އަހަރަމެންނަކީ ތަފާތު ޓީމެއް، އަބަދުވެސް ކުރިއަށް ދެވޭނެ: އެމްބާޕޭ

ފްރާންސްގެ ޕެރިސް ސެއިންޓް ޖާމަން (ޕީއެސްޖީ) އަކީ ތަފާތު ޓީމެއް ކަމަށާއި، އަބަދު ވެސް ކުރިއަށް ދެވޭނެ ކަމަށް އެ ޓީމަށް ކުޅެމުން އަންނަ ޒުވާން ކީލިއަން އެމްބާޕޭ ބުނެފި އެވެ.

އެމްބާޕޭ މިހެން ބުނީ ފްރާންސް ލީގުގައި ލީލްގެ މައްޗަށް ކުރި ހޯދި މެޗަށްފަހު ވާހަކަ ދައްކަމުންނެވެ. އެ މެޗަށް ނުކުތްއިރު ޕީއެސްޖީން ވަނީ އެ ޓީމު އެންމެ ފަހުން ކުޅުނު ތިން މެޗުން ވެސް ބަލިވެފަ އެވެ. އެކަމުގެ ސަބަބުން ޕީއެސްޖީ އަށް މި ސީޒަންގައި އޮތީ އުނދަގޫތަކަކާ ވެސް ކުރިމަތިލާން ޖެހިފަ އެވެ. ލީލްގެ މައްޗަށް ޕީއެސްޖީ އަށް ކުރި ހޯދުނީ އުނދަގޫ ގޮތަކަށެވެ. ދެ ލަނޑުން ޕީއެސްޖީން ލީޑު ކުރަމުން ދަނިކޮށް ލީލް އިން ވަނީ ފަހަތުން އަރައި ތިން ލަނޑު ޖަހައިގެން މެޗުން މޮޅުވެފަ އެވެ. އެމްބާޕޭގެ ލަނޑުން މެޗުގެ ނަތީޖާ ޕީއެސްޖީން ހަމަހަމަކުރިއިރު، ފަހު ވަގުތު މޮޅުކޮށްދިނީ ލިއޮނަލް މެސީ އެވެ.

އެ މެޗަށްފަހު ވާހަކަ ދައްކަމުން އެމްބާޕޭ ބުނީ، އުނދަގޫ ހާލަތަކުން އަރައި ގަނެވެއްޖެ ކަމަށާއި، ލީލްއާ ދެކޮޅަށް ދެއްކުނީ ޕީއެސްޖީގެ އެންމެ މޮޅު ކުޅުން ނޫން ކަމަށެވެ. އެމްބާޕޭ ބުނީ އެ މެޗުގައި ޕީއެސްޖީ އަށް ބައިވަރު ގޯސްތަކެއް ހެދުނު ކަމަށެވެ. އަދި ރަނގަޅު ފެންވަރެއްގައި ކުޅޭ ޓީމަކާ ދެކޮޅަށް ކުޅެ ހެދުނީ އާދައިގެ ގޯސްތަކެއް ކަމަށެވެ. އިތުރަށް އެމްބާޕޭ ބުނީ ޕީއެސްޖީން ދައްކައިދިނީ އެމީހުންގެ އެންމެ ރަނގަޅު ނޫން ދުވަހު ވެސް އެ ޓީމަކީ ތަފާތު ޓީމެއް ކަމަށެވެ. އަދި ޕީއެސްޖީގައި ތިބީ ވެސް ވަރަށް ތަފާތު ކުޅުންތެރިން ކަމަށާއި، އެންމެން އެކުގައި ހުރިހާ ކަމަކުން އަރައިގަނެ ކުރިއަށް ދެވޭނެ ކަމަށެވެ.

ފްރާންސް ލީގުގައި ޕީއެސްޖީ އޮތީ ތާވަލްގެ އެއް ވަނައިގަ އެވެ. ނަމަވެސް އެމީހުން އެންމެ ބޭނުންވާ ޔުއެފާ ޗެމްޕިއަންސް ލީގުގައި މިއަހަރު ވެސް އޮތީ އުނދަގޫ ހާލަތެއްގަ އެވެ. އެ މުބާރާތުގެ ގަދަ 16 ގައި އަމިއްލަ ދަނޑުގައި ވަނީ ބަޔާން މިއުނިކް އަތުން ބަލިވެފަ އެވެ. ދެ ވަނަ ލެގު އޮންނާނީ ބަޔާންގެ ދަނޑުގަ އެވެ. ކުއާޓާ ފައިނަލަށް ޕީއެސްޖީ އަށް ދެވޭނީ އެ މެޗުގައި ބަޔާން ބަލިކޮށްގެންނެވެ.