އިނގިރޭސިވިލާތުގެ އެންމެ ކާމިޔާބު އެއް ކުލަބު ކަމަށްވާ ލިވަޕޫލް ވިއްކާލުމާމެދު ގޮތެއް ނުނިމި ދިގުލައިދިއުމަށްފަހު އެކަން ނުކުރަން މިހާރުގެ ވެރިން ނިންމައިފި އެވެ.
ލިވަޕޫލް ހިންގަމުންދަނީ އެމެރިކާގެ ފެންވޭ ސްޕޯޓްސް ގްރޫޕުންނެވެ. ކުލަބުގެ ހިންގުމުގައި އިސްދައުރެއް އަދާކުރާ އޯނަރު ޖޯން ވިލިއަމް ހެންރީ އާއި ޗެއާމަން ޓޮމް ވާނާ ކުލަބު ވިއްކާލާނެ ކަމަށް އިއުލާނުކުރީ މިދިޔަ ނޮވެމްބަރު މަހު އެވެ. މިއާއެކު ގަތަރާއި ސައޫދީ އަރަބިއާއިން ހުށަހެޅުންތައް ލިބުނު ނަމަވެސް ލިވަޕޫލް އެއްކޮށް ދޫކޮށްލަން ފެންވޭ ސްޕޯޓްސް ގްރޫޕުން ފަހުން ބޭނުމެއްނުވި އެވެ. ކުލަބު ގަތުމަށް ބޭނުންވި އަރަބި މަހުޖަނުން ފެއަށް ޖެހުނީ މިހެންވެ އެވެ.
ފެންވޭ ސްޕޯޓްސް ގްރޫޕުން 2010 ވަނަ އަހަރު ލިވަޕޫލް ގަތީ 300 މިލިއަން ޕައުންޑަށެވެ. މިހާރު އެކުލަބުގެ އަގު 3.7 ބިލިއަނަށް އަރައެވެ. ނަމަވެސް ފެންވޭ ސްޕޯޓްސް ގްރޫޕުން ކުލަބުގެ ބާރުތައް ނުވަތަ މެޖޯރިޓީ ޝެއާ ދޫކޮށްލަން ބޭނުންނުވުމުން ލިވަޕޫލާމެދު ޝައުގުވެރިކަން ފާޅުކުރި ހުރިހާ ފަރާތްތަކުން ރަސްމީކޮށް ވާހަކަ ދައްކަން ވަނީ އިންކާރުކޮށްފަ އެވެ. ލިވަޕޫލް ގަތުމަށް ޝައުގުވެރިވި ގަތަރުގެ ފަރާތްތަކުން މިހާރު މިސްރާބު ޖަހާފައިވަނީ ވާދަވެރި މެންޗެސްޓާ ޔުނައިޓެޑް ގަތުމަށެވެ.
ވާދަވެރި ކުލަބުތައް ކަމަށްވާ މެންޗެސްޓާ ސިޓީ އާއި ޗެލްސީ އަދި ނިއުކާސަލް އާއި އެންމެ ފަހުން މެންޗެސްޓާ ޔުނައިޓެޑް ވެސް މުއްސަދިން ހަރަދުކުރާ ކުލަބުތަކަށް ބަދަލުވާތީވެ ފެންވޭ ސްޕޯޓްސް ގްރޫޕުގެ ނިންމުމާމެދު ލިވަޕޫލްގެ ބައެއް ސަޕޯޓަރުން ދަނީ ހިތްހަމަނުޖެހުން ފާޅުކުރަމުންނެވެ. އެމީހުން ދެކޭ ގޮތުގައި ކުރިމަގުގައި ވާދަވެރި އަދި ކާމިޔާބު ކުލަބެއްގެ ގޮތުގައި ދެމިއޮވެވޭނީ ފައިސާގެ ގޮތުން ތަނަވަސްވެވިގެންނެވެ. އެކަންވާން އޮތީ ކުލަބު ވިއްކާލައިގެން ކަމަށް ދެކޭ މީހުން ގިނަ އެވެ.
ފެންވޭ ސްޕޯޓްސް މިކަމާގުޅޭ ގޮތުން ނެރުނު ކުރު ބަޔާނުގައިވަނީ ލިވަޕޫލް ހަރުދަނާކުރުމުގެ މަސައްކަތް ކުރިއަށްދާނެ ކަމަށާއި ކުލަބު ނުވިއްކައި ކުލަބަށް އިންވެސްޓްކުރާނެ ބަޔަކު ހޯދުމަށް މަސައްކަތް ކުރަމުންދާ ކަމަށެވެ.
