ބިންހެލުމަކަށް އުފަންވި ކެފޭ އޯނަރުގެ ފަރާތުން ތުރުކީވިލާތަށް ހާއްސަ ހައިރާތެއް!
12 ފެބުރުއަރީ 2023 | އާދީއްތަ 08:47ޝޮޓަރެވްސްކީ 1963 ވަނަ އަހަރު، ސްކޮޕްޔޭއަށް އައި ބާރުގަދަ ބިންހެލުމަށް އުފަންވި މީހެއް
އެންމެ ޑޮލަރެއްގެ މިންވަރު ހަދިޔާ ކުރާ މީހުންނަށްވެސް ޝޮޓަރެވްސްކީގެ ކެފޭއިން ހިލޭ ކޮފީ ލިބޭ
ސޫރިޔާއާއި ތުރުކީވިލާތް ހިއްސާ ކުރާ ބޯޑަރު ސަރަޙައްދު ހަފުސްކޮށްލި ފެބުރިއަރީ 6 ވަނަ ދުވަހުގެ ވަރުގަދަ ބިންހެލުމުގެ ހާދިޘާގައި ހާލުގައި ޖެހިފައި ވާ މީހުންނަށް އެހީވުމުގެ ހަރަކާތްތައް ދުނިޔޭގެ އެކި ކަންކޮޅުތަކުގައި ދަނީ ހިންގަމުންނެވެ.
ހާލުގައި ޖެހިފައި ވާ މީހުންނަށް ބޭނުންވާ އެހީގެ އިތުރުން އެނޫންވެސް ގޮތް ގޮތުން ތުރުކީވިލާތާއި ސޫރިޔާއަށް އެހީވުމަށް ޤައުމުތަކުގެ ސަރުކާރުންތަކުން މަސައްކަތް ފަށާފައި ވާ އިރު، ޖަމިއްޔާ ޖަމާޢައަތްތަކާއި، އަމިއްލަ ވިޔަފާރިތަކުންވެސް ދަނީ އެހީގެ އެކިއެކި ކެމްޕޭންތައް ހިންގަމުންނެވެ. ހިތައް ދަތި ކުރަނިވި މަންޒަރު ދައްކުވާދޭ ފޮޓޯތަކެއް ޖަހައިގެން އެކައުންޓަކަށް ފައިސާ ޖަމާ ކުރަން އެދުމުގެ ބަދަލުގައި، އެހީ ދިނުމަށް ވީހާވެސް ގިނަ ޢަދަދެއްގެ ބަޔަކު ޝަޢުޤުވެރި ކުރުވުމަށް މަސައްކަތް ކުރަމުން ދާ އެކަކީ ސާޝޯ ޝޮޓަރެވްސްކީއެވެ.
ޝޮޓަރެވްސްކީ އަކީ، ނޯތު މެސަޑޯނިއާ (2019 ވަނަ އަހަރުގެ ކުރިން މެސަޑޯނިއާ)ގެ ވެރިކަން ކުރާ ސްކޮޕްޔޭގައި "ބައިފް ތަފްދަލީދްޒޭ"ގެ ނަމުގައި ކެފޭއެއް ހިންގާ މީހެކެވެ. ޝޮޓަރެވްސްކީ ދަނީ އޭނާގެ ވިޔަފާރި ބޭނުން ކޮށްގެން، ތުރުކީވިލާތުގައި ހާލުގައި ޖެހިފައިވާ މީހުންނަށް އެހީވުމުގެ މަސައްކަތް ކުރަމުންނެވެ. އޭނާ އެކަން ކުރަނީ، ކެފޭއަށް ޒިޔާރަތް ކުރާ މީހުންނަށް ހިލޭ ކޮފީ ދީގެންނެވެ. ހިލޭ ކޮފީ ލިބެނީ ތުރުކީވިލާތަށް އެހީވުމަށް ޤާއިމު ކޮށްފައިވާ ފަންޑަށް ފައިސާ ޖަމާ ކޮށްގެންނެވެ.
ޝޮޓަރެވްސްކީގެ ކެފޭއިން ހިލޭ ކޮފީ ބޭނުން މީހުން، މެސަޑޯނިއަން ރެޑް ކްރޮސްގައި ޤާއިމުކޮށްފައިވާ ހާއްސަ ނަމްބަރަކަށް ގުޅާ، ތުރުކީވިލާތަށް އެހީ ހުށަހަޅަންޖެހެއެވެ.
ހިލޭ ކޮފީ ދިނުމުގެ ކުރިން، އެމީހަކީ ޙަޤީޤަތުގައިވެސް އެހީ ދިން މީހެއް ތޯ ޝޮޓަރެވްސްކީ ކަށަވަރު ކުރެއެވެ.
އެންމެ ޑޮލަރެއްގެ މިންވަރު ހަދިޔާ ކުރާ މީހުންނަށްވެސް ޝޮޓަރެވްސްކީގެ ކެފޭއިން ހިލޭ ކޮފީ ލިބޭނެ އިންތިޒާމް، އޭނާ ވަނީ ހަމަޖައްސާފައެވެ.
