ތުރުކީއާއި ސީރިޔާއަށް އަނެއްކާވެސް ބާރުގަދަ ބިންހެލުމެއް
20 ފެބުރުއަރީ 2023 | ހޯމަ 18:17ތުރުކީއާއި ސީރިޔާ ގުޅޭ ބޯޑަރު ކައިރިއަށް ހޯމަ ދުވަހު ވަނީ 6.3 މެގްނިޓިއުޑްގެ ބިންހެލުމެއް އައިސްފައި
ތުރުކީއަށް އަނެއްކާވެސް އިތުރު ބިންހެލުމެއް އައުން
ތުރުކީއާ ސީރިޔާއަށް ބާރުގަދަ ބިންހެލުމެއް އައިސް އެތައް ބަޔަކު މަރުވިތާ ދެ ހަފުތާ ފަހުން އަނެއްކާވެސް ބާރުގަދަ ބިންހެލުމެއް އަތުވެއްޖެއެވެ.
ރޮއިޓަރސްއިން ރިޕޯޓްކޮށްފައިވާގޮތުގައި ހޯމަ ދުވަހު ތުރުކީއާއި ސީރިޔާ ބޯޑަރަށް ވަނީ 6.3 މެގްނިޓިއުޑްގެ ބިންހެލުމެއް އައިސްފައެވެ. މީގެ ސަބަބުން ތުރުކީގެ އަންޓަކްޔާ ސިޓީގެ އިމާރާތްތަކަށް ބޮޑެތި ގެއްލުންތަކެއް ވެފައިވާ ކަމަށް ވެސް އެ ނޫހުން ރިޕޯޓް ކުރެއެވެ.
ރޮއިޓަރސްއިން ބުނެފައިވާގޮތުގައި ބިންހެލުން އައިއިރު އެ ނޫހުގެ ދެ ނޫސްވެރިން ތިބީ އެ ސަރަހައްދުގައެވެ. ހޯމަ ދުވަހުގެ ބިންހެލުމުގެ އަސަރު މިސްރާއި ލުބުނާނަށް ވެސް ކޮށްފައިވާކަމަށް ރިޕޯޓްކުރެއެވެ.
ޔޫރަޕިއަން މެޑިޓެރޭނިއަން ސީސްމަލޮޖިކަލް ސެންޓަރ (އޭއެމްއެސްސީ)ން ބުނެފައިވާގޮތުގައި އެ ބިންހެލުން އައިސްފައިވަނީ ބިމުގެ ދެ ކިލޯމީޓަރު އަޑިންނެވެ.
ހޯމަ ދުވަހުގެ ބިންހެލުމާ ގުޅިގެން މިހާތަނަށް އެއްވެސް މިހާކަށް ގެއްލުން ވެފައިވާކަމުގެ ރިޕޯޓެއް ނުލިބެއެވެ.
މި މަހުގެ ކުރީކޮޅު ސީރިޔާ-ތުރުކީ ބޯޑަރު ކައިރިއަށް އައި ބާރުގަދަ ބިންހެލުމުގެ ސަބަބުން ދެ ގައުމުން އެތައް ހާސް ބަޔަކު ވަނީ މަރުވެފައެވެ. އަދި އެތައް އިމާރާތެއް ވެސް ވަނީ ވެއްޓިފައެވެ.
