ދިއްދޫގައި އިމާމުންނާއި ޚަޠީބުންނަށް ބޭއްވި ތަމްރީނު ޕްރޮގްރާމް ނިންމާލައިފި
21 ފެބުރުއަރީ 2023 | އަންގާރަ 13:03މި ޕްރޮގްރާމުގައި ދާއިރާގެ ފުންނާބު އުސް 3 ޢިލްމުވެރިންނާއި 3 ޤާރީން ކިޔަވައިދެއްވި
އިމާމުންނާއި ޚަޠީބުންގެ ތަމްރީނު ޕްރޮގްރާމް ނިންމާލުން
ހއ. ދިއްދޫގައި އިމާމުންނާއި ޚަޠީބުންނަށް ބޭއްވި ތަމްރީނު ޕްރޮގްރާމް ނިންމާލައިފިއެވެ.
ފެބުރުވަރީ 16އިން 19އަށް ދިއްދޫގައި ކުރިއަށްގެންދިޔަ މި ޕްރޮގްރާމްގައި ހއ އަތޮޅުގެ ރަށްތަކުން ޖުމްލަ 48 އިމާމުންނާއި ޚަޠީބުން ބައިވެރިވިއެވެ. މި ޕްރޮގްރާމްގައި މިދާއިރާގެ ފުންނާބު އުސް 3 ޢިލްމުވެރިންނާއި 3 ޤާރީން ކިޔަވައިދެއްވާފައިވެއެވެ.
މި ޕްރޮގްރާމް ކުރިއަށްގެންދިއުމުގެ މައިގަނޑު މަޤްޞަދަކީ، ދިވެހިރާއްޖޭގެ މިސްކިތްތަކުގައި އިމާމުވެ ނަމާދުކުރާ ފަރާތްތަކަކީ އާއްމު ރައްޔިތުންނާއެކު ފަރުޟު ފަސްނަމާދު އިސްވެ ކުރައްވާ ފަރާތްތައް ކަމަށްވާތީ، އެފަރާތްތަކުގެ ޢިލްމާއި ހުނަރާއި އަދި ޤާބިލްކަން އިތުރުކުރުމެވެ.
މި ޕްރޮގްރާމްގައި ނަމާދުގެ ޙުކުމްތަކާއި، ޚިލާފީ މައްސަލަތަކުގައި ޢަމަލުކުރާނެގޮތާއި، މަސައްކަތުގެ އަޚްލާޤާއި، އެހެން މީހުންނާ މުޢާމަލާތްކުރުން ފަދަ މައުޟޫޢުތަކާއި ތަޖުވީދުގެ އިތުރުން ޚުޠުބާ ހުށަހެޅުމުގައި ވިސްނަންވީ ކަންކަމާއި، އިމާމުންނާގުޅޭ ސިވިލް ސަރވިސްގެ ޤަވާޢިދާއި އުޞޫލުތަކާއި ހުކުރު ޤަވާޢިދާ އުޞޫލު ބަޔާންކޮށްދީފައިވެއެވެ.
އޭގެ އިތުރުން އިމާމުންނާއި ޚަޠީބުންގެ މަސްއޫލިއްޔަތުތައް އަދާކުރުމުގައި ކުރެވޭ ކުށްތައް ފާހަގަކޮށް އެކަންކަން ރަނގަޅުކުރުމަށް ކުރެވިދާނެ ކަންކަން ބަޔާން ކޮށްދީފައިވެއެވެ.
ކުރިއަށް އޮތް ތަނުގައި މީގެ އިތުރު ޕްރޮގްރާމްތައް އެހެން އަތޮޅުތަކުގައި ހިންގުމަށް ވަނީ ހަމަޖެހިފައެވެ.
