ބިންހެލުމުގައި ވެއްޓުނު ޢިމާރާތްތަކުގެ ދަށަށް އުފަންވި ކުއްޖާ، ދެމަފިރިއަކާ ހަވާލުކޮށްފި

ތުރުކީވިލާތާއި ސޫރިޔާ ހިއްސާކުރާ ބޯޑަރު ސަރަޙައްދަށް މިމަހު ކުރީކޮޅު އައި ބާރުގަދަ ބިންހެލުމުގެ ކާރިޘާއާ ގުޅިގެން ކުރިއަށް ގެންދާ މީހުން ސަލާމަތް ކުރުމުގެ އޮޕަރޭޝަންގެ ތެރެއިން އެންމެ ގިނަ ބައެއްގެ ސަމާލުކަން ދަމައިގަތް އެއް ކުއްޖަކީ، ބިންހެލުމުގެ ތެރެއަށް އުފަންވެފައި އޮއްވާ ފެނުނު ތުއްތު ތުއްތު ކުއްޖާއެވެ. ސޫރިޔާގެ އުތުރުގެ ސަރަޙައްދަށް އުފަންވި އެ ތުއްތު ކުއްޖާ ހޯދަން، ދުނިޔޭގެ އެކި ކަންކޮޅުތަކުން އެތައް ބަޔަކު އެދެމުން ދިޔައެވެ.

ރެސްކިއު އޮޕަރޭޝަންގެ މަންޒަރުތައް ސޯޝަލް މީޑިއާގައި ދައުރުވަމުން ދާއިރު، އެންމެ ގަދައަށް ވައިރަލްވި އެއް ވީޑިއޯއަކީ ވެއްޓިފައިވާ ޢިމާރާތްތަކުގެ ބައިތަކުގެ ދަށުން، ހިރަފުހުން ތަތްތެޅިފައި އޮތް ތުއްތު ކުއްޖާ ނަގައިގެން އަންނަ މަންޒަރު ފެންނަ ވީޑިއޯއެވެ.

ވީޑިއޯއިން ފެންނަ ތުއްތު ކުއްޖާއަކީ ޢަބްދުﷲއާއި އަފްރާ މްލެއިހާންގެ ދެމަފިރިންނަށް އުފަންވި ދަރިއެއްކަން ވަނީ ފަހުން ދެނެގަނެވިފައެވެ. އެ ހާދިޘާގައި، ތުއްތު ކުއްޖާގެ މައިންބަފައިންނާއި އެއްބަނޑު އެއްބަފާ އެހެން ކުދިން ވަނީ މި ދުނިޔެއާއި ވަކިވެފައެވެ. ސޫރިޔާގެ އިދިކޮޅު ހަނގުރާމަވެރިންގެ ކޮންޓްރޯލް އޮންނަ ޙަލަބް ޕްރޮވިންސްގެ ޖަންދާރީސް އަވަށަށް އުފަންވި އެ ތުއްތު ކުއްޖާ ވަނީ ޔަޠީމުވެފައެވެ.

ތުއްތު ކުއްޖާއަށް ފަރުވާ ދީފައިވަނީ ޖީހާން ހޮސްޕިޓަލުގައެވެ. އެއީވެސް އިދިކޮޅު ހަނގުރާމަވެރިންގެ ކޮންޓްރޯލް އޮންނަ ސަރަޙައްދެއްގައި ހުންނަ ހޮސްޕިޓަލެކެވެ. އެ ތުއްތު ކުއްޖާ ނިސްބަތްވަނީ ކޮން ޢާއިލާއަކަށްކަން ދެނެގަނެވެންދެކަށްވެސް އޮތީ ހޮސްޕިޓަލުގައެވެ.

ތުއްތު ކުއްޖާގެ ޢާއިލާއިން އެ ކުއްޖާއާ ޙަވާލުވީ ފެބުރިއަރީ 18 ވީ ހޮނިހިރު ދުވަހުއެވެ. ތުއްތު ކުއްޖާއާ ހަވާލުވީ އޭނާގެ ބައްޕަ ފަރާތު ބޮޑުދައިތަ ޙާލާއާއި އޭނާގެ ފިރިމީހާ ޚަލީލް އަލް-ސަވާދީއެވެ. ޙާލާގެ ދެމަފިރިން، ތުއްތު ކުއްޖާއަށް ނަން ދިނީ އެ ދަރިފުޅުގެ މަންމަގެ ނަމުންނެވެ. މިއަދު އެއީ އަލް-މަރްޙުމާ އަފްރާގެ ލޯބިލޯބި އަފްރާއެވެ.

ޙާލާގެ ދެމަފިރިންނަށްވެސް ދާދިފަހުން ވަނީ ދަރިއަކު ލިބިފައެވެ. ފިޔާތޮށި ކުލައިގެ ފޮތިގަނޑެއްގެ ތެރެއަށްލާ އޮޅާލައިގެން އެއް އަތުން އަފްރާ އުރާލައިގެން އަލް-ސަވާދީ އިން އިރު، ނޫކުލައިގެ ފޮތިގަނޑެއްގެ ތެރެއަށްލާ އޮޅާލައިގެން އަނެއް އަތުން އުރައިގެން އިނީ އޭނާގެ އަމިއްލަ ދަރިފުޅު އަޠާއެވެ. އަޠާ އުފަންވީ ބިންހެލުން އައިތާ 3 ވަނައަށް ވީ ދުވަހުއެވެ. އަލް-ސަވާދީ ބުނި ގޮތުގައި އޭނާ އެ ދެދަރިންވެސް ބޮޑު ކުރާނީ އެކީގައެވެ.

އަލް-ސަވާދީގެ ޢާއިލާ ދިރިއުޅެމުންދާ ޖަންދާރީސްއަކީ އިދިކޮޅު ހަނގުރާމަވެރިންގެ ކޮންޓްރޯލްގެ ދަށުގައިވާ ސަރަޙައްދުތަކުގެ ތެރެއިން އެންމެ ބޮޑު އަސަރެއް ކުރި އެއް ސަރަޙައްދެވެ.