްބޯޅަ ތަރި ނޭމާ ހުށަހެޅި ކަމަށް ބުނެ އެކަން ފަޅާ އަރުވާލައިފި އެވެ.

އުމުރުން 23 އަހަރުގެ ކޭ އަލްވެޒް އާއި ކޭޓް އަލްވެޒްގެ ފަރާތުން މިކަން މީޑިޔާ އަށް އާއްމުކުރީ ކޭޓް އަލްވެޒް އެވެ. އޭނާ ބުނީ އިންސްޓަގްރާމް މެދުވެރިކޮށް ފުރަތަމަ މެސެޖްކުރީ ދައްތަ ކޭ އަލްވެޒް އަށް ކަމަށެވެ.

އޭނާ ބުނީ އެއްމާބަނޑު އެ ދެމީހުން އެކުގައި ލިބުމަކީ އެކަށީގެންވާ ކަމަކަށް ވެދާނެ ކަމަށް ފްރާންސްގެ ޕީއެސްޖީއަށް ކުޅެމުން އަންނަ ފޯވަޑް ބުނެފައިވާ ކަމަށެވެ. ނަމަވެސް ކޭޓް ބުނީ އޭނާ އާއި ކޮއްކޮ ކޭ ވެސް ނޭމާގެ ހުށަހެޅުން ގަބޫލުނުކުރާ ކަމަށެވެ.

ބްރެޒިލްގެ މަޝްހޫރު މި ވޮލީ ކުޅުންތެރިންނަކީ ސޯޝަލް މީޑިޔާގައި ވެސް ވަރަށް މަޝްހޫރު ދެ ކުޅުންތެރިންނެވެ. މީގެ ތެރެއިން ބްރެޒިލްގެ ގައުމީ ޓީމަށް ވެސް ކުޅެމުން އަންނަ ކޭ އަކީ ދުނިޔޭގެ އެންމެ ގިނަ ބަޔަކު ފޮލޯކުރާ ވޮލީ ކުޅުންތެރިޔާ އެވެ. 7.9 މިލިއަން މީހުން އޭނާ ފޮލޯކުރާއިރު 1.5 މިލިއަން މީހުން ކޭޓް ފޮލޯކުރެ އެވެ. އޭނާ އަކީ އިމޭޖްރައިޓްސް އިން ވަރަށް ގިނަ ފައިސާ ހޯދާ ކުޅުންތެރިއެކެވެ. ސޯޝަލް މީޑިއާ ޕްލެޓްފޯމް ތަކުގައި އޭނާ ސަބްސްކްރައިބް ކުރެވެނީ މަހަކު 13.99 ޑޮލަރަށެވެ. މިއީ ނޭމާ ފަދަ ބޮޑު އާމްދަނީއެއް ލިބޭ މީހަކަށް ފަސޭހަކަމާއެކު ހަރަދުކޮށްލެވޭނެ މިންވަރެކެވެ.