ނޭމާގެ އިތުރު ޓެސްޓުތައް ހަދަނީ، ޕީއެސްޖީ އަށް ނުތަނަވަސްކަމެއް

ޕެރިސް ސެއިންޓް ޖާމަން (ޕީއެސްޖީ) އަށް ކުޅެމުން އަންނަ ބްރެޒިލްގެ ފޯވާޑް ނޭމާ ޖޫނިއާ އަށް އަނިޔާވެއްޖެ އެވެ.

ނޭމާ އަށް އަނިޔާވެފައި ވަނީ ފްރާންސް ލީގުގައި ޕީއެސްޖީން ލީލް ބަލި ކުރި މެޗުގަ އެވެ. މެޗުގައި ޕީއެސްޖީގެ ދެ ވަނަ ލަނޑު ވެސް ޖަހައިދިން ނޭމާ އަށް އަނިޔާވެ އޭނާ ދަނޑުން ބެލީ 51 ވަނަ މިނެޓުގަ އެވެ. އަނިޔާގެ ސަބަބުން ނޭމާ ދަނޑުން ބާލާފައި ވަނީ ވެސް އަށިގަނޑުގެ އެހީގަ އެވެ.

މެޗަށްފަހު ޕީއެސްޖީން ބުނީ ނޭމާ އަށް ލިބުނީ ކުޑަހުޅުގެ އަނިޔާއެއް ކަމަށެވެ. އަނިޔާގެ ސަބަބުން ނޭމާގެ އެމްއާރުއައި އެއް ހަދާފައިވާއިރު މާ ބޮޑު ގެއްލުމެއް ލިބިފައިވާކަމެއް އޭގެން ނުދައްކާ ކަަމަށް އެ ކުލަބާ ހަވާލާދީ މީޑިއާތަކުގައި ވަނީ ރިޕޯޓުކޮށްފަ އެވެ. އެހެންކަމުން އިތުރު އެހެން ކަންކަން ދެނެގަތުމަށްޓަކައި އިތުރު ޓެސްޓުތަކެެއް ކުރިއަށް އޮތް 48 ގަޑިއިރުގެ ތެރޭގައި ހަދާނެ ކަމަށް ވެސް ރިޕޮޓުކޮށްފައިވެ އެވެ. ނޭމާގެ އަނިޔާ ސީރިއަސް ވެއްޖެ ނަމަ ޕީއެސްޖީގެ މެޗުތަކެއް އޭނާ އަށް ގެއްލޭނެ ކަމަށް މީޑިއާ ރިޕޯޓުތައް ބުނެ އެވެ.

ނޭމާ އަށް އަނިޔާވީއިރު ޕީއެސްޖީ އަށް ކުރިއަށް އޮތީ މުހިންމު މެޗުތަކެކެވެ. ފްރާންސް ލީގުގައި މާސޭ އާއި ނަންޓޭސްއާ ދެކޮޅަށް ކުޅުމަށްފަހު، އަންނަ މަހު ޔުއެފާ ޗެމްޕިއަންސް ލީގު ގަދަ 16 ގެ ދެ ވަނަ ލެގުގައި އެ ޓީމުން ބަޔާން މިއުނިކާ ދެކޮޅަށް ކުޅޭނެ އެވެ. ކުއާޓާ ފައިނަލުން ޖާގަ ހޯދުމަށް އެ މެޗުން މޮޅުވުން ޕީއެސްޖީ އަށް މަޖުބޫރެވެ. އެ މެޗުގައި ނޭމާ އަށް ނުކުޅެވިއްޖެ ނަމަ، ޕީއެސްޖީ އަށް ގެއްލުން ދައްކާނެ އެވެ. ފުރަތަމަ ލެގުގައި ބަޔާނާ ދެކޮޅަށް ކީލިއަން އެމްބާޕޭ އަށް ނުކުޅެވޭނެ ކަމަށް ބުނި ނަމަވެސް، އެ މެޗުގައި އޭނާ ވަނީ ކުޅެފަ އެވެ. ނަމަވެސް އެއީ ބަދަލު ކުޅުންތެރިޔެއްގެ ގޮތުގަ އެވެ.