ދުނިޔޭގެ އެކި ކަންކޮޅުތަކުން ގިނަ ބަޔަކު ތުރުކީވިލާތަށް އެހީވުމުގެ ސިއްރު އެނގޭތަ؟

މީހަކަށް އެހީތެރިކަމުގެ އަތެއް ދިއްކޮށްލައިގެން ވާނެ ގެއްލުމެއް ނޯންނާނެކަން އެންމެ ސާފުކޮށް ފެނިގެންދާ އެއް ތަނަކީ ތުރުކީވިލާތުގެ ހަތޭ ޕްރޮވިންސްއެވެ. ފެބުރުއަރީ މަހުގެ 6 ވަނަ ދުވަހުގެ ބާރުގަދަ ބިންހެލުމުގައި މުޅި ސަރަޙައްދު އެފުށް މިފުށަށް ޖެހިފައި އޮތް އިރު، ދުނިޔޭގެ އެކި ކަންކޮޅުތަކުން ގިނަ ޢަދަދެއްގެ ވޮލަންޓިއަރުން، އެ ސަރަޙައްދުގައި އެހީތެރިވަމުން ދަނީ ސަބަބުތަކެއް ނެތިއެއް ނޫނެވެ. ފެބުރުއަރީ 19 ވަނަ ދުވަހު، ރޮއިޓަރޒްއާ ވާހަކަދެއްކި ބައެއް ވޮލަންޓިއަރުން ވަނީ، ކޮންމެ ހާލަކައިގެންވެސް ތުރުކީވިލާތަށް އެހީވުމަށް އެމީހުން އަތުކުރި އޮޅާލި ސަބަބުން ހިއްސާކޮށްފައެވެ.

ހަތޭ ޕްރޮވިންސްގައި މިވަގުތު ހިލޭ ސާބަހަށް މަސައްކަތް ކުރަމުންދާ އެކަކީ ޔޫކްރައިންގެ ވެރިކަން ކުރާ ކިއޭވްއަށް އުފަން، ޢުމުރުން 34 އަހަރުގެ އަރޓެމްއެވެ. އޭނާ ބުނި ގޮތުގައި ތުރުކީވިލާތަށް އެހީތެރިކަން ފޯރުކޮށްދެމުން ދަނީ، ތުރުކީވިލާތުގެ ރައްޔިތުންގެ ފަރާތުން، އޭނާގެ އުފަން ވަޒަނުގެ އަހުލުވެރިންނަށް ލިބެމުންދިޔަ އެހީތެރިކަމުގެ ސަބަބުންނެވެ. ހެޔޮ ކަމުގެ ބަދަލުގައި، ހަމަ އެފަދަ ހެޔޮ ކަމެއް ކޮށްދިނުމުގެ ބޭނުމުގައެވެ.

ބޭރަކްތާރު ޓީބީ2 ޑްރޯންއެއް ޔޫކްރައިންއަށް ފޯރުކޮށްދިނުމަށްޓަކާ ލިތުއޭނިއާގެ އާންމުން ފައިސާ އެއްކުރި ހިސާބުން، އެ މޮޑެލްގެ ޑްރޯންއެއް ޔޫކްރައިންއަށް ހަދިޔާ ކުރުމަށްޓަކާ، ތުރުކީވިލާތުގެ ޑިފެންސް އިންޑަސްޓްރީ އޭޖެންސީއިން ލިތުއޭނިއާއަށް ދޭން ނިންމާފައި އޮތްކަން، ލިތުއޭނިއާގެ ޑިފެންސް މިނިސްޓްރީއިން އިއުލާން ކުރީ މިދިޔަ ޖޫން މަހުގެ ތެރޭގައެވެ.

އެމެރިކާގައި ދިރިއުޅެމުންދާ ކޮރެއާ ދަރިކޮޅުގެ ސޮލޮމޮން ސޮންގްވެސް މިވަގުތު ހުރީ ތުރުކީވިލާތުގައެވެ. ތުރުކީވިލާތުގައި ހާލުގައި ޖެހިފައިވާ ކޮރެއާ މީހުންނަށް އެހީތެރިކަން ފޯރުކޮށްދިނުމުގައެވެ. ސޮލޮމޮން ބުނި ގޮތުގައި ތުރުކީވިލާތުގެ މީހުންނަކީ ހަނގުރާމައިގެ ދުވަސްވަރު، ކޮރެއާ މީހުންނަށް އިންތިހާއަށް އެހީތެރިކަން ފޯރުކޮށްދިން ބައެކެވެ. އަދި މިއީ އެކަމުގެ އަގު އަދާ ކުރަންވީ ވަގުތު ކަމަށް ޤަބޫލު ކުރެވޭ ކަމަށްވެސް ސޮލޮމޮން ވަނީ ބުނެފައެވެ.

އޮސްޓްރޭލިއާގެ ރެސްކިއު ޓީމަކުންވެސް ހަތޭގައި ދަނީ ހަރަކާތްތެރިވަމުންނެވެ. އެ ޓީމުން ތުރުކީވިލާތުގައި ހަރަކާތްތެރިވަމުން ދަނީ ކުރިމަތިލާން ޖެހިފައިވާ ފުން ހިތާމަ ހިއްސާ ކުރުމުގެ ގޮތުންކަން، ރެސްކިއު ނިއުސަތު ވޭލްސް ސްޓޭޝަން އޮފިސަރ، ސްކޮޓް ހޭންލީގެ ވާހަކަތަކުން ހާމަވެއެވެ.

ތުރުކީވިލާތާއި ސޫރިޔާ ހިއްސާކުރާ ބޯޑަރު ސަރަޙައްދަށް، ފެބުރުއަރީ 6 ވަނަ ދުވަހު އައި ބާރުގަދަ ބިންހެލުމުގެ ކާރިޘާގައި މަރުވި މީހުންގެ ޢަދަދު، ފެބުރުއަރީ 20 ވަނަ ދުވަހަށް އަލިވިލުނުއިރު ވަނީ ބައި ލައްކައަށް އަރަން ގާތްވެފައެވެ. އެތައް ސަތޭކަ ހާސް އެޕަރޓްމަންޓެއް ސުންނާފަތިވެ، ގިނަ ބަޔަކަށް ވީނުވީއެއް އަދިވެސް ކަށަވަރު ވެފައި ނުވާ އިރު، މަރުވި މީހުންގެ ޢަދަދުތައް އަދިވެސް އިތުރަށް މައްޗަށް ދާނެ ކަމީ، ޤަބޫލުކުރަން ޖެހިފައި އޮތް ހިތްދަތި ޙަޤީޤަތެކެވެ.