ވެލެންސިޔާގެ ކޮންޓްރެކްޓްގައި ހުރި ފައިޓޯ ވިކްޓްރީއަށް ސޮއިކޮށްފި

ކްލަބް ވެލެންސިޔާގެ އެއްބަސްވުމުގައި ހުރި ޑިފެންޑަރ ހުސެއިން ފައިސަލް (ފައިޓޯ) ވިކްޓްރީއަށް ސޮއިކޮށްފިއެވެ.

ދެވަނަ ޑިވިޝަންގައި ވާދަކުރާ ރާއްޖޭގެ ކުރީގެ ގަދަ ބާރު ވިކްޓްރީން ވަނީ ފައިޓޯ އެކްލަބަށް ސޮއިކުރިކަން ފޮޓޯއާއެކު އިއުލާންކޮށްފައެވެ. އަލުން ފުރަތަމަ ޑިވިޝަނަށް ޕްރޮމޯޓްވުމަށް މަސައްކަތްކުރަމުން އަންނަ ވިކްޓްރީން ދަނީ ފުރަތަމަ ޑިވިޝަންގެ ޓީމްތަކާ އެއްވަރުގެ ޓީމެއް އެކުލަވާލުމަށް މަސައްކަތްކުރަމުންނެވެ. މިދިޔަ ސީޒަންގައި ވެލެންސިޔާގައި މޮޅަށް ކުޅުނު ފައިޓޯ ހިމެނުނީ ވިކްޓްރީ ވަރުގަދަ ކުރަން ކުރާ މަސައްކަތުގެ ދަށުން ހޯދި މުހިއްމު ކުޅުންތެރިންގެ ތެރޭގައެވެ. އެކަމަކު މައުލޫމާތު ލިބިފައިވާ ގޮތުގައި ވެެލެންސިޔާއާއެކު ފައިޓޯ ހަދާފައިވާ އެއްބަސްވުން ހަމަވާނީ ކުރިއަށް އޮތް ސީޒަންގެ ނިޔަލަށެވެ. އޭނާއަށް ރިލީޒް ދިންކަމަކަށް ވެލެންސިޔާއިން ނުބުނެއެވެ.

ފައިޓޯ ބޮޑަށް ފާހަގަކުރެވުނީވެސް ވެލެންސިޔާގައެވެ. ވެލެންސިޔާއާއެކު ޕްރެޒިޑެންޓްކަޕާއި އެފްއޭކަޕް ހޯދިއެވެ. ވެލެންސިޔާގެ އިތުރުން އީގަލްސްއަށްވެސް އޭނާ ކުޅުނެވެ. ޒުވާން ޤައުމީ ޓީމްތަކަށްވެސް އޭނާ ވަނީ ކުޅެފައެވެ. 23 އަހަރުގެ ފައިސަލްއަކީ ނައިފަރަށް އުފަން ކުޅުންތެރިއެކެވެ. ފައިޓޯގެ ކުރިން، ވިކްޓްރީން ވަނީ މިދިޔަ ސީޒަންގެ ފަހުބައިގަ ވެލެންސިޔާއަށް ކުޅުނު މާޒިޔާގެ މުޙައްމަދު އުމެއިރުއާއި, ޤައުމީ ކެޕްޓަން އަކްރަމް އަބުދުލްޣަނީގެ ސޮއިވެސް ހޯދާފައެވެ. ކޯޗަކަށް ހަމަޖެއްސީ ސޮބާހު މުޙައްމަދެވެ.