ބްރެޒިލްގެ ތަރި ނޭމާ ބްރެޒިލްގެ ސަންޓޯސް އަށް އެނބުރި އައީ ފާއިތުވި މަސްތެރޭގައެވެ. ސަންޓޯސްއަށް ބަދަލުވުމުގެ ކުރިން ނޭމާ ކުޅެފައިވަނީ ސައުދީ ޕްރޯ ލީހުގެ އަލް ހިލާލް އަށެވެ.

އެހެން ނަމަވެސް ނޭމާ އަލް ހިލާއަށް ބަދަލުވިފަހުން، އަނިޔާގެ ގިނަ މައްސަލަތަކެއް ކުރިމަތިވެ، އޭނާއަށް ކުރިއަށް ދެވޭގޮތް ނުވުމުން އަލް ހިލާލާއެކު ވެފައިވާ އަހަރަކު 130 މިލިއަން ޕައުންޑުގެ އެއްބަސްވުން ދެފަރާތުގެ އެއްބަސްވުމާއެކު ވަނީ ނިމުމަކަށް ގެނެސްފައެވެ. އަދި އޭގެ ފަހުން ނޭމާ ވަނީ އަލުން އެނބުރި ކުރީގެ ކުލަބު ސަންޓޯސްއަށް ބަދަލުވެފައެވެ.

ބްރެޒިލްގެ އެންމެ ގިނަ ގޯލު ޖަހާފައިވާ ކުޅުންތެރިޔާ ނޭމާ ސަންޓޯސްގައި ފުރަތަމަ ކުޅުނީ 2009 ވަނަ އަހަރުއެވެ. އަދި 2011 ވަނަ އަހަރު ކޮޕާ ލިބަރްޓަޑޯރެސްގެ ފައިނަލްގައި ގޯލެއް ޖަހައި އެ މުބާރާތް ކާމިޔާބުކުރިއެވެ. އޭނާގެ ސަންޓޯސްގައި ހޭދަކުރި ހަތަރު އަހަރުގެ މުއްދަތުގައި ޖުމުލަ 225 މެޗު ކުޅެ، 136 ގޯލު ޖަހައި، 64 އެސިސްޓް ހަދާފައި ވެއެވެ.

އުމުރުން 33 އަހަރުގެ ނޭމާ އަށް ފަހަކަށް އައިސް ކުރިމަތިވަމުން އައި އަނިޔާތަކުގެ ސަބަބުން އޭނާއަށް ފާއިތުވި ހަތަރުވަރަކަށް އަހަރު ހޭދަކުރަން ޖެހުނީ ކުޅުމާއި ދުރުގައެވެ. ހިލާލް އިންވެސް ނޭމާގެ އެއްބަސްވުން އުވާލި އެންމެ ބޮޑު ސަބަބަކީ ވެސް އެއީ އެވެ.

ނަމަވެސް، ސްޕެއިންގެ ނޫސް ވަސީލަތެއް ކަމުގައިވާ ކަޑެނާ ސެރްގެ ރިޕޯޓެއްގައި ބުނެފައިވާ ގޮތުގައި، ނޭމާ މިހާރުވެސް ވިސްނަމުންދަނީ ކުރިއަށް އޮތް ހޫނު މޫސުމުގައި އެހެން ކުލަބަކަށް ބަދަލުވުމަށެވެ. އޭނާގެ އެންމެ ބޮޑު އިސްކަމެއް ދޭ ކުލަބުތަކުގެ ލިސްޓުގެ އެންމެ ކުރީގައި އޮތީ އޭނާ ކުރިން ކުޅެފައިވާ ސްޕެއިންގެ ބާސެލޯނާއެވެ.

ނޭމާއަކީ ދުނިޔޭގެ ފުޓުބޯޅައިގައި އެންމެ މަޝްހޫރު ކުޅުންތެރިންގެ ތެރެއިން އެކަކަށް ވެފައިވާއިރު، އޭނާ ވަނީ ބާސެލޯނާގައި ފާހަގަކޮށްލެވޭ މޮޅު ކުޅުމެއް ކުޅެފައެވެ. ނޭމާ ބާސެލޯނާއަށް ކުޅެދިން 185 މެޗުގައި 105 ގޯލު ޖަހައި 76 އެސިސްޓް ވަނީ ދީފައިވެއެވެ.

ބާސެލޯނާއަށް މޮޅުކުޅުމެއް ދައްކައި ގިނަ އަހަރުތަކެއް ވަންދެން އެ ކުލަބުގައި ކުޅުމަށް ފަހު 2017 ވަނަ އަހަރު ދުނިޔޭގެ ރެކޯޑު އަގަކަށް ނޭމާ ބަދަލުވީ ފްރާންސްގެ ޗެމްޕިއަން ޕީއެސްޖީއަށެވެ. ޕީއެސްޖީން އޭނާ ބަދަކުވީ އަލް ހިލާލްއަށެވެ. އަލް ހިލާލް އަށް ބަދަލުވި އިރުވެސް ނޭމާ ހުރީ އަނިޔާގައެވެ.

ސްޕެއިނުގެ ބައެއް މީޑިއާ ރިޕޯޓުތަކުގައި ބުނެފައިވާ ގޮތުގައި ނޭމާ ސަންޓޯސްއަށް އެނބުރި ދިޔުމަކީ، އޭނާއަށް އަދިވެސް މަތީ ފަންތީގެ ޓީމެއްގައި މުހިންމު ދައުރެއް އަދާކުރެވޭނެކަން ޔޫރަޕިއަން ކުލަބުތަކަށް ސާބިތުކޮށްދިނުމަށް އޮތް ފުރުސަތެކެވެ. އަދި މީގެ އިތުރުން، އެމެރިކާ، ކެނެޑާ އަދި މެކްސިކޯގައި ބޭއްވުމަށް ހަމަޖެހިފައިވާ 2026 ވަނަ އަހަރުގެ ވޯލްޑް ކަޕަށް ކުޅޭ ބްރެޒިލްގެ ސްކޮޑުން ޖާގައެއް ހޯދުމަކީ ވެސް ނޭމާގެ އަމާޒަކަށް ވަނީ ވެފައެވެ.

ބާސެލޯނާގެ ސްޕޯޓިންގ ޑިރެކްޓަރ ޑެކޯ މި ހަފްތާގައި ބުނެފައިވަނީ ސަމަރ މާކެޓުގައި ކުލަބުގެ މައިގަނޑު އަމާޒަކީ ވާތް ފަރާތު ވިންގެއް ހޯދުން ކަމަށެވެ. ނަމަވެސް ބާސާ އަކީ މިވަގުތު ވެސް ޒުވާން މޮޅުކުޅުންތެރިންތަކެއް ތިބި ކުލަބެއް ކަމުން އިތުރު ކުޅުންތެރިއަކު ބާސާއަށް ގެނައުން މާ މުހިންމު ނޫންކަމަށް ޑެކޯ ބުނެފައިވެއެވެ. ނަމަވެސް އެއް ކުޅުންތެރިއަކު އެ ކުލަބަށް ގެނައުމަކީ އެކަށީގންވާ ކަމެއްކަމަށް ވެސް އޭނާ ބުންޏެވެ.

ބާސެލޯނާއަށް ދިމާވެފައިވާ މާލީ މައްސަލަތަކުގެ ސަބަބުން މާކެޓުގައި އެ ކުލަބުގެ ހަރަކާތްތެރިކަން ބޮޑުތަނުން ވަނީ ދައްވެފައެވެ.