ފަނޑިޔާރުން ދިގު މުއްދަތުގެ ތަމްރީންތަކަށް ވީއްލާނެ އުޞޫލެއް ހަމަޖައްސައިދިނުމަށް ޖޭއެސްސީން ނިންމައިފި
21 ފެބުރުއަރީ 2023 | އަންގާރަ 06:36ފަނޑިޔާރުންގެ ޤާބިލްކަން އިތުރުކުރުމަކީ މުހިންމު ކަމެއް
49 ފަނޑިޔާރަކު އިންޑިއާގެ ބޯޕާލްއަށް ތަމްރީނަށް ވަޑައިގެންނެވުން
ފަނޑިޔާރުން ދިގު މުއްދަތުގެ ތަމްރީންތަކަށް ވީއްލާނެ އުޞޫލެއް ހަމަޖައްސައިދިނުމަށް ޖުޑީޝަލް ސަރވިސް ކޮމިޝަން (ޖޭއެސްސީ) އިން ނިންމައިފިއެވެ.
އަންގާރަ ދުވަހު ޖޭއެސްސީން ނެރުނު ބަޔާނެއްގައި ބުނީ، ދިގު މުއްދަތުގެ ތަމްރީންތަކަށް ފަނޑިޔާރުން ވީއްލުމުގައި މިހާތަނަށް ޢަމަލުކުރާނެ ވަކި އުޞޫލެއް ނެތް ކަމަށެވެ.
އެހެންނަމަވެސް، ފަނޑިޔާރުންގެ ޤާބިލްކަން އިތުރުކުރުމަކީ މުހިންމު ކަމެއްކަމަށް ޖޭއެސްސީގެ ބަޔާނުގައި ފާހަގަކޮށްފައިވެއެވެ.
ވުމާއެކު، ފަނޑިޔާރުން އަމިއްލައަށް ހޯދާ ފުރުސަތުތަކުގައާއި، ތަމްރީން ޕްރޮގްރާމްތަކާއި، ކޯސްތަކަށް ފަނޑިޔާރުން ވީއްލުމަށާއި، މިފަދައިން ވީއްލާއިރު މުސާރައާއި ޢިނާޔަތްތައް ހަމަޖެހިގެންދާނެ އުޞޫލެއް ތައްޔާރުކުރުމުގެ މަސައްކަތް ފެށުމަށް ކޮމިޝަނުން މިހާރު ވަނީ ނިންމާފައެވެ.
ޖޭއެސްސީން އެގޮތަށް ނިންމީ، ފަނޑިޔާރުކަމަށް އައްޔަނު ވުމަށްފަހު ދިގުމުއްދަތުގެ ތަމްރީން ފުރުސަތުގައި ފަނޑިޔާރުން ބައިވެރިވުމަށް ހުރަސްތަކެއް ހުރުމުން، އެކަމަށް ރިއާޔަތްކޮށް ކަމަށް އެ ކޮމިޝަނުން ބުނެއެވެ.
އަދި ފަނޑިޔާރުންނަށް އިތުރަށް ތައުލީމު އުނގެނުމަށް ހިތްވަރު ދިނުމުގެ ގޮތުންނާއި، މިދާއިރާގެ ހުނަރާއި، ޤާބިލްކަން އިތުރު ކުރުމަށް ހިތްވަރުދީ ބާރުއެޅުމަކީވެސް ޖޭއެސްސީގެ މަޤްސަދެކެވެ.
ޖޭއެސްސީން މައުލޫމާތު ދޭ ގޮތުގައި މި އުސޫލު އެކުލަވާލަން ނިންމާފައިވަނީ، މިފަދަ ފުރުސަތުތަކުގައި ބައިވެރިވެވަޑައިގަތުމައްޓަކައި ފަނޑިޔާރުން، ފަނޑިޔާރުކަމުން ދުރުވެ ވަޑައިގަންނަން ނުޖެހޭނެފަދަ ގޮތަކަށް ވީއްލުމުގެ ކަންތައްތައް އިންތިޒާމް ކުރުމަށެވެ.
